Скопје
Кисела Вода реконструира четири улици во населбата Драчево

Почна реконструкцијата на улиците Гутенбергова, Волтерова, Марија Кири и Ѓорѓи Војтех во населбата Драчево, извести Општина Кисела Вода.
Градоначалникот Орце Ѓорѓиевски присуствуваше на почетокот на градежните активности, кои опфаќаат реконструктивни зафати на површина од речиси 2.500 м2. Се работи за сообраќајници изградени по катастрофалниот скопски земјотрес и на кои од тогаш не е интервенирано.
„Денес сме на местото каде што почнуваат почетните градежни активности за реконструкција на четири значајни улици во нашата населба Драчево. Се работи за улиците Гутенбергова, Волтерова, Марија Кири и Ѓорѓи Војтех, улици, кои, за жал, никогаш досега, и по земјотресот, не биле санирани или реконструирани од претходните раководства на Општината. Овој градежен зафат, кој опфаќа околу 2.500 квадратни метри, значи инвестиција во подобра инфраструктура, но и инвестирање во подобар квалитет на живот за нашите граѓани, во безбедноста на нашите деца и во полесен пристап до нашите домови и работни места. Градежната офанзива, која трае во целата општина, во сите месни и урбани заедници, со цел да се запази рамномерниот регионален развој, ќе продолжи со засилена динамика. Нашиот целосно поинаков и подобар начин на работа веќе ги дава своите резултати и набргу моето предизборно ветување – во нашата општина да нема неасфалтирана улица – ќе биде во целост остварено“, истакна градоначалникот Орце Ѓорѓиевски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Шалтерите за наплата во „Водовод и канализација“ – Скопје утре ќе работат од 7.30 до 15.30 часот

ЈП Водовод и канализација – Скопје, ги известува корисниците дека утре, четврток, по повод верскиот празник Успение на Пресвета Богородица, шалтерите за наплата, шалтерите за рекламација и операторите во Дирекцијата на претпријатието ќе работат од 07:30 до 15:30 часот.
В петок, 29.08.2025 година, се продолжува со редовно работно време.
Македонија
(Фото) Нови и зајакнати услови за идните ИТ-таленти од училиштето „Ѓорѓија Пулевски“ во Аеродром

ООУ „Ѓорѓија Пулевски“ во општина Аеродром доби нов, целосно опремен кабинет по информатика со поддршка од Државниот завод за статистика.
„Ова училиште беше избрано за ваква поддршка поради континуираните успеси на учениците, кои во изминатите години имаат освоено бројни државни и светски награди по информатика и математика“, велат од Општината.
На свеченото примопредавање на кабинетот присуствуваа в. д. градоначалникот на општина Аеродром, Дејан Митески и директорот на Државниот завод за статистика, Дејан Станков.
„Општина Аеродром и училиштето упатуваат голема благодарност до Државниот завод за статистика за препознавањето и поддршката, кои претставуваат значаен поттик за учениците и наставниците во нивната посветеност кон знаењето, иновациите и новите технологии“, се додава во соопштението на Општината.
Македонија
Инвестиции во централното ООУ „Гоце Делчев“ во општина Илинден

Градоначалникот на општина Илинден, Александар Георгиевски денеска го посети централното основно училиште „Гоце Делчев“ во Илинден, каде во изминатиот период направени се повеќе инвестиции се со цел подобрување на условите.
Градоначалникот Александар Георгиевски истакна дека училиштето е подготвено за новата учебна година при што во изминатиот период направени се доста инвестиции, со цел да се подобрат условите за учениците и спроведување на квалитетен воспитно образовен процес.
За таа цел, за подобрување на квалитетот на часовите и подобрување на образовниот процес, набавени се шест интерактивни (електрични) панели, извршена е целосна санација на подовите на горниот кат, извршена е целосна реконструкција на тоалетите. Исто така извршена е обнова и санација на училишната просторија така наречена медијатека, која се користи како просторија за медиумски клуб. Во надворешниот дел од училиштето извршено е хортикултурно уредување на просторот, известува Општината.
Градоначалникот Георгиевски додаде дека Општина Илинден и во наредниот период ќе продолжи со инвестирање во опрема на сите училишта на нејзина територија, затоа што образованието е една од најважните алки во општеството.