Скопје
Герасимовски: Со граѓаните креираме буџет за подобра патна инфраструктура, современа спортска сала, нови паркинг-места

На завршниот Буџетски форум, организиран од oпштина Центар и одржан во ООУ „Јохан Хајнрих Песталоци“, граѓаните и општинската администрација ги дефинираа приоритетите за 2025 година.
Се дискутираше за нацрт-програмите за наредната година, тековните предизвици и потребите на граѓаните, а беа дадени предлози и сугестии кои ќе бидат вградени во новите програми и проекти.
„Со заеднички ангажман и соработка меѓу граѓаните и општинската администрација, транспарентно и отчетно ја градиме иднината на нашата општина“, истакна Герасимовски во обраќањето.
Во нацрт-предлог буџетот за наредната година, предвидено е 45% од средствата да бидат насочени кон капитални проекти, додека останатите 55% ќе се користат за тековно и оперативно функционирање на општината.
Градоначалникот Горан Герасимовски ги презентираше клучните приоритети од нацрт-развојната програма за наредната година:
– Изградба на катна гаража во Буњаковец – Гаражата ќе има капацитет од 300 паркинг места, распределени на два подземни и два надземни ката, со почитување на хуманото живеење на околните згради. Објектот ќе биде понизок од предвиденото во Деталниот урбанистички план.
– Модернизација на јавното осветлување – Со поставување на енергетски ефикасни ЛЕД светилки и паметни ормари, процесот ќе заврши до март 2025 година, со што ќе се постигне заштеда на енергија и подобрување на безбедноста.
– Изградба на нова општинска зграда – Комплексот ќе вклучува простор за администрација, подземен паркинг со капацитет од 300 паркинг места и 100 места за велосипеди. Конкурсот за идејни решенија е завршен, а наградените идеи ќе обезбедат современи услови за жителите и администрацијата.
– Реконструкција на сала Работнички – Првата фаза на реконструкцијата започна, а се очекува целосно завршување до летото 2025 година. Просторот ќе биде обновен според сите современи стандарди.
– Реконструкција на патната инфраструктура во Тасино Чешмиче и Капиштец, како и пренамена на улицата „Мирослав Крлежа“ во пешачка зона.
– Реконструкција на паркингот зад Домот на градежници и паркот во Клиничкиот блок, на барање на граѓаните, овие два проекти ќе бидат интегрирани во развојната програма.
Градоначалникот Герасимовски потенцираше дека сите предлози на граѓаните ќе бидат внимателно разгледани и интегрирани во финалната верзија на буџетот.
Седницата за усвојување на буџетот ќе се одржи на 27.12.2024 година.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Скопје
Град Скопје: Обвинителството го отвори првиот случај за дивоградбите во Чаир

Основното јавно обвинителство ја започна постапката по првата пријава за фалсификати поврзани со градби во Општина Чаир, информираа денеска од Град Скопје.
Според соопштението од прес-службата, истрагата се однесува на сомневања за фалсификување на документи и незаконска легализација, а се поврзува со поранешниот градоначалник на општината, Висар Ганиу.
„Основното јавно обвинителство ја започна постапката по првата пријава со фалсификатите. Таму веќе се водат уште две постапки претходно започнати за Висар Ганиу, првата за фалсификување на целата архивска книга со броеви и барања за легализации, а втората за уште еден случај каде што незаконски се легализирале објекти со соучесник“, стои во соопштението.
Од Град Скопје испратија и повик до Основното јавно обвинителство за гонење на организиран криминал и корупција, со барање конечно да започне постапка против, како што велат, „организираната криминална банда“ во Чаир.
„Очекуваме и Основното јавно обвинителство за гонење на организиран криминал и корупција да се одважи и да почне да постапува против организираната криминална банда во општина Чаир, која овозможувала градење незаконски на небезбедни згради со црни пари од нелегални извори“, велат од Град Скопје.
Во реакцијата се посочува и дека некои од лицата кои се појавуваат како сопственици на овие објекти сега се милионери, а официјално се прикажани како градители на зградите уште од пред 5, 6, 10, па и 11 години.
Скопје
Ѓорѓиевски: Уште една незаборавна ноќ во Кисела Вода, десетици илјади граѓани на концертот во Расадник

Со вистинска експлозија од енергија, ритам и емоции, синоќа помина третата вечер од Културното лето на Општина Кисела Вода, кое годинава се одвива под слоганот „Сѐ на свое место“. Расадник повторно беше полн со луѓе, откако десетици илјади граѓани се собраа за да прослават и да уживаат во една од најмасовните музички забави што се случиле во Скопје последниве години.
На сцената настапија популарните 2Бона, Некст Тајм и Слаткаристика, кои со своите хитовски песни ја дигнаа публиката на нозе. До доцна во ноќта одекнуваа добро познати рефрени, а атмосферата беше еуфорична, преполна со енергија и музика.
„Ова е само увертира за она што следува“
На настанот се обрати и градоначалникот Орце Ѓорѓиевски, кој не го криеше воодушевувањето од атмосферата и масовноста на публиката.
„Да кажам благодарам е малку. Јас ви се поклонувам, мој народе! Ова беше уште една одлична и една од најпосетените забави во Скопје изминатите години. Забава која ќе остане да се памети, а за тоа да биде така се потрудија неповторливите 2Бона, Некст Тајм и Слаткаристика. Ви се заблагодарувам на сите! Вие сте причината за ова што го работиме од срце, со елан и визија! И ова не е крај – ова само е увертира за она што следува!“, изјави Ѓорѓиевски.
Тој ги дувна и свеќичките на роденденската торта, честитајќи го празникот на општината.
Последна вечер со хумор и евергрини
Славењето продолжува и вечерва, повторно на истото место – Расадник, со последната вечер од богатата роденденска програма.
Од 20:30 часот ќе настапат стенд-ап комичарите Бојан Велевски и Маријан Георгиевски, а веднаш потоа ќе следува настап на Теа и 2 Exit, кои ќе понудат модерна изведба на македонски евергрини.
Скопје
(Видео) Повторно гори кај „Њу Стар“, пожарот се шири кон куќите во Визбегово

Пожарот што избувна на 28 јуни во близина на скопската населба Шуто Оризари – Визбегово и хотелот „Њу Стар“, денеска повторно се активираше, предизвикувајќи сериозна загриженост кај локалното население и институциите. Огнот, кој потекнува од дивата депонија, бргу се прошири и се доближи до првите куќи во населбата.
Според информациите од терен, запалена е сува трева и деградирана ниска вегетација на неколку локации околу хотелот. Густ чад се издигнува над Визбегово, а противпожарните екипи се обидуваат да ја задржат огнената линија далеку од објектите и домовите.
„На терен се распоредени противпожарни тимови од Град Скопје со три возила и неколку пожарникари. Дополнително побаравме поддршка со нови сили за да се спречи натамошното ширење на огнената стихија“, информираат од Противпожарната бригада на Скопје.
Пожарот, кој веќе двапати беше гасен од екипите, повторно се појави, што ги натера надлежните да посомневаат во можно намерно предизвикување. Центарот за управување со кризи (ЦУК) испрати итен допис до Град Скопје и до Општина Шуто Оризари, со барање за итна и координирана акција.
„Постои сериозна опасност од натамошно ширење на пожарот. Не исклучуваме можност дека огнот е намерно подметнат. Затоа бараме итно ангажирање на обезбедување што ќе ја надгледува локацијата и ќе реагира при секој обид за ново палење“, велат од ЦУК.
Покрај тоа, од ЦУК предлагаат депонијата да се покрие со инертен материјал, шут или земја, за да се ограничи ширењето на пожарите и да се намали ризикот од нови пламени јазици. Побарано е и засилено присуство на инспекциски служби кои ќе спречуваат незаконско фрлање отпад на оваа локација.
„Неопходно е институциите веднаш да преземат мерки за заштита на здравјето на населението и на животната средина“, се наведува во итниот допис на ЦУК.
Состојбата и натаму останува ризична, а граѓаните од овој дел на Скопје апелираат за побрза и поефикасна интервенција со цел да се заштитат нивните домови и животната средина.