Граѓанските активисти Павле Богоевски, Ивана Туфегџиќ, Ирена Стефковска, најдоа место на кандидатските листи за пратеници на опозициската СДСМ, но не изостанааа и интелектуалците што ги најави лидерот Зоран Заев, па така на листите може да се видат имињата на професорот Ферид Мухиќ и Ѓулмсер Касапи.

Во предлогот на кандидатски листи за изборите на 11-ти декември, кој Извршниот одбор на СДСМ денеска ќе му го достави на Централниот одбор на партијата, за носител на првата изборна единица е предложен Стево Пендаровски, поранешен претседателски кандидат на СДСМ. По него следуваат Рената Дескоска, партискиот потпретседател Дамјан Манчевски и Стефан Богоев, претседател на социјалдемократската младина. На оваа листа има и двајца претставници од Коaлицијата со граѓаните па така на петтото место е предложен граѓанскиот активист Павле Богоевски, а на деветото Ивана Туфегџиќ.

За носител на листата во втората изборна единици е предложен Генералниот секретар на партијата, Оливер Спасовски, а зад него е партиската потпретседателка Фросина Ременски и на третата позиција Мухамед Зекири. Четвртото место е резервирано за коалициски партнер, а на петтото место е предложен професорот Ферид Мухиќ од Коалиција со граѓаните.

Во третата изборна единица за носител на кандидатската листа е предложен дополнителниот заменик министер за земјоделство, Љупчо Николовски, а зад него се партиските колеги Благој Бочварски и Јагода Шахпаска.

Зоран Заев, претседателот на партијата е предложен за носител на листата во четвртата изборна единица, а по него следат Хари Локвенец и Катерина Кузмановска. Сепак, тука го нема координаторот на пратеничката група на СДСМ во претходниот парламентарен состав, Горан Сугарески.

Заменик-претседателката на СДСМ, Радмила Шеќеринска, ја предводи листата во петтата изборна единица, а зад неа е партискиот потпретседател Александар Кирацовски. На шестата позиција на оваа листа е предложена Ирена Стефковска од Коалиција со граѓаните.

Во шестата единица за носител на листата е предложен портпаролот на СДСМ, Петре Шилегов, а на втората позиција Ѓулмсер Касапи од Коалиција со граѓаните.

За сите овие предлози треба да расправа Централниот одбор на партијата, по што конечната одлука треба да биде потврдена на 21-от Конгрес на СДСМ, кој почнува во 14 часот во хотелот „Александар Палас“ во Скопје./крај/мф