Скопје
Герасимовски: 44 медали за учениците од Песталоци на Детската олимпијада во знаење
Општина Центар се гордее на 6-те ученици Максим Танески, Андрија Крстиќ, Петар Калкашлиев, Корнелија Паниан, Калина Чакаровска и Ангела Ристеска од ООУ „Јохан Хајнрих Песталоци“, кои освоија 44 медали на престижната Детската олимпијада во знаење, која се одржа во Лондон.
Пред градоначалникот на општина Центар, Горан Герасимовски, ги споделија искуствата, среќата и импресиите од престојот во Лондон, а тој им честита и им посака мудроста, бистрината и желбата за нови знаења да ја негуваат за да достигнуваат уште повисоки цели и личен развој, извести Општината.
„Да се вратите со 44 медали за знаења од разни области меѓу 1/200 деца од целиот свет е навистина импресивно. Вие сте ни гордоста и среќата. Вие сте ни инспирацијата и потврдата дека успесите не стигнуваат само кај големите држави. Бидете полни знаења, радувајте се на сопствените успеси и целете кон повисоки достигнувања. Бидете пример и помагајте им на другите ученици со слични амбиции. Ние сме зад вас да ве подржуваме, помагаме и да бидеме ваша поткрепа“, рече Герасимовски на средбата со учениците.
Инаку, учениците во два тима се натпреваруваа во глобалната рунда на Детската олимпијада во знаење т.н. World Scholars Cup на разни теми – од наука до поезија, меѓу 1.200 ученици од целиот свет, од 26 до 31 јули. Во Лондон и двата тима се квалификуваа за турнирот на шампиони на Универзитетот „Јејл“, а со освоени 15 медали најуспешен беше ученикот Андрија Крстиќ.
Општина Центар и градоначалникот Герасимовски ќе продолжат и да ги поддржуваат и да им даваат помош на сите талентирани ученици. Герасимовски ги охрабри учениците и им рече дека тие се доказ оти со голема желба, упорност и работа сепак се освојуваат и недостижните врвови, се додава во соопштението на Општината.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Општина Ѓорче Петров со прво признание за лидерство во енергетската транзиција и развој на енергетски заедници
Општина Ѓорче Петров со ново признание – прва општина во Република Македонија која официјално е акредитирана како дел од европската иницијатива LIFE LOOP – престижна програма на Европската унија што поддржува енергетска транзиција, одржлив локален развој и создавање енергетски заедници.
Со ова признание, Ѓорче Петров се вбројува меѓу иновативните европски општини кои активно промовираат нови решенија за чиста енергија и ја поттикнуваат соработката меѓу граѓаните, институциите и приватниот сектор во насока на зелена и енергетски одржлива иднина.
Добивањето на официјалниот сертификат за поддршка и развој на енергетски заедници претставува значаен успех на општината на патот кон остварување на визијата за почиста енергија, повисока транспарентност, поголемо учество на граѓаните и заеднички енергетски решенија.
Проектот LIFE LOOP се фокусира на развој на локални енергетски заедници преку кои граѓаните директно учествуваат во процесите на производство, потрошувачка и управување со обновливи извори на енергија. Овој модел, кој веќе успешно се применува во неколку земји од Европската унија, создава нова култура на енергетска солидарност и заедничка одговорност.
Општината преку своите стратешки планови и досегашни инвестиции во одржлива инфраструктура, покажува континуирана посветеност кон енергетската ефикасност, заштитата на животната средина и имплементацијата на европски стандарди во локалното управување.
„Ова признание е резултат на нашата визија за зелена, ефикасна и одговорна општина, која се грижи за своите граѓани и ја гради иднината на темели на одржлив развој. Благодарност до сите партнери, институции и граѓани што активно се вклучуваат во процесите на енергетска транзиција. Ѓорче Петров уште еднаш го потврдува својот статус како пример за модерно, енергетски свесно и европски ориентирано локално управување“, рече градоначалникот на Општина Ѓорче Петров, Александар Стојкоски.
Следниот чекор е изработка на локална стратегија за развој на енергетски заедници, што ќе овозможи нови инвестиции во обновливи извори на енергија, намалување на јаглеродниот отпечаток и зголемување на квалитетот на живот за сите жители, се наведува во соопштението на Општината.
Македонија
Извршена есенска дезинфекција, дезинсекција и дератизација на територијата на општина Илинден
Во согласност со програмата за спроведување општи мерки за заштита на населението од заразни болести за 2025 година, општина Илинден изврши есенска дератизација за уништување на глодарите и дезинфекција на јавните објекти на територија на општината.

„Со дератизацијата се опфатени 1073 шахти што се наоѓаат на јавните површини во општина Илинден, а дезинфекција е извршена на 3300 метри квадратни јавни објекти, меѓу кои Општинската зграда и Домовите на култура на територија на општина Илинден.

Со оваа акција, општина Илинден уште еднаш потврдува дека превенцијата и грижата за јавната хигиена се врвен приоритет. Во насока на спречување и сузбивање на заразни болести и инфекции, Општина Илинден и во наредниот период ќе продолжи со примена на сите потребни мерки за заштита на населението“, велат од општина Илинден.
Македонија
„Стевчо Јакимовски да каже како неговото семејство стекнало градежни парцели во Жданец и луксузна хациенда во Грција“, прашува ВМРО-ДПМНЕ
„Стевчо Јакимовски, кој постојано зборува за јавниот интерес, треба конечно да објасни како парцели што според деталниот урбанистички план биле означени како зеленило, одеднаш станале градежни парцели. И како се купува хациенда во Грција“, прашува ВМРО-ДПМНЕ преку соопштение.
„Јакимовски одамна се обидува да го претстави своето владеење како пример за ‘транспарентност’, но во реалноста би можел да послужи како пример за тоа како личниот интерес може да се сокрие зад службен печат и јавна должност.
Во рок од една година, членови на неговото семејство се појавуваат како сопственици на имоти во најскапата зона на општина Карпош, Жданец, токму во делот каде што живее и самиот Јакимовски.
Сосема легитимно прашање е јавноста да знае како од парцели за зеленило станаа градежни парцели.
Семејството на Стевчо Јакимовски во истиот период од таа една година се стекнало и со луксузна вила во Грција.
Доволно е од приказните за ‘искусен градоначалник’, искуството што го покажа е искуство претворање на јавен интерес во имотен лист.
Карпошани не се должни да слугуваат во процесот на енормно богатење на Стевчо Јакимовски“, се додава во соопштението на ВМРО-ДПМНЕ.

