Скопје
Општина Аеродром дел од женската трка за поддршка на жените со мултиплекс склероза

Вкупно 25 вработени во администрацијата на Општина Аеродром земаа учество на женската трка што се одржа на Светскиот ден на здравјето, 7 април, а со цел подигнување на јавната свест за мултиплекс склероза и предизвиците што ги носи оваа хронична болест, известува општината.
Трката беше во организација на Националното здружение за помош и поддршка на лица со мултиплекс склероза во соработка со „Авицена“. Учеството на оваа трка е на иницијатива на секретарот на Општина Аеродром, Јулијана Павковска-Боцевска.
Сите учеснички за време на трката на своите маички прикачија и симболична портокалова панделка што беше содржана во стартниот пакет со што го свртија вниманието кон поддршка на жените што се соочуваат со мултиплекс склероза затоа што оваа болест трипати почесто се дијагностицира кај жените отколку кај мажите. На трката учествуваа и жени, кои и покрај хроничната и макотрпна болест со која се справуваат секој ден, успешно ја совладаа и оваа траса.
Општина Аеродром и понатаму ќе дава поддршка на иницијативите кои промовираат здраво живеење и ја подигнуваат свеста за различни болести, се додава во соопштението на општината.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
„Внимание, стаорците нема да чекаат втор круг избори“, предупредува Никола Пановски

„Вториот круг, заедно со рокот на жалби, предавањето на функцијата, нема да заврши пред 9.11.2025. За 18 дена, стаорците, па и глувците, може енормно да се размножат. Скопје веќе 20 дена е елдорадо за глодачите. Имаат достапна храна во изобилство. Излегуваат од подрумите, канализацијата и се хранат, се оплодуваат и за еден месец од секое животно ќе се создадат во просек по 10 младенчиња“, пишува на социјалните мрежи микробиологот Никола Пановски.
„Значи, и по евентуално чистење на градот за 72 часа по 20 дена, ќе имаме илјадници гравидни глодачи, кои на свет ќе донесат десетици илјади младенчиња. Можеби ќе имаме исчистен град, но глодачите ќе бидат многубројни и барајќи храна, ќе бидат крајно агресивни. Храната ќе ја бараат во нашите подруми и гаражи, а ако не ја најдат, ќе ни влезат дома“, вели Пановски.
Тој апелира до Владата веднаш да се прогласи вонредна состојба и да се почне со чистење на сметот.
„Министерство за здравство, Центар за јавно здравје, Институт за јавно здравје, Агенција за храна и ветеринарство, што правите, па вие сте платени да апелирате, да наредувате, да превенирате, не е тоа моја работа. Десетици платени специјалисти по хигиена, епидемиологија, микробиологија, ветеринари, каде сте? Воопшто не е важно дали сега е опортуно да молчите, да чекаме да се исполни ветувањето за 72 часа, аман веќе, побарајте итна акција од Владата, ако не ве слушаат, излезете на улица“, додава Пановски.
Македонија
(Фото) Герасимовски: Реконструкцијата на салата „Работнички“ во завршна фаза

Градоначалник на општина Центар, Горан Герасимовски, изврши увид во градежните активности во спортската сала „Работнички“, придружуван од Атлетската федерација на Македонија, Велосипедската федерација, Училишниот спортски сојуз, Шаховската, Одбојкарската, Карате, Џудо и Кајак федерациите, како и од ЗСД „Работнички“ и ОК „Работнички“.
При увидот, констатирано е дека 80 проценти од реконструкцијата се завршени.
Поставен e централен семафор, а целосно се завршени осветлувањето и озвучувањето во салата. Се комплетираат трибините. Сите приоди се изведени, тоалетите се целосно опремени, се прават подготовки за поставување подно греење, а инсталациите и горниот простор наменет за федерациите се финализираат, велат од Општината.
„По 50 години, Работнички добива нов лик и нови услови за спортски активности, согласно ФИБА стандардите. Федерациите конечно ќе добијат современи услови за работа, а нашите кошаркари место за тренинг и натпревари. Скопје добива модерна спортска сала, КК Работнички свој дом,“ рече градоначалникот Герасимовски.
Со завршувањето на реконструкцијата, салата „Работнички“ ќе стане современ спортски центар, со уреден терен, нови трибини, функционални соблекувални и административен дел за спортските федерации.
Македонија
(Видео) Митески за алармантната состојба со отпадот: Кога безобразноста и дрскоста се присутни – мораме да вратиме со здрав разум!

„ЈП „Комунална Хигиена“ Скопје под раководство на Данела Арсовска е надлежна за собирање на смет, празнење на контејнерите и чистење на општините на територијата на Град Скопје. Истите, за таа работа се платени од граѓаните на Аеродром“, вели актуелниот градоначалник на Аеродром, Дејан Митески.
„Во изминатиот период или повеќе од 10 дена не се празнат контејнерите на територијата на општина Аеродром и не се подигнува отпадот од домаќинствата во Лисиче.
Ние како општина поднесовме кривична пријава до Основното Јавно Обвинителство – Скопје, како и до Министерството за внатрешни работи. Одговорноста има име и презиме и таа мора да се детектира.
Од страна на комунални инспектори на општината ги казнивме два пати по 80.000 евра, но попусто, кај нив не владее здравиот разум.
Надвор од нашите надлежности, се организиравме да го исчистиме Аеродром! Чистиме насекаде, од Долно Лисче до Мичурин. Благодарност до општините: Илинден, Зелениково, Сопиште како и до многуте општествено-одговорни компании кои помагаат во целиот процес.
Ќе издржиме уште 10 дена – Аеродром ќе го исчистиме!“, додава Митески.