Град Скопје почна со втората фаза од градежните работи за реконструкција на улицата 808 во општина Гази Баба, улица во надлежност на Градот, која не била реконструирана повеќе децении и која е во катастрофална состојба. Улицата 808 е една од најфреквентните сообраќајници во овој дел од општина Гази Баба, а по неа се движат и голем број товарни возила бидејќи се работи за индустриска зона.

„Во првата фаза на оваа локација се извршија подготвителни градежни работи и реконструкција на водоводната мрежа и на другата хидротехничка опрема, а со цел комплетна обнова на мрежата во овој дел на градот. Се спроведоа и активности за реконструкција на атмосферската канализација, како и замена на нефункционалните сливници, со што во иднина се превенираат поплави на овој потег“, известува Град Скопје.

Реконструкцијата во втората фаза се врши на потегот од крстосницата со улица 16. Македонска бригада (кај централната база на Противпожарната бригада) до крстосницата со булеварот Киро Глигоров, а покрај обнова на коловозот на површина од 9.200 метри и должина од 1.000 метри, се изведуваат соодветно пешачка и велосипедска патека од двете страни, се додава во соопштението на Град Скопје.