„Наместо да одговори на јавно поставените прашања за распродажба на градежно земјиште по багателни почетни 2.000 денари за метар квадратен, Општина Аеродром со дефокусирање и спинови се обидува да ја изврти реалноста. Јавноста не доби одговор дали позади оваа зделка стојат директно Министерот за Транспорт Александар Николовски и Министерот за Спорт Борко Ристовски?“, вели Марко Даниловски, советник од СДСМ во Општина Аеродром.

„Не слушнавме ни зошто за земјиште што вреди багателни почетни 2.000 денари по метар квадратен се бара банкарска гаранција од 2 милиони евра?

Не одговорија ни дали ќе никне уште еден комерцијално деловен објект веднаш до Хотел Русија?

Додека чекаме одговори на овие прашања, на Митески ќе му поставиме и нови прашања:

Зошто во објавата за електронска аукција за продажба на ова земјиште покрај основната намена Д3 – спорт и спортски објекти, наведени се и компатибилните Б намени за комерцијално-деловни објекти и А4 намената која се однесува на објекти за времен престој како мотели, хостели, пансиони, згради со апартмани и слично?

Дали тоа некој свесно ставајќи ја намената Д3 за спорт и рекреација како основна се обидува да добие пониска почетна цена на земјиштето?

Дали под превезот на спорски објекти Аеродром треба да добие нов хотел, мотел или зграда со апартмани?

Уште еднаш го повикуваме Митески наместо да се крие зад соопштенијата на својот тим за пропаганда и да одговори на сите прашања кои му ги поставивме.

ВМРО-ОКГ во Аеродром е фатена на дело. Граѓаните бараат одговори и итно прекинување на распродажбата на градежно земјиште по багателни цени“, соопшти Марко Даниловски, советник во Општина Аеродром.

Градоначалникот на Општина Илинден, Александар Георгиевски, ги прими учениците од општинските основни училишта кои во текот на учебната година постигнаа значајни резултати на државни натпревари и освоија високи пласмани во различни области.

На приемот, градоначалникот им упати искрени честитки на наградените ученици и на нивните ментори за вложениот труд, посветеност и остварените успеси, нагласувајќи дека нивните достигнувања претставуваат гордост за целата општина. Тој истакна дека Општина Илинден и понатаму ќе продолжи да ги поддржува и мотивира младите таленти, препознавајќи го знаењето како најзначајна инвестиција во иднината, извести Општината.

По тој повод, на учениците и нивните наставници – ментори им беа доделени признанија како знак на благодарност и почит за нивните исклучителни резултати. Признанијата претставуваат поттик за понатамошен развој и афирмација на знаењето, креативноста и натпреварувачкиот дух кај младите.

Наградените ученици остварија забележителни успеси на државни натпревари по повеќе наставни предмети и области, што го потврдува високиот квалитет на образовниот процес во училиштата на територија на општина Илинден, се наведува во соопштението.

Во рамки на 14-та седница со одлука на Советот на Општина Карпош, локалната самоуправа им доделува еднократна парична помош на четири семејства, чии најблиски членови загинаа во сообраќајната несреќа на скопската обиколница, која се случи кон крајот на минатиот месец.

Општина Карпош изрази искрено жалење за овој трагичен настан и како израз на солидарност кон семејствата, им доделува парична помош во износ од 100.000 денари за секое починато лице.

На денешната седница беа разгледувани и останатите осум точки кои се најдоа на дневниот ред. Во таа насока советниците ги поддржаа измените и дополнувањата на Програма од областа на детската, социјалната и здравствената заштита, а соодветни корекции претрпе и Програмата за образование за 2026 година, извести Општината.

„Мнозински консензус беше постигнат и за Предлог – Одлуката со која се утврдуваат правилата, во процесот на примена и спроведување на урбанистичките планови. Целта на оваа измена е усогласување со законските и подзаконските акти, како и заштита на јавниот интерес, подобрување на урбаната функционалност и спречување на инфраструктурното преоптоварување.

Советниците ја поддржаа Одлуката, со која локалната самоуправа спогодбено ќе преземе административен службеник, кој ќе работи на позиција раководител на Одделение за човечки ресурси во Општина Карпош. Советот даде „зелено светло“ и за Предлог – Одлуката со која се определуваат начинот и условите за давање на користење на училишниот простор, училишните кујни, трпезарии и други подвижни ствари во десетте основни училишта на територија на Карпош, како и овластување за нивно располагање. Со оваа Одлука, Општина Карпош како основач на општинските основни училишта, им го дава на користење училишниот простор кој се наоѓа во објектите на училиштата и во рамки на градежните парцели на училишните установи, како и право на управување и располагање, согласно закон и одредбите од оваа Одлука.

Позитивен епилог доживеа и Решението за разрешување на член во Управниот одбор на детската градинка „Пролет“. Имено, советниците го изгласаа Решението со кое поради престанок на мандат се разрешува член на Управниот одбор на ЈУОДГ „Пролет“ од редот на родителите, а на негово место е именуван и верификуван е нов член на Управниот одбор, кој исто така е претставник на родителите.

Со одлука на Советот, Општина Карпош ја прифаќа донацијата од Друштвото за градежништво, трговија и услуги МИЛЕНИУМ ТИМ ДОО Скопје, во висина од 1.383.409 денари. Станува збор за изработка на основен проект за улична фекална канализација со димензии Ф300мм, на ул.Франц Прешерн во населба Влае. Проектот го изработи фирмата ИПМ Стил Дооел Куманово, со ревизија на основен проект кој е заверен од ЈП Водовод и канализација Скопје и изведба на уличната фекална канализација Ф300 предвидена со проектот.

Советниците ја изгласаа Одлуката за донација од Фондацијата д-р Верица Механџиска, во вид на опремување на сензорна соба во ООУ „Лазо Трповски“. Со оваа донација директно се влијае врз подобрување на условите за работа, развој, едукација, рехабилитација и инклузија на децата со пречки во развојот“, се наведува во соопштението на Општина Карпош.