Градоначалничката на град Скопје, Данела Арсовска, заедно со градоначалникот на општина Гази Баба, Бобан Стефковски, и директорот на ЈП „Паркови и зеленило“, Ангеле Сотировски, извршија увид во почнувањето на изградбата на нов зелен плоштад и парк во населбата Ченто во општина Гази Баба.

Арсовска истакна дека во согласност со програмата за модерно Скопје, воспоставувањето нови зелени површини и нови паркови е еден од приоритетите во работата на Град Скопје, а граѓаните на овој дел од општината првпат ќе добијат модерен парк и нови уредени зелени површини.

„Во согласност со програмата за модерно Скопје и воспоставување нови зелени површини на територијата на градот Скопје, денеска почнуваме со хортикултурно уредување на јавна површина, нов зелен плоштад на улицата Јужноморавски бригади во населбата Ченто, нов парк за над 20.000 жители на овој дел од општината, кој ќе биде уреден на површина од 5.000 квадратни метри“, истакна Арсовска.

Директорот на ЈП „Паркови и зеленило“, Ангеле Сотировски, истакна дека на иницијатива на градоначалничката екипите на јавното претпријатие веќе се почнати со целосно расчистување на теренот.

„Екипите на ЈП ‘Паркови и зеленило’ веќе почнаа со целосно расчистување на теренот, а во следниот период ќе се пристапи кон рамнење на почвата, како и пополнување на површината со квалитетна почва, спроведување систем за полевање и подготовка на почвата за садење дрвја и вегетација, а се предвидува и флористичко збогатување на просторот“, вели Сотировски.

Градоначалникот на општина Гази Баба, Бобан Стефковски, истакна благодарност до градоначалничката на град Скопје за напорите што ги вложува за нови проекти во општината Гази Баба, кои се секогаш поздравени и во интерес на граѓаните, како и тоа дека жителите на Ченто првпат ќе добијат ваков нов зелен простор.

„Благодарност до градоначалничката на град Скопје за напорите што ги вложува Град Скопје за нови проекти во општина Гази Баба, соработката со Градот е поздравена и е во интерес за граѓаните на општина Гази Баба. Ова место, кое претходно беше неуредно и полно со шут и ѓубре, сега жителите на населбата Ченто со овој проект првпат по населувањето на оваа населба, ќе добијат нов зелен плоштад и уреден простор за одмор, спорт и рекреација“, истакна Стефковски.

Општина Центар многу бргу ќе почне со изградба на првата детска градинка во населба Пролет, на вкупна бруто-површина од 3.276 метри квадратни, со што ќе биде една од најголемите детски градинки во државата, најавуваат од таму.

За таа цел, како што појаснуваат, во наредните денови ЈП „Паркови и зеленило“ по налог на Општината ќе отстрани 4 дрвја (2 копривки, липа и софора), со кои ќе се ослободи простор и ќе се овозможи изградба на градинката. Дополнително, со помош на специјална механизација, ќе бидат пресадени уште 4 јасени во парцелата на која ќе се гради градинката.

На местото на отстранетите дрвја, Општина Центар, како што додаваат од таму, ќе засади нови 20 висококалемени садници од видот јавор (Acer campestre) и друг вид средно и ниско зеленило, кое на просторот околу објектот на градинката ќе му даде нова свежина и нов лик.

По завршувањето на градежните активности поврзани со новата градинка, ќе се добие зелена површина на речиси 2.000 квадратни метри, со што Општината ќе ја заштити животната средина, а овој простор ќе стане ново зелено катче во населбата Пролет.

„Детската градинка, која набргу ќе почне со изведба, е првата целосно нова градинка што ќе се гради во Општина Центар по повеќе од 50 години, прва воопшто во населбата Пролет, а децата од оваа населба ќе добијат нов, современ и квалитетен објект за престој, забава и другарување“, велат од Општината.

Јавното сообраќајно претпријатие – Скопје соопшти дека од 10 до 12 часот, во случај на блокада на раскрсницата кај Домот на печатот, дел од линиите од јавниот превоз ќе сообраќаат по изменет режим од вообичаениот.

По изменети траси ќе сообраќаат следниве линии:

Линиите 3, 3А, 3Б, 50 и 50А

· Во насока од Рекорд кон Домот на печатот, на раскрсницата на улицата Димитрие Чуповски и булеварот Климент Охридски, ќе продолжуваат право по улицата Митрополит Теодосиј Гологанов, кај „Треска“ ќе вртат лево по улицата Франклин Рузвелт, па лево по улицата Васил Ѓоргов, десно по булеварот Мајка Тереза до Клиничкиот центар и „Панорама“;

· Во обратна насока, по булеварот Мајка Тереза кон центар, ќе вртат десно по улицата Јордан Мијалков, кај „Неуромедика“ ќе вртат лево по Јужен булевар до раскрсницата кај Тутунски комбинат, потоа лево по улицата 11 Октомври и ќе продолжуваат по своите вообичаени траси.

Линиитр 23, 27, 33, 41А, 43, 44 и 57А

· Во насока од Рекорд кон Клиничкиот центар, на раскрсницата на улицата Димитрие Чуповски и булеварот Климент Охридски, ќе продолжуваат право по улицата Митрополит Теодосиј Гологанов, на кружниот тек кај Католичката црква ќе се враќаат назад на постојката кај АМСМ, таа ќе биде почетно/крајна постојка за овие линии;

· Во обратна насока, од постојката кај АМСМ по улицата Митрополит Теодосиј Гологанов кон Рекорд и ќе продолжуваат по своите вообичаени траси.

Линија 5

· Во насока од Рекорд кон Козле, на раскрсницата помеѓу улицата Димитрие Чуповски и булеварот Климент Охридски, ќе продолжува право по улицата Митрополит Теодосиј Гологанов, кај „Треска“ ќе врти лево по улицата Франклин Рузвелт, десно по улицата Васил Ѓоргов и ќе продолжува до Козле;

· Во обратна насока, ќе сообраќа по истата изменета траса.

Линија 5 А

· Во насока на Клинички центар, на кружниот тек кај Католичката црква ќе се враќа назад и почетно/крајна постојка ќе биде на првата постојка кон Ѓорче Петров.

Линија 9

· Во насока на Клинички центар, по постојката кај „Југодрво“ ќе врти десно на улицата 11 Октомври до Рекорд, кај раскрсницата помеѓу улицата Димитрие Чуповски и булеварот Климент Охридски, ќе продолжува право по улицата Митрополит Теодосиј Гологанов, кај „Треска“ ќе врти лево по улицата Франклин Рузвелт, па лево по улицата Васил Ѓоргов, десно по булеварот Мајка Тереза до Клиничкиот центар;

· Во обратна насока, ќе сообраќа по истата изменета траса.