Скопје
Прифатена програмата за еднакви можности предложена од Левицата во Карпош
Програмата за еднакви можности во општина Карпош за претстојната 2024 година под раководство на претседателката на комисијата и советничка од Левицата, Ивана Петковска, координаторката на комисијата, како и со поддршка на други советници од советнички групи, е креирана со фокус на жртвите на семејно насилство, велат од партијата Левица.
„Дури 75 % од сторителите на семејното насилство поминуваат неказниво, а поголемиот број жртви не ја добиваат потребната помош од институциите. Во таа насока програмата е насочена кон превенција и советување за спречување на семејното насилство и помош за жртвите преку бесплатни психолошки советувања и психотерапии.
Во рамките на програмата е предвидено отворање локална канцаларија за родителство, каде што родителите со помош на стручни соработници психолози и психотерапевти ќе може да учат вештини за успешно родителство во првата етапа, а во втората етапа е предвидено да се даде акцент повторно на семејното насилство во контекст на целиот семеен систем“, соопштуваат од Левицата.
„Унапредување на здравјето на жените и мажите е исто во фокусот на престојната програма во насока на превенција и навремено детектирање женски и машки болести, првенствено рак на дојката и на простатата.
Програмата содржи и други активности, како соработка со ИТ-секторот и спортски активности, што дополнително ја збогатува нејзината содржина.
Со 15 гласа ЗА програмата е прифатена и очекуваме да биде реализирана во престојната 2024 година“, се додава во соопштението на Левицата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Скопје
Уште 20 нови дигитални услуги на интернет-страницата на Општина Кисела Вода
Запишување на децата во градинка по електронски пат, пријава за инспекциски служби, поставување директни прашања до градоначалникот или до советниците се едни од 20 нови дигитални услуги што Општината Кисела Вода ги воведе денеска.
Овие услуги се достапни на новата општинска интернет-страница и со ова продолжува дигитализацијата на Општината почната пред речиси две години.
„Дигитализацијата на Општината претставува значаен чекор кон подобрување на транспарентноста, отвореноста и ефикасноста на локалната самоуправа. Воведувањето дигитални услуги овозможува значително олеснување на процедурите за граѓаните и бизнис-заедницата и истовремено го намалува ризикот од коруптивни дејства. Овие промени ја поставуваат основата за една модерна, ефективна и отворена општина, која е насочена кон потребите на своите граѓани“, изјави градоначалникот на Кисела Вода, Орце Ѓорѓиевски.
Со новите услуги ќе биде овозможено следење на системот на јавни набавки, плаќање на такси поврзани со Општината.
„Нема да има повеќе уписи преку врски во градинки. Родителот од дома ќе може да аплицира, да наведе за која градинка е заинтересиран и за неа да аплицира. Со тоа и ние како локална самоуправа точно ќе знаеме во секој момент колкав број деца има за упис, каде има потреба од отворање дополнителни капацитети. Преку апликациите ‘Прашај го градоначалникот’ и ‘Прашај го својот советник’ нашите жители ќе може да комуницираат во прво лице со лицата што ги избрале да ги решаваат нивните проблеми“, додаде Ѓорѓиевски.
Скопје
108 санкционирани возачи во Скопје
Секторот за внатрешни работи Скопје во текот на вчерашниот ден продолжи со контролите во областа на сообраќајот.
„На територијата на град Скопје изречени се вкупно 108 мерки, меѓу кои девет мерки за возење без возачка дозвола, четири санкции за минување на затворен сигнал – црвено светло, седум мерки за користење мобилен телефон при возење, осум санкции за некористење на сигурносен појас…“, извести МВР.
Од таму додаваат дека сообраќајните контроли продолжуваат и во наредните денови.
Скопје
Без струја делови од општините Илинден и Кисела Вода
Регионалниот центар за управување со кризи на Град Скопје, по добиеното известување од ЕВН, информира дека поради технички зафати во електро дистрибутивната мрежа, денеска, без електрична енергија ќе останат делови од општините Илинден и Кисела Вода.
Од 08:30 – 09:30 часот, корисниците од улицата бр. 34 во населба Илинден, општина Илинден ќе немаат струја.
Без електрична енергија од 09:00 – 13:00 часот, ќе бидат корисниците од дел од улицата Востаничка во општина Кисела Вода.