Владата предводена од ВМРО-ДПМНЕ уште еднаш ги излажа граѓаните – нов клинички центар во Скопје нема да се гради. По години блокирање на проектот за изградба на современ клинички центар, кој беше инициран од претходната Влада на СДСМ, и покрај понудата да учествуваат и го контролираат проектот, сега признаа дека новиот Клинички центар нема да стане реалност, велат од СДСМ.

„Ветувањата за изградба на модерен клинички центар, кои ги повторуваа на прес-конференции и во изјави, беа само празни зборови. Попусто се обидуваа да ја манипулираат јавноста – граѓаните сега го гледаат нивниот неуспех и недостигот од визија за здравствениот систем.

Проширувањето на услугите во болницата „8 Септември“ или таканаречената регионализација не може да ја замени потребата од нов модерен клинички центар. Тој е неопходен за да се обезбеди интегрирана и квалитетна здравствена услуга на едно место, како што функционираат современите здравствени системи во европските земји. Концептот што го предлагаше СДСМ, а кој ВМРО-ДПМНЕ целосно го блокираше, ќе овозможеше пациентите да добиваат сè што им е потребно на едно место, без да бидат принудени да шетаат од клиника на клиника“.

Но, ВМРО-ДПМНЕ повторно докажува, додаваат од таму, дека нема визија за здравството и дека целосно недостасува капацитет за менаџирање на овој клучен сектор. Граѓаните, како што додаваат, се соочуваат со хаос во здравството: недостиг на основни лекови на повеќе клиники, зголемување на листите на чекање кои СДСМ ги намали за време на своето владеење и лошо менаџирање од страна на неспособните директори поставени од оваа власт.

„Имаме секојдневни немили настани каде умираат деца на клиниките и нема одговорност за ниедна случај, а нема ни лекови на Онкологија“.

СДСМ ги предупредува граѓаните дека со оваа Влада здравството само ќе продолжи да пропаѓа.

„Време е за одговорност, време е за Владата да ги исполни своите ветувања и да ги стави здравствените потреби на граѓаните на прво место, наместо да ја уништува иднината на македонскиот здравствен систем“.

Резултатите од годишниот извештај на „Транспаренси интернешнл“ се уште еден доказ за неспособноста и неуспехот на Владата предводена од ДПМНЕ. Македонија бележи катастрофален пад од 12 места во Индексот за корупцијата за 2024 година, што претставува прво назадување на нашата држава од 2019 година, велат од СДСМ.

„Оваа Влада ветуваше „беспоштедна борба против корупцијата“, но за само осум месеци успеа да ја доведе Македонија до најслабата позиција на скалата во последните пет години. Со падот на два поени и рангирањето на 88 место, граѓаните јасно покажуваат дека немаат доверба во нивните политики и дека корупцијата е полоша од било кога. Додека соседните земји, како Албанија и Косово, прават сериозни чекори напред – Албанија е осум места пред нас, а Косово дури петнаесет – Македонија под оваа Влада се движи наназад“, посочуваат од СДСМ.

Како што истакнуваат, СДСМ за време на своето владеење ја зацврсти позицијата на Македонија во борбата против корупцијата, овозможувајќи континуирано напредување на индексот од 2019 до 2023 година.

„За разлика од тоа, Владата на ДПМНЕ го врати нашиот рејтинг наназад, а земјата ја ставија во групата на најкорумпирани држави во Европа. Одговорноста за овој неуспех е кај Владата, наместо да ја лаже јавноста со празни ветувања и пропаганда треба да покаже системски мерки и реформи за борба со корупцијата. СДСМ останува цврсто посветен на борбата против корупцијата и изградбата на институции кои ќе служат на граѓаните, а не на партиските интереси“, завршуваат од СДСМ.

По извршената ревизија на финансиските извештаи заедно со ревизијата на усогласеност на Централен регистар на Република Северна Македонија, за 2023 година, Државниот завод за ревизија изразува неповолно мислење во однос на вистинитоста и објективноста на финансиските извештаи и мислење со резерва за усогласеноста на финансиските трансакции со релевантната законска регулатива.

Со извршената ревизија, според објавеното, утврдена е несоодветно воспоставена сметководствена евиденција на дел од градежните објекти со набавна вредност од 186.635 илјади денари, кои на Централен регистар, му се доделени со извршената трансформација на поранешниот Завод за платен промет. Причина за оваа состојба е несоодветниот третман на градежните објекти како државна поддршка, што влијае на искажаните податоци во финансиските извештаи.

Несоодветно евидентирање е утврдено и кај завршените вложувања во изградба и реконструкција на градежни објекти во износ од 15.185 илјади денари, за кои не се преземени активности за ставање во употреба, иако Централен регистар објектите ги има во владение и поседува имотен лист.

И по изминати пет години откако е набавен мебел со вредност од 1.360 илјади денари, истиот не е ставен во употреба, поради што постои ризик да се оштети и да изгуби од својот квалитет.

Ревизорите утврдиле дека во деловните книги не е евидентирано земјиштето на кое е изграден административниот објект Палата „Лазар Поп Трајков“ и кое со Одлука на Владата во 2013 година е доделено на трајно користење на шесте државни институции. За ова земјиште по завршување на ревизијата, законскиот застапник презел активности и истото е воведено во евиденцијата на Централен регистар.

Извршена е продажба на патнички моторни возила без да се обезбеди согласност од Владата, со примена на интерен Правилник, кој не е усогласен со постапка за отуѓување предвидена во Законот за користење и располагање со стварите во државна сопственост и со стварите во општинска сопственост.

Во 2023 година, Централниот регистар оствари приходи од 367.738 илјади денари за извршените услуги поврзани со упис, обработка и дистрибуција на податоци, при што за овие услуги наплатува соодветен надоместок утврден со Тарифа од Управниот одбор, по согласност од Владата. Меѓутоа, ревизијата утврди дека податоците за бројот и видот на извршените услуги не се во согласност со искажаните приходи во сметководствената евиденција, што ја доведува во прашање точноста и целосноста на прикажаните приходи. Главни причини за ова се недостаток на софтверско решение за поврзување на извршените услуги со наплатениот надоместок, отсуство на контроли при евидентирањето на приходите и примената на попусти или бесплатни услуги во одредени случаи.

Во извештајот ревизорите известуваат за несервисираната обврска за долгорочен стоков кредит во износ од 1,4 милиони евра, односно 86.093 илјади денари, која произлегува од Договор од 2007 година склучен со Министерството за економија, за користење на дел од средства одобрени од Меѓународната банка за обнова и развој, во рамки на Проектот за реформа на деловното опкружување и институционално зајакнување, кој требало да биде отплатен заклучно со октомври 2021 година. По насоки од Владата, во 2020 година формирана била работна група за утврдување на статусот и третманот на обврската, но сѐ уште не е донесен конкретен заклучок за постапување.

Исто така утврдени се неусогласености на одредбите од Законот за Централен регистар и Законот за административни службеници во делот на пресметка на платите на вработените административни службеници. Утврдени се и неправилности во спроведувањето на постапките за вработување на административни службеници.

Постојат законски недоречености во однос на дефинирање на статусот на Централен регистар на Република Северна Македонија, определување на вредност на основна главнина, прецизно назначување на носител на право на сопственост (основач) и начинот на финансиското известување, кои влијаат врз начинот на вршење на дејноста.

Во извештајот е истакнато дека три од воспоставените регистри и тоа: регистар на задолжници, фидуцијарен регистар и регистар за продажба на подвижни ствари со задржување на право на сопственост не функционираат во пракса и од истите не се остваруваат приходи и покрај тоа што има создадени технички можности и услови за нивно користење.

Како причина за нефункционирањето на овие регистри се наведува неприменувањето на задолжница/договори за обезбедување на побарувања во должничко доверителските односи во пракса.

Констатирани се и други состојби, неправилности и неусогласености од различна природа кои се однесуваат на: нецелосно извршен попис на средствата и обврските, несоодветно пресметување на амортизација на средствата, не преземени активности за законско отуѓување на расходуваните средства, иако истите се отстранети од сметководствената евиденција, не е воспоставено следење на имплементацијата на проектите согласно донесената Стратегија за развој 2023 – 2027 година.

За надминување на констатираните состојби дадени се препораки со цел преземање на мерки и активности од надлежните лица и органи во функција на подобрување на состојбите.