Нервоза и гнев имаше денеска кај жителите на кумановско Слупчане кои останаа 24 часа без струја. Додека траеја преговорите на ниво Слупчане-Општина Липково-Министерство за економија-ЕВН. Eкипата на „Макфакс“ беше во селото. Жителите немаа разбирање за екипите на Електродистрибуција. Имаше такви кои редовно плаќаат давачки кон компанијата, како и други кои имаат заостанати сметки. Заедничко им беше што сите останаа во темница. Жител, повика и да се запали ЕВН, бидејќи смета дека се виновни што немаат разибрање за нив. Локален кафанџија посочи дека трпи штети што струјата е исклучена без никаква најава, а тој ги има сите сметки платени. Претставникот на Слупчане на состаноците во Липково кажа што се случувало во текот на преговорите.

„Од 1000 луѓе има 10 вработени. Од што да платиме струја? Нема ништо. Функционираме без струја, на свеќи, нема вода. Или да се запали оваа држава или да се најде решение. Не може цело село без струја. Не само нашето село, туку и другото и третото. Штетата ќе биде голема ако нема уште долго струја. Има луѓе што плаќаат струја, малку се тие кои немаат за да платат. Јас на работа не сум, имам студент. Од што да платам струја? Јас мислам дека државата не разбира ништо. Државата треба да ја запалиме, да разбира – тешко. ЕВН треба да ја запалиме како што ја запалија во Бугарија. Нив треба да ги запалиме. Тие се криви. Како што ги запалија во Бугарија. Тука треба како во Франција, ќе правиш милијарда штета на државата, нека мислат после што ќе прават. Сегде поевтини струјата, овде ја кренаа цената“, рече гневен жител.

Во Општина Липково имало и состанок. Претставник на Слупчане, кажа за што ќе се дискутира со директорот на КЕЦ Куманово на ЕВН, жители и градоначалникот. Претходно, министерот за економија, Крешник Бектеши, помогнал да се смират ЕВН и Слупчане.

„Се јавивме на министерот за економија, тој побара ние да гарантираме за овие работи и ние затоа гарантиравме. Разговаравме со директорот од ЕВН за точки кои се во интерес на жителите. Донесовме заклучок да дојдат да пуштат струја“, рече Абдула Абази.

Но штета од 24 часовниот прекин има. Локалниот кафанџија Исеини посочи дека сите сметки му се платени, а тој е без струја. Покажа сметки, но и фотографии од кујната. Рече дека штетата за еден ден му е минимум 700 евра бидејќи не можел да приготвува храна.

„Имам четири фрижидери со месо. Ако тоа се расипе? Каде да се жалам? Се ми е платено. Научија да викаат ‘Крадат, крадат во село’. Никој не краде. Колку добиваме сметка, толку плаќаме. Јас имам пари, плаќам. Кој нема – нема. Душата ли да им ја земеш? Младите тука не работат. Нека дојде државата види. Е сеа плати.. Толку има, продава две кила компири за да плати“, рече кафанџијата.

Екипи на ЕВН ја вклучија струјата. Тие не беа нападнати, ниту попречени.