Судското рочиште за случајот „Ровер“ во којшто обвинет е лидерот на Обединети за Македонија и поранешниот Министер за внатрешни работи, Љубе Бошкоски се одложи во петокот, бидејќи судијката од судечкиот совет била на боледување.

На судењето не беше спроведен Бошкоски кој во затвор ја одлежува затворската казна за случајот „Кампања“ за нелегално финансирање на изборна кампања и злоупотреба на службената положба. Судијата Илија Трпков рече дека Бошкоски не бил спроведен по негова интервенција, за да не се прават трошоци, со оглед дека неговата колешка судијкa била на боледување. Од Специјалното јавно обвинителство сé уште нема известување дали ова Обвинителство ќе го преземе случајот во своја надлежност, иако веќе започна со разгледување на овој случај. Во судницата реагираше обвинетиот Зоран Трајковски, поранешен шеф на обезбедувањето на Љубе Бошкоски во периодот кога овој ја извршуваше должноста министер за внатрешни работи, револтиран заради тоа што поминал три години во притвор. „Сега сите ќе се разболуваат еден по еден, и другиот судија и обвинителката, до изборите“, рече Трајковски. „Пред три ипол години на обвинетите, на инсистирање на Славица Јанковска, која беше судија на претходна постапка, им беше даден притвор најмногу врз основот опасност од бегство, додека истата судијка не им додели притвор на осомничените во ‘Титаник’. Заедничко за обвинетите во ‘Ровер’ и во ‘Титаник’ е тоа што неколкупати бевме повикани, и во обвинителството и во МВР, за да даваме изјави и соработувавме со сите органи, а надвор од закон, на инсистирање на вториот судија во ‘Ровер’, нам ни беше продолжен притворот на 13. 10.2014 година, иако поминаа две години од подигнување на обвинителниот акт и поминавме во притвор три години, односно 1.073 дена“, рече Трајковски.Тој рече дека очекуваат наредната недела Специјалното обвинителство да се изјасни дали овој случај ќе биде во нивна надлежност.Ова е трето по ред судење за случајот „Ровер“ откако Апелација го врати двапати предметот на повторно судење, а обвинетите беа ослободени од притвор. Приврзаниците на Бошкоски во четвртокот обвинија дека функционери од власта вршеле притисок Бошкоски да не биде пуштен од затвор до изборите, иако ги исполнувал условите./крај/мф/ффс