Скопје
Општина Центар ќе ги применува добрите пракси од Виена

Градоначалникот на општина Центар, Андреј Жерновски, во среда во Виена се сретна со градоначалникот на главниот град во Австрија, Михаел Хаупл.
Средбата се реализираше на покана на градоначалникот на Виена, град кој е прогласен за „смарт сити“ во 2011 година. Виена има највисоки стандарди за екологија и зачувување на ресурсите, проекти за вклучување граѓаните, како и-проекти за образование и технолошки иновации.
Градоначалниците разговараа околу можностите за блиска соработка помеѓу општина Центар и Виена и пренесување на добрите пракси.
На средбата стана збор и за актуелната политичка ситуација во земјата, особено по развојот на најновите настани и по посетата на еврокомесарот за проширување, Јоханес Хан и тројцата европратеници. Двајцата соговорници искажаа јасна заложба за итно формирање на влада, за да можат да се откочат демократските процеси во државата, нормално функционирање на институциите, што ќе придонесе и за стабилизирање и развој на економијата.
Разменети се мислења и за можните реперкусии од нераспишување на локалните избори, нивно евентуално пролонгирање и како тоа ќе се одрази врз локалната самоуправа во Македонија, а особено во функционирањето на општина Центар.
Михаел Хаупл е градоначалник на Виена од 1994-та година и е член на Социјал-демократската партија, која ужива најголем углед и доверба во главниот град на Австрија.
Хаупл меѓу другото, од 2004 – 2010 ја извршува функцијата претседател на Советот на и општините и регионите при Советот на Европа.
Исто така, беше договорено општина Центар да ги престави можностите за инвестирање пред австриски компании и инвеститори. /крај/со/ст
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Неколку скопски општини денеска без струја

Од ЕВН Македонија АД известуваат дека денеска без електрична енергија ќе останат:
– во периодот од 08.00 до 13.00 часот, корисниците од улицата Црноризец Храбар, општина Аеродром;
– во периодот од 08.30 до 13.00 часот, дел од корисниците од село Сарај – пат за Љубин (кај Џамијата) општина Сарај;
– во периодот од 09.00 до 11.30 часот, поголем дел од корисниците од објектите со парен број на улицата Иван Цанкар во населба Влае, општина Карпош;
– во периодот од 09.00 до 13.00 часот, корисниците од ул. Елисе Поповски Марко, Киро Гавриловски, Антон Панов, општина Центар;
– во периодот од 09.00 до 14.30 часот, едл од корисниците од ул. Франц Прешерн со бр. од 20 до 40, општина Карпош;
– во периодот од 11.00 до 15.30 часот, дел од корисниците на ул Поп Богомил и трнодол, општина Карпош.
Скопје
Обвинителството собира докази и видео-снимки за расчистување на убиството кај Бит Пазар

По вчерашната вооружена престрелка во близина на Полициската станица во Бит Пазар, во која животот го загуби 31-годишниот А.С. од Скопје, дежурен јавен обвинител од Основното јавно обвинителство Скопје изврши увид на лице место и ги презеде првичните истражни дејствија.
Од обвинителството информираат дека на лице место се прибрани траги кои ќе бидат предмет на понатамошно вештачење, со цел да се расветлат сите околности околу настанот.
„По наредба на јавен обвинител, се обезбедуваат снимки од видео надзор од околните објекти, а издадени се сите потребни наредби и насоки за идентификација на инволвираните лица и целосно расчистување на настанот“, информираат од Основното јавно обвинителство Скопје.
Врз телото на починатиот ќе биде извршена обдукција, со цел прецизно да се утврдат причините за смртта.
Инаку, според досега познатите информации, пукањето се случило попладне на само неколку метри од Полициската станица во Бит Пазар. А.С. бил итно пренесен во Клиничкиот центар во Скопје со тешки прострелни рани на главата, градите и други делови од телото, но, и покрај лекарските напори, им подлегнал на повредите во операционата сала.
Основното јавно обвинителство Скопје најавува дека интензивно ќе продолжи со сите неопходни активности за целосно расчистување на случајот.
Македонија
Градоначалникот Ѓорѓиевски со жителите на Црниче го одбележа празникот Балаклија

Градоначалникот Орце Ѓорѓиевски денес беше присутен на местото Балаклија во Црниче, каде заедно со жителите го прослави Источен Петок, значаен православен празник кој секоја година се одбележува на првата недела по Велигден. Тој истакна дека посебно му е драго што ова свето место, на кое се наоѓа изворот, беше ослободено од узурпација, вратено на жителите оплеменето со нови содржини кои овозможуваат вистинско уживање на сите кои го посетуваат, информира општина Кисела Вода.
Го истакна своето задоволство што следната година ќе ја има честа токму тој да биде кум на овој значаен настан.
– Нека е за многу години Источен Петок – Балаклија! Другата година кумството е мое, дар од Бога за што ми е огромна чест! Денес, заедно со мојот народ од Црниче го славиме овој голем празник кој спаѓа во Светлата Недела. Празник посветен на Пресвета Богородица на кој ѝ се оддава признание и се верува дека на овој ден му ги миела раните на Исус Христос, па затоа водите од изворите денеска се лековити и верниците масовно ги посетуваат за да ги измијат очите и лицето. Ова култно место во Црниче на кое има извор и кое до лани беше узурпирано, го ослободивме и го вративме на жителите, оплеменето со содржини за вистинско уживање и рекреација на сите кои го посетуваат. Горд сум на сплотеноста на мојот народ на ваквите денови, затоа Македонија е богата земја која меѓусебната љубов и почит ја одржувала низ вековите.
За многу години да ни е, здравје и бериќет кај сите-изјави градоначалникот на Кисела Вода, Орце Ѓорѓиевски.