Во паркот „Авионче“ од 5 до 8 септември ќе се одржи првиот фестивал на улична храна во Општина Аеродром (AERO Street Food Festival), при што ќе биде понудено уникатно гастрономско и музичко доживување за сите генерации.

Фестивалот се очекува да обедини 12 познати брендови за храна (Jojo’s BBQ, Oljo’s, Fat Kitchen, Sorelle Focaccia, Lora’s Sushi, Bistro 64, 15 за 12, Milkey, Destan, Smash Burger, La Pizza и Ноа Гирадико) со богата понуда од четири различни кујни: А – американска, Е – европска, Р – регионална и О – ориентална. Посетителите ќе имаат можност да дегустираат специјалитети од уличната гастрономија, но и автентични традиционални јадења, проследени со богат избор на пијалаци.

Покрај храната, фестивалот секоја вечер од 17:30 до 00:30 часот ќе нуди музичка програма со настапи на врвни изведувачи (Рингтонс, Southpark, Breakdown band, Goce SAF, DJ Aleksandar Jordanov, DJ Marko, DJ Micov, DJ Shime, DJ Mono, DJ Foodieman, DJ Guardian и DJ Fico).

Програмата ќе биде збогатена и со интерактивни активности за публиката како натпревари во брзо јадење, квизови, трки и други забавни предизвици со награди, што ќе го направи фестивалот атрактивен за младите и семејствата.

„Првиот фестивал на улична храна во нашата општина е одлична можност да се афирмира урбаната култура и заедништвото преку храната, музиката и позитивната енергија. Убеден сум дека паркот „Авионче“ во септември ќе биде новото омилено место на жителите и посетителите на Аеродром“, изјави в.д. градоначалникот на Општина Аеродром, Дејан Митески.

Фестивалот во срцето на Аеродром се организира со поддршка од Општината, а влезот за сите посетители е бесплатен.

„Општина Карпош го замолува претседателот на Владата, Христијан Мицкоски, да го посоветува неговиот личен кандидат за градоначалник на општина Карпош, Сотир Лукровски, кој има упатено писмо до секоја фирма поединечно за средби на кои ќе се разговара за бизнис-климата кај бизнис-заедницата“, велат од Општина Карпош.

„Убаво би било господинот Мицкоски да му објасни на својот кандидат неколку работи.

Дека детските градинки и основните училишта во општината се правни лица, а НЕ се фирми. Тие се јавни установи за воспитување, згрижување и образование на децата. Оттука, би било убаво заеднички да ни објаснат како децата од градинките и од основните училишта ќе влијаат на „подобрување на бизнис-климата преку работни средби и преку формирање заеднички платформи?“

Господинот Мицкоски треба да му објасни на личниот кандидат дека ги повикува на средба истите оние градинки и основни училишта на кои неговата партија ВМРО-ДПМНЕ гласаше во Советот на Карпош против одлуките за вработените од воспитно-образовните установи да не земаат плати, против осовременување на наставата преку набавка на паметни панели, против заштеда на енергија и поставување фотоволтаични панели, против реновирање на училиштата и градинките;

Би било чесно од претседателот на Владата да го подискара својот кандидат за градоначалник дека на ваков начин со директно упатување покана на адреса на фирмите и установите за наводни средби врши притисок врз директорите на јавните установи, училиштата и фирмите. И оти ВМРО-ДПМНЕ не треба да се служи со таков вид притисоци;

Земањето податоци од правни лица и праќање имејлови за бизнис-средби како претставник на политички субјект е флагрантно кршење на законите и форма на досега невиден притисок врз обични стопанственици. Во случајот Лукровски не знае, ама премиерот знае, дека кандидат за градоначалник се станува тогаш кога Државната изборна комисија ќе ја признае кандидатурата и дека кампања се води во точно утврден временски рок. Затоа, го повикуваме премиерот Мицкоски да го едуцира својот избраник за начините на водење кампања, притоа да избегнува притисоци и доколку тој тоа не го стори, ќе мора да биде корегиран од Основното јавно обвинителство затоа што прави груби повреди не само на Изборниот законик туку и на низа други закони“, се наведува во соопштението од Општина Карпош.

Во насока на обезбедување поквалитетни услови за настава и успешен почеток на новата учебна година, во основното општинско училиште „Ристо Крле“ изминатиов период се реализираа низа активности за унапредување на воспитно-образовниот процес, извести општината Илинден.

Со почеток на новата учебна година, освен во ООУ „Гоце Делчев“, продолжен престој за учениците од прво до трето одделение за првпат се воведува и во ООУ „Ристо Крле“ во Кадино. Во таа насока, целосно се реновирани санитарните јазли и тоалетите наменети за учениците во продолжен престој. Исто така, уредена е и посебна просторија за чување на оброци.

Во рамки на подготовките за новата учебна година, комплетно се уредени три кабинети за предметна настава по математика, англиски јазик и музичко образование. Кабинетите се опремени со нов училишен мебел, нагледни и дидактички средства, музички инструменти, како и три современи смарт табли. Дополнително, со поставување на вариолајт завеси, создадени се оптимални услови за реализација на наставата според современи стандарди, велат од општината Илинден.

Во подрачното училиште во н.м. Мралино, монтирана е нова комбинирана печка на пелети и цврсто гориво, со што значително се подобрува енергетската ефикасност и условите за престој во зимскиот период.

Во подрачното училиште во н.м. Бунарџик, се започна со адаптација на просторија за настава по физичко и здравствено образование, со подна татам подлога и нагледни средства.

Увид во спроведените активности направи градоначалникот на Општина Илинден, Александар Георгиевски, заедно со директорот на училиштето, Јовче Петковски, при што градоначалникот изрази задоволство од досегашните вложувања и истакна дека Општината ќе продолжи со интензивна поддршка на образовните институции, со цел создавање современи и квалитетни услови за едукација.

Сите овие активности се дел од континуираните заложби на училиштето и локалната самоуправа за подобрување на квалитетот на наставата и создавање стимулативна средина за учениците и наставниот кадар, се додава во соопштението од општината Илинден.