Ова е трета седница по ред на советнички прашања како што градоначалничката Арсовска не е присутна. Шест месеци таа не е присутна на советнички прашања, ниту на која било седница на овој Совет на Град Скопје, вели координаторката на советничката група на ВМРО-ДПМНЕ и коалицијата во Советот на Град Скопје на денешната седница за советнички прашања, на која повторно не е присутна градоначалничката Данела Арсовска.

Андоновска посочи дека има повеќе од 50-ина прашања од граѓани што во овие шест месеци ги собрала од средбите со граѓани, а нема како да ѝ ги постави на градоначалничката, освен на овие седници и на седниците што се предвидени за советнички прашања.

„Тоа не се мои лични прашања, тоа се прашања на граѓаните и таа како градоначалник избрана од граѓаните има одговорност и должност да биде присутна тука за да можеме да ѝ ги поставиме овие прашања и граѓаните да добијат одговор. Ако таа не чувствува одговорност од оние што ја избрале, тогаш како мисли да формира партија и да ги бара гласовите од оние на кои не им одговара со месеци“, истакна Андоновска.

Додаде дека на овие седници исто така се носат одлуки што имаат финансиски импликации, кои се пари на граѓаните, а од друга страна, ниту Советот ниту граѓаните имаат информации каде завршуваат овие народни средства, а градоначалничката никаде ја нема за да даде одговор.

„На овие седници се носат одлуки, тие одлуки имаат финансиски импликации, тие пари што ги предвидуваат одлуките, доколку бидат донесени, треба да се излеат од градската каса. Тие пари не се ниту мои, ниту на Арсовска, ниту ваши, тоа се пари на граѓаните. За ние да ја донесеме таа одлука, мора да дебатираме, мора да ги вкрстиме аргументите и да донесеме најсоодветна и најправилна одлука. Ние како Совет немаме информации каде завршуваат овие средства ниту, пак, можеме да дадеме поддршка од причина што овие пари не се наши лични, туку се пари на граѓаните. Ако истата оваа градоначалничка не го чувствува тоа што јас го зборувам сега како факт, тогаш не знам зошто сè уште седи и ја држи позицијата и го блокира Скопје“, истакна Андоновска.

Андоновска го замоли претседателот на Советот, Трајко Славески, да им одговори дали има услови денеска да се одржи оваа седница и да дојде градоначалничката да им одговори на прашањата на граѓаните.

„Доколку тоа не е така, барам седницата да не се затвори, како што не се затворени претходните две, туку да се одреди друг ден за да продолжи оваа седница, т.е. не оваа, туку онаа пред шест месеци што ја имавме, исто така за советнички прашања, и да почнеме да ги реализираме седниците за советнички прашања онака како што треба, со присуство на градоначалник, со присуство на директорите и да може граѓаните да добијат одговор за сето она што ги засега“, потенцира Андоновска.