Градоначалникот на Општина Центар Горан Герасимовски, утрово присуствуваше на класен час во ООУ „Коле Неделковски“ кадешто се водеше дискусија со учениците за важни теми како што се врсничко насилство (булинг) и ментално здравје. Посетата на Герасимовски беше во рамки на препораките коишто неодамна беа прифатени од сите основни училишта во Центар за поквалитетна настава во образовниот процес, што вклучува забрана за употреба на мобилни телефони на учениците за време на наставата.

На класниот час, градоначалникот Герасимовски, наставниците и учениците истакнаа дека врсничкото насилство и менталното здравје се важни во развојот, за создавање свест кај младите и треба да бидат дел од образовниот процес, затоа што создаваат безбедно опкружување за децата.

„Ваквите разговори ќе помогнат да се препознаат знаците на насилство, особено меѓу децата, како да се справуваат со стресот и емоционалните проблеми, но и како да им помогнат на своите другарчиња, соученици. Врсничкото насилство и проблемите со менталното здравје не смееме да ги занемариме, затоа што кога учениците се чувствуваат под притисок, било да се работи за вербално или физичко насилство, или пак за лични емоционални предизвици, тоа може сериозно да влијае врз нивното учење. Мораме да им овозможиме безбедна средина кадешто ќе растат здраво и среќно. Ги повикувам сите општини во државата да го следат овој пример, да создадеме училишни простори кадешто децата меѓусебе ќе се поддржуваат и ќе си помагаат, а ние ќе бидеме сигурни дека сме ги истуркале на вистинскиот пат – низ вредностите на почитување, емпатија и поддршка“, вели Герасимовски.

Одличен е одѕивот од страна на родителите и педагозите за оваа мерка, затоа што им се овозможува на учениците да растат во средина кадешто ќе ја градат самодовербата, но и ќе се подготват за здрав и успешен развој, известува општината.

ЈП Паркинзи на Општина Центар во соработка со Сообраќајната полиција-Скопје во периодот од 20.01. до 26.01.2025 година, со помош на специјалните возила „Пајак“ отстранија 122 непрописно паркирани возила кои го попречувале нормалното и безбедно одвивање на сообраќајот.

„За трајно решение на сообраќајниот метеж и проблемот со неправилното паркирање неопходна е поголема сообраќајна култура, затоа ЈП ПОЦ и СВР Скопје во наредниот период ќе продолжат со секојдневно отстранување на сите непрописно и несовесно паркирани автомобили во општина Центар со цел да се подигне сообраќајната свест на повисоко ниво и да се зголеми безбедноста во сообраќајот“, велат од ЈП Паркинзи.

Градоначалникот на Општина Центар Горан Герасимовски информира дека „градот Скопје под раководство на градоначалничката Данела Арсовска не си ги исполнува своите основни работни обврски и утрово, ѓубрето не е исчистено од улиците на Центар под чија надлежност е градот“.

„Барам итно денеска градот Скопје да си ја заврши својата работа и да го исчисти ѓубрето во Центар кадешто градот и градоначалничката Данела Арсовска се надлежни. Недозволиво е центарот да Скопје да изгледа вака, јавните површини се акумулирани со ѓубре коешто не само што го загрозува здравјето на граѓаните, туку ја нарушува и животната средина. Апелирам до Арсовска и градската администрација веднаш да се фатат за работа и да ги исчистат улиците во Центар за кои самите се надлежни! Неопходно е веднаш да се интервенира и да се осигура чистотата на улиците“, алармира Герасимовски.