Скопје
Герасимовски: Тодор Гечевски е новиот спортски директор на КК „Работнички“

Тодор Гечевски и официјално е новиот спортски директор на КК „Работнички“, објави денеска градоначалникот на општина Центар, Горан Герасимовски. На прес-конференцијата Герасимовски истакна дека со новото раководство очекува победа на квалификацискиот турнир за ФИБА Еврокупот во Скопје, кое ќе трае од 2 до 5 октомври.
„По неколкугодишна пауза, тимот од Центар сезонава повторно ќе игра во квалификациите за ФИБА Еврокупот, но со ново засилување. Тодор Гечевски се враќа во тимот, каде што ја заврши својата кариера, но како нов спортски директор на КК ‘Работнички’. Ова засилување на тимот верувам дека ќе донесе нова свежина и победа и на домашната и меѓународната сцена. Верувам дека на целата спортска јавност ѝ недостигаат моментите на навивање, бодрење и целата таа возбуда и желба за победа. Се надевам дека црвено-белите повторно ќе го вратат некогашниот сјај и ќе се вратат на победничките патеки“, изјави Герасимовски.
Гечевски, пак, истакна дека со стабилниот буџет од генералниот спонзор „Мтел“ и „Видеолотарија Касинос Австрија“ се добро подготвени и за сериозни успеси. Тој очекува и победа на турнирот за квалификација за ФИБА Еврокупот.
„Оваа сезона имаме посериозна екипа, неколку нови засилувања. Домашниот терен и квалитетот со кој располагаме ни дава право да се надеваме на прво место во претстојните квалификации, иако постои можност и како второпласирани во групата да продолжиме во меѓународните натпревари. Мислам дека сме добро подготвени. Екипата е направена порано за да има време за воигрување. Четириесетина дена сме во тренажен процес. Размислуваме за сериозни успеси и верувам дека со нашите навивачи можеме да го постигнеме тоа. Одиме натпревар по натпревар. Со стабилниот буџет и поддршката од двата големи спонзора, Општината Центар и ‘Мтел’, мислам дека можеме до успеси“, изјави Гечевски на денешната прес-конференција.
„Работнички“, денес, од 18 часот, го игра натпреварот од 1. коло во македонското првенство против ТФТ. Воедно, КК „Работнички“ ќе биде организатор и на натпреварот во кој ќе настапи ривалот „Донар Гронинген“ од Холандија, потоа романскиот „Рапид Букурешт“ и „Сахах“ од Азербејџан, кои од неодамна го презедоа нашиот тренер Боби Митев.
Општина Центар ги кани граѓаните назад на трибините да го поддржат тимот, а локалната самоуправа како и досега ќе продолжи да дава поддршка за да го врати стариот сјај на КК „Работнички“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Фото) Герасимовски изврши увид во училиштето Димитар Миладинов: Целосно ги реконструираме фискултурната и свечената сала

Градоначалникот на Општина Центар, Горан Герасимовски, направи увид во реконструкцијата што се одвива во ООУ „Димитар Миладинов“, каде во тек е целосно обновување на фискултурната сала, свечената сала и меѓупросторот меѓу нив.
Во фискултурната сала се заменува целиот под со нов паркет, се обновуваат ѕидовите и плафонот, се поставуваат енергетски ефикасни светла и се оспособуваат прозорците, додека свечената сала добива целосно нова бина, нови скалила, обновен паркет и подобрени услови за користење, извести Општината.
„Подобрувањето на училиштата останува еден од нашите клучни приоритети. Со реконструкцијата во училиштето „Димитар Миладинов” создаваме современи, безбедни и инспиративни простори во кои децата ќе можат да учат, да спортуваат и да се развиваат. Инвестицијата во нивното образование и здрав развој е инвестиција во иднината на Центар“, изјави градоначалникот Герасимовски.
Реконструкцијата на Свечената сала, предвидува целосно нова бина и нови скалила, а постоечкиот паркет се струга и лакира. Во тек се молерисувањето на ѕидовите, замената на плафонските светла со штедливи, оспособувањето на прозорците за отворање и отстранување на стара остава со непотребен материјал.
Паралелно, се работи и на меѓупросторот, каде се заменува оштетениот под и се изведуваат молерисувачки зафати, се додава во соопштението од Општината.
Македонија
Минатата недела санкционирани се 𝟣𝟢𝟥 непрописно паркирани возила на територија на општина Центар

ЈП Паркинзи на Општина Центар во соработка со Сообраќајната полиција-Скопје во периодот од 10.08.2025 до 17.08.2025 година, со помош на специјалните возила „Пајак“ отстранија 103 непрописно паркирани возила кои го попречувале нормалното и безбедно одвивање на сообраќајот, извести ПОЦ.
„ЈП ПОЦ и Општина Центар континуирано ќе ја спроведуваат оваа мерка и апелираат до граѓаните да ги почитуваат правилата и прописите и да ги оставаат своите возила само на пропишаните места за да им се овозможи на пешаците и велосипедистите нормално движење по тротоарите и велосипедските патеки, а на возилата безбедно движење по улиците“, се наведува во соопштението на ПОЦ.
Македонија
Дел од Карпош денеска без струја

Од ЕВН Македонија АД известуваат дека поради технички зафати во електродистрибутивната мрежа денеска, без електрична енергија ќе останат:
· од 10.00 до 14.30 часот, корисниците на улица Нерешка со број 10,12,14 и 16. (Општина Карпош)