„Сакаме да ве известиме дека нашите барања за спас на ноќниот живот во Скопје најдоа слух кај надлежните институции и во заедничка координација со сите служби најдовме решение и од денес можеме да прогласиме дека Скопје живее повторно, младите во Скопје ќе имаат каде да се забавуваат и социјализираат“, се вели во соопштението од Здружението на летните ноќни клубови на Скопје.

„Изразуваме голема благодарност до медиумите, јавноста, градоначалничката на град Скопје – Данела Арсовска, Советот на Град Скопје, министерот Оливер Спасовски заедно со Секторот за внатрешни работи на Скопје и министерот за економија, Крешник Бектеши, кои придонесоа да добиеме дозволи за работа за 2022 година и ни овозможија како и во минатите 30 години да им понудиме на младите во Скопје ноќен живот по полноќ“, велат оттаму.

Од Здружението истакнуваат дека „младите во Скопје ќе ја имаат истата можност како младите во Македонија и во светот да се забавуваат, да се социјализираат во нормални и безбедни услови во летните ноќни клубови“.

Градоначалникот на општина Гази Баба, Бобан Стефковски, во објава на официјалната страна на „Фејсбук“ ги информира граѓаните за воведувањето на новиот мониторинг-систем за службените возила на Општина Гази Баба. Во објавата градоначалникот Стефковски напиша:

„Воведен е 24-часовен мониторинг-систем на движењето на службените возила на Општина Гази Баба.

Со цел рационално искористување на општинските ресурси воведен е мониторинг-систем на движењето на службените возила.

Во Општина Гази Баба се работи чесно и домаќински!

Овој систем произлезе како барање на граѓаните, кои во минатото биле сведоци на злоупотреба на службените возила.

Нема веќе користење на службените возила за приватни цели.

На крајот од работниот ден сите службени возила се оставаат на паркингот пред Општината.
Градоначалникот и општинската администрација се во Општината за да им служат на граѓаните, а не да вршат злоупотреба на ресурсите!“, напиша Стефковски.

Здравјето и добросостојбата на нашите деца е еден од врвните приоритети во работата на Општина Центар и на градоначалникот Горан Герасимовски. Во таа насока Општина Центар неделава почна со поставување заштитни нанофилтри на прозорците на сите 11 детски градинки под надлежност на Општината.

Досега филтри се поставени на матичниот објект на детската градинка „Кочо Рацин“, на прозорците на објектот „Наум Наумовски-Борче“ од истата градинка, а во текот на наредните денови исти такви филтри ќе се постават и на другите 9 објејкти на општинските детски градинки.

Филтрите имаат цел да дејствуваат против ПМ-честичките и штетните надворешни влијанија, кои се особено изразени во зимскиот период. Со поставувањето на филтрите во голема мера се намалува изложеноста на децата на ПМ 10, ПМ 5 и ПМ 2,5-честичките, воедно спречувајќи го загадувањето на амбиенталниот воздух и на просториите во градинките.

Нанофилтрите се изработени од еколошки и биоразградливи материјали, не нанесуваат штета на здравјето на децата и вработените и не ја загадуваат животната средина.