Некој влијаел врз обвинителството да го смени мислењето и да покрене обвинение за Вељаноски за случувањата од 27 април 2017, рече Антонијо Милошоски од ВМРО-ДПМНЕ на распрвата за имунитетот на поранешниот претседател на Собранието, во рамки на Комисијата за деловнички и мандатно-имунитетни прашања.

Тој додаде дека власта е во спрега со обвинителството и притворот го претвора во казна наместо мерка за претпазливост, за тепање и малтретирање и понижување, алудирајќи на вчерашните случувања во затворот во Шуто Оризари.

Милошоски обвини дека се прави пресметка со политички противници, нарачки за одземање имунитети и притвори за тепање на поранешни министри.

„Ова е нарачан случај за власта да ги прикрие своите неспособности. Собранието да покаже дигнитет и да ги надмине нарачките на власата, односно да не се одземе имунитетот“, побара Милошоски.

Не сме тука да ги цениме околностите што ви се товарат за обвинението, туку да расправаме за барањето дали да ви се одземе имунитетот, му рече Павле Богоевски на пратеникот Трајко Вељаноски за време на седницата на Комисијата за деловнички и мандатно-имунитетни прашања.

„Убаво ја опишавте хронологијата на настаните за конститутивната седница, но не може да ме убедите дека од декември до април има само еден месец. Со траењето на седницата 4 месеци ризикуваме да се блокира цела држава. Според мене, треба да пстапиме како во сите други случаи кога суд барал одземање имунитет. Да се заврши постапката во суд, а не други институции да се користат во политички цели“, рече Богоевски.

Вељаноски возврати дека треба да има дискусија, а не собранието само како нотаријат да псотапува со удирање еден печат на барањето од судот.

Министерството за внатрешни работи ги отфрла пишувањата по социјалните мрежи дека им биле вадени органите на лицата кои изминативе денови беа пријавени за исчезнати, а потоа пронајдени мртви. Според МВР, станува збор за лаги и измислици на неодговорни поединци кои ги споделуваат на социјалните мрежи за да предизвикаат паника кај граѓаните.

„Целосно ги демантираме лагите и измислиците што неодговорни поединци ги шират по социјалните мрежи со цел да предизвикаат паника кај граѓаните. МВР ја гарантира безбедноста на граѓаните. Апсолутна лага е дека имало некакво вадење органи или некакви слични дезинформации. Апелираме до медиумите и јавноста да се повикуваат на официјалните податоци на институциите и да се воздржат од шпекулации што можат да ја вознемират јавноста. Статистичките податоци покажуваат дека не постои тренд на пораст во исчезнувањата, и дека во континуитет во последниве пет години пронаоѓањето на пријавените исчезнати лица се реализира со околу 94% . Апелираме уште еднаш за воздржување од шпекулации кои неосновано ја вознемируваат јавноста“, велат од МВР.

Оттаму додаваат дека ќе преземат мерки против лицата кои ги шират ваквите вести со намера да ја вознемират јавноста.