До 8 часот во саботата, 5-ти септември, во текот на претходните 24 часа, издадени има се потврди на вкупно 1.462 странски државјани но не е побаран ниеден азил, а од средината на јуни досега издадени се вакви потврди на над 60.000 бегалци и имигранти, информираше македонското Министерство за внатрешни работи.

Од споменатата бројка, 889 се мажи и 224 се од женски пол, а од нив 271 се деца кои го придружуваат носителот на потврдата, како и уште 78 деца кои патуваат без родител, на кои издадена е потврда за искажана намера за поднесување на барање за признавање на право на азил.

Според државјанството на лицата на кои им се издадени потврди, најбројни се државјаните на Сирија-1.253, Ирак-85, Авганистан – 81, Пакистан-23, додека другите се во помал број.

Во петокот Високиот комесаријат на ОН за бегалци – УНХЦР објави дека рекордни 5.600 мигранти влегле во четвртокот во Македонија од Грција, што е двојно повеќе отколку вообичаена досегашна бројка кога тој број осцилираше меѓу 2.000 и 3.000 лица. Според организацијата, македонските власти успеваат да регистрираат само половина од мигрантите коишто пристигнуваат од Грција,

Според МВР, во периодот од 19-ти јуни до 5-ти септември годинава, издадени се потврди на вкупно 60.421 странски државјанин, од кои, 41.207 се од машки пол, 8.271 се од женски, 9.548 се деца кои го придружуваат носителот на потврдата, како и уште 1.395 деца кои патуваат без родител, на кои им е издадена потврда за искажана намера за поднесување на барање за признавање на право на азил.

Според државјанството на лицата на кои им се издадени потврди, најбројни се државјаните на Сирија – 49.182, потоа на Авганистан – 3.411, Ирак – 2.751, Пакистан – 1.741 Палестина – 730, Сомалија – 571, Бангладеш – 428, Конго – 323, Нигерија – 203, Камерун – 160 Еритреја – 142, Етиопија – 109, додека другите се во незначителни бројки.

Во последното деноноќие, пак, до Одделението за азил не се поднесени барања за признавање на право на азил врз основа на претходно издадена потврда за искажана намера за поднесување на барање за признавање на право на азил.

Од започнувањето на издавањето на потврдите до петокот до Одделението за азил, инаку, поднесени се 49 барања за признавање право на азил врз основа на претходно издадена потврда, при што 36 барања се од државјани на Сирија, од нив 10 за деца, потоа три барања од државјани од Пакистан и Авганистан од нив четири се деца кои го придружуваат родителот, по две барања од државјани од Мароко, Алжир и Ирак (едно од барањата е за деца) и едно барање од државјанин на Египет./крај/мф/сн

Извор: Макфакс