Македонија
SafeJournalists: Ги осудуваме смртните закани и сексистичките навреди кон новинарката Тања Милевска
Тања Милевска, новинарка и дописник во МИА, доби смртни закани и сексистички навреди на „Твитер“, а подоцна и на „Фејсбук“, поради нејзините јавни ставови изразени на социјалните мрежи. Случајот е пријавен во полиција, но досега не се поведени обвиненија.
На 11 јули Милевска на социјалните мрежи доби десетици вербални закани, говор на омраза и закани од силување кога таа на „Твитер“ поставила прашање дали премиерот на Унгарија, Виктор Орбан, и Европската народна партија (ЕПП) во Европскиот парламент ја признаваат уставната промена на официјалното име на државата. По овој твит, тролови, како и активни политички фигури, изминативе пет дена ги подгреваа заканите во обид да ја дискредитираат новинарката во пресрет на парламентарните избори што се одржаа вчера.
Здружението на новинарите на Македонија (ЗНМ) остро ги осуди говорот на омраза и директните закани за животот на Милевска и ги потсети Министерството за внатрешни работи и Јавното обвинителство дека овие дела се опфатени со Кривичниот законик и треба да се постапува по нив.
„Безбедноста на новинарите и слободата на говорот одат рака под рака, заедно со демократските обележја на една земја. Ваквиот јавен дискурс, во кој најстрого се напаѓаат новинарите, со отворени закани за животот, е недозволив и незамислив за едно демократско општество, особено за време на предизборниот период“, рече претседателот на ЗНМ, Младен Чадиковски, и додаде дека Здружението ќе бара од институциите итна реакција и будно следење на сите закани против новинарите.
Мрежата SafeJournalists, претставувајќи повеќе од 8.200 медиумски професионалци во Западен Балкан, му се придружува на својот член ЗНМ во осудата за заканите против Милевска и ја потсетува јавноста дека во текот на мај беа забележани три случаи на закани преку интернет (Мишко Иванов, Анета Додевска и Наташа Стојановска) и сите овие случаи сè уште се нерешени. Сега дополнително загрижува фактот дека ваквите закани доаѓаат во предизборната кампања, а според информациите на ЗНМ, за тоа се одговорни политичките партии, кои се директни генератори на таквиот наратив што доаѓа од нивните приврзаници, ботови и лажни профили на социјалните мрежи. Ги повикуваме релевантните институции во Северна Македонија да дејствуваат и да ја обезбедат безбедноста на новинарите, особено што практиката покажува дека заканите преку интернет честопати доведуваат до физички напади.
Мрежата SafeJournalists ќе ги информира релевантните национални и меѓународни организации и институции за овие случаи. Секој напад врз новинарите е напад врз јавниот интерес, демократијата и правата на сите граѓани, се вели во соопштението.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Филипче: Бошњачката заедница е нераскинлив дел од нашето мултиетничко општество
Претседателот на Социјалдемократскиот сојуз на Македонија, Венко Филипче, вечерва присуствуваше на одбележување на Меѓународниот Ден на Бошњаците, во организација на Странката на демократска акција на Македонија (СДА).
Во обраќањето пред присутните, Филипче прача дека бошњачката заедница е нераскинлив дел од општеството и има значаен придонес во развојот и напредокот на Северна Македонија.
„Граѓаните Бошњаци по измените на Уставот од 2001 година, станаа дел од преамбулата и на нашиот Устав. Со нивната традиција, како составен и нераскинлив дел од нашето мултиетничко општество, имаат значаен придонес во развојот и напредокот на државата. Бошњачката заедница во Северна Македонија активно се вклучи во успешниот концепт „Едно општество за сите“, со кој Северна Македонија сега е пример во Ервопа и регионот за дијалог, меѓусебно разбирање и почитување“, рече Филипче.
Воедно, претседателот на СДСМ, Филипче ја потенцираше важноста на Странката на демократска акција на Македонија (СДА), која како коалициски партнер на СДСМ, изминативе години даде поддршка на развојните политиките во периодот на Владата на СДСМ.
„Во основното образование за учениците Бошњаци се врати редовната настава на босански јазик, Северна Македонија и Босна и Херцеговина потпишаа серија на билатерални договори во интерес на граѓаните,Скопје и Сараево станаа збратимени градови. Со својата прогресивна идеологија во изминатите години, СДА активно учествуваше во сите процеси кои ја придвижија државата напред, како што е членството во НАТО и започнувањето на преговорите со Европската Унија“, рече Филипче, додавајќи дека токму тоа и е разликата СДСМ и актуелната власт .
Филипче во своето обраќање нагласи дека СДСМ и СДА и во иднина ќе делуваат заеднички и ќе се залагаат за соживот,меѓусебна почит и интеграција на државата.
„ За жал деновиве сме сведоци на едни политики кои ја враќаат државата назад во изолација, нешто за што граѓаните не гласаа. И тоа не смееме да го дозволиме, не смееме да се откажеме од европскиот пат, од европска иднина за нашите граѓани. СДСМ и СДА и понатаму ќе продолжат да делуваат заеднички, ќе се залагаме за демократските вредности и инклузија на сите заедници, за интеграција, а не за изолација на државата“, порача претседателот на СДСМ, Венко Филипче.
Македонија
Промена на времето: УХМР за утре најавува дожд, силен ветер и драстичен пад на температурите
Управата за хидрометеоролошки работи најавува значителна промена на времето утре – дожд, засилен ветер и пад на температурата.
Утре под влијание на влажна и постудена воздушна маса од север ќе настапи позначителна промена на времето. Од утринските часови најпрвин во северните делови, ќе има повремени врнежи од дожд и локална појава на грмежи. Ќе дува силен ветер (наместа над 70км/ч.) кој ќе продолжи и во понеделник.
ИЗВОР: УХМР
Дневната температура значително ќе се намали (утре за 6 до 8, а во понеделник уште за дополнителни 4 до 6 степени). Потоа во следните два дена времето ќе биде сончево со ниски утрински температури, а дневните ќе бидат во пораст.
Во Скопје, утре ќе има повремени врнежи од дожд, локално со појава на ретки грмежи и силен ветер.
Од четврток се очекуваат нови врнежи од дожд.
Македонија
Претседателката Сиљановска Давкова се сретна со генералниот секретар на Советот на Европа, Алан Берсе
Претседателката Гордана Сиљановска Давкова во рамки учеството на 79. Генерално Собрание на Обединетите Нации во Њујорк, оствари средба со генералниот секретар на Советот на Европа, Алан Берсе.
На средбата беа разменети мислења за целите и приоритетите насочени кон демократизацијата на македонското општество, човековите права и владеењето на правото. Реафирмирајќи ја посветеноста за натамошна конструктивна соработка со Советот на Европа, претседателката Сиљановска Давкова изрази задоволство од континураната поддршка за нашето целосно усогласување со европските стандарди и вредности.
Претседателката Сиљановска Давкова ја нагласи важноста од кредибилно постапување на Европската Унија во однос на интеграцијата на земјите од Западен Балкан кога напредокот на поединечните кандидати е евидентно заслужен. Таа се осврна и на неопходното обезбедување усогласеност со обврските што земјите-членки ги презеле, вклучително и правилното спроведување на пресудите на Судот во Стразбур.
Соговорниците разговараа и за актуелните безбедносни состојби во Европа, со акцент на војната во Украина, како и за потребата од посветеност и заеднички пристап кон сегашните и идните предизвици какви што се влијанието на новите технологии и климатските промени врз човечките ресурси.
На средбата претседателката Сиљановска Давкова упати честитки до новоизбраниот генерален секретар на Советот на Европа, Алан Берсе, изразувајќи искрени желби за успешно исполнување на важната мисија и продолжување на плодната соработка со македонските институции.