И покрај утврдените неправилности и отворениот предмет во Јавното обвинителство за општа опасност, „Зимзоленд“ во Општина Аеродром и понатаму работи, реагираат од Левицата.

„Наместо итна реакција, градоначалникот се крие зад процедури и рокови и ја префрла одговорноста. Во меѓувреме, безбедноста на граѓаните, а пред сè на децата, е занемарена“, иостакна Горан Костовски, советник од Левица на прес конференција.

Според него законот е јасен: кога постои опасност, објектот мора веднаш да се затвори. „Но очигледно, како што вели, за градоначалникот Митески ова не важи.

„И покрај констатираните пропусти од повеќе инспекции, Градот Скопје и јавните предупредувања, досега нема ниту една конкретна мерка за затворање или отстранување на опасните реквизити“, рече тој.

Советниците од Левица јавно побараа општината да делува, но како што велат добиле само празни уверувања дека „процедурата е во тек“.

„Прашањето е едноставно: дали институциите ќе реагираат навреме или повторно ќе чекаат трагедија за да преземат одговорност?“, истакнува Костовски.

Левицата предупредува дека најавите за ново раководство во Зоолошката градина во Скопје претставуваат уште еден алармантен пример за тоа како градската власт ја сфаќа одговорноста кон јавните институции – како партиски ресурс, коалициски плен, места за негување хирови и амбиции на партиски кадри.

„Откога за в.д. директор на ЈП ‘Градски паркинг’, градоначалникот Ѓорѓиевски назначи лице што ВМРО-ДПМНЕ претходно го обвинуваше за сериозни злоупотреби, сега оди чекор подалеку, со намера на чело на Зоолошката градина да постави лице осудувано за кривично дело поврзано со животни.

Наместо транспарентна постапка, стручност и интегритет, сведочиме на обид за инсталирање лице со сериозно контроверзно минато на чело на установа, која со години е симбол на негрижа, скандали и трагични последици врз животните. Фактот дека станува збор за поранешен партиски функционер на ВМРО-ДПМНЕ, со судски утврдени дејства поврзани со измама со животни, отвора сериозни прашања за моралниот и етичкиот компас на градската власт, но и за мотивите зад ваквото назначување“.

Според оваа партија, по сите пцовисувања, извештаи за лоши услови, институционален хаос и целосна загуба на довербата кај јавноста, Зоолошката градина, како што додаваат, има потреба од радикална професионализација, „а не од политичка рехабилитација на кадри како Стево Ќирков (Стефан Кирков) со дамки во биографијата.

Во согласност со информациите, лицето Стево Ќирков неодамна било осудено на условна казна за измама со животни, односно за тоа што измамувал граѓани продавајќи им кучиња за 600 евра, без да им обезбеди педигре, иако претходно тоа било ветено. Во самата пресуда, врз основа на сведоштва, се наведува дека ова лице било познато и по други слични измами на повеќе лица. Дополнително, во 2021 година Ќирков издржува и три месеци затвор поради непокриени трошоци во друга судска постапка“.

Прашуваат дали против ова лице во моментот се води и друга истрага за кривично дело.

Бараат итно преиспитување на оваа намера од страна на Ѓорѓиевски.

„Јавниот интерес, безбедноста и благосостојбата на животните мора да бидат над партиските калкулации и амбициите на партиските другари“.

Граѓаните го видоа предавството на Македонија, овде, во Собранието и тоа во живо. Премиерот Мицкоски вчера побегна од пратеничките прашања. Побегна од вистината. Побегна од дебата за Резолуцијата на СДСМ со која јасно и недвосмислено се затвора прашањето за мигранти во Македонија, вели Александар Саша Димитријевиќ од СДСМ.

„Еден ден претходно замина за Брисел. Зошто? За да избега од прашањата и од дебата за Резолуцијата. Откако побегна премиерот, побегнаа и неговите министри. Затоа, во знак на протест против ваквото понижување на Собранието и на граѓаните, пратениците на СДСМ ја напуштија седницата. ДПМНЕ свесно и намерно побегна од расправа во највисокиот законодавен дом, меѓу избраните претставници на народот кои имаат уставна обврска да расправаат и да одлучуваат за најважните национални прашања“.

Резолуцијата на СДСМ, додава тој, не беше поднесена затоа што ДПМНЕ не дозволи ниту дебата, ниту разговор, ниту гласање.

СДСМ, нагласува Димитријевиќ, нема да биде соучесник во ова национално предавство, мигранти за пари.

„Нека си ја потпишат таа предавничка Резолуција сами. Нека си ја гласаат сами, заедно со колаборантите од ЗНАМ. Тие многу добро знаат што потпишуваат – предавство на Македонија. А знаат и што следува за предавство. Сега веќе на сите им е јасно: планот е прво избори, а потоа – мигранти во Македонија, за пари.СДСМ, заедно со граѓаните, ќе ги искористи сите демократски механизми за да се спротивстави на ова национално и државно предавство. Ова нема да им помине“.