Скопје
Работна средба на раководството на СВР Скопје и општина Центар за решавање на проблемите во интерес на граѓаните

На иницијатива на раководството на СВР Скопје, денеска во општина Центар се одржа работна средба на началникот на СВР Скопје Сашо Топаловски и градоначалникот на општина Центар Горан Герасимовски.
Како што соопшти МВР, целта на средбата било заедничко делување во решавањето на актуелните проблеми во општина Центар, како што се проблемите во сообраќајот во општината, посебно во Дебар Маало, Капиштец и централното градско подрачје, гласната музика од угостителските објекти до доцните часови, која го нарушува мирот на граѓаните, уништувањето на урбаната опрема во парковите итн.
Началникот на СВР Скопје, Сашо Топаловски на средбата ја изрази цврстата одлучност на Министерството за внатрешни работи со своето делување да се воспостави посакуваниот ред, мир и спокој на граѓаните од општина Центар.
Беа договорени повеќе чекори со кои заеднички ќе се делува да се остварат планираните цели.
Во делот на сообраќајот и непрописното паркирање, Министерството за внатрешни работи ќе почне со засилени контроли низ општината, а за најкритичните места, како познатите дискотеки и локали, предвидено е пајак службата да почне да делува и во трета смена, посебно во деновите пред и за време на викенд.
Во Дебар Маало, Капиштец и централното градско подрачје, ќе се делува заеднички со посебни сообраќајни режими и како превентивни така и репресивни акции на полицијата, со зголемена фреквенција и присуство на терен.
МВР заедно со општинските инспекциски служби ќе делува засилено и во делот на гласната музика, почитувањето на работното време, како и други редовни акции од надлежност на министерството.
За вандалските чинови што на неколку пати се утврдени во неколку од парковите во Капиштец, министерството по добиените сознанија веќе постапува и извршителите кои ќе бидат идентификувани ќе добијат соодветни пријави.
СВР Скопје ќе ги засилува сите свои ангажмани со цел исполнување на стратешките цели на новото раководство на министерството, а тоа е засилена борба со сите видови криминал и корупција и обезбедување на поголемо ниво на безбедност и спокој за сите граѓани.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Фото) Герасимовски чистеше со хигиеничарите на повеќе локации низ Центар: Се надевам дека градската власт ќе се свести

Синоќа, до доцна по полноќ, градоначалникот Горан Герасимовски заедно со екипите на општинските хигиеничари го расчистуваа натрупаниот смет околу контејнерите во повеќе локации во Центар, откако ЈП „Комунална хигиена“ и Градот Скопје повторно потфрлија и го оставија цело Скопје, не само Центар затрупано во смет.
„Да не дозволиме сето она што не го прави комуналното претпријатие и неговата негрижа да остане проблем на граѓаните, ние сме тука за заедно да ги решаваме проблемите. А сега продолжуваме сите заедно да го чистиме Центар поради негрижата на градот“, изјави Герасимовски на терен.
Герасимовски посочи дека акцијата продолжува динамично, со цел што побрзо да се нормализира состојбата.
„Продолжуваме на следна локација, вечерва колку што ќе стигнеме да исчистиме, да ги наполниме контејнерите. Сабајле продолжуваме заедно со хигиеничарите да ги средуваме другите населби, една по една. Сите контејнери се полни, и на булеварите. Центарци нема каде да се паркираат, и паркинг местата ги узурпирале со смет. Се надевам дека градската власт ќе се свести и од утре ќе си ги преземе одговорностите и ќе ни го направи почист градот. Ако тие не го направат тоа, нашите служби повторно ќе ја завршат работата на градот“, додаде Герасимовски.
Општина Центар информира дека општинските хигиеничари и во текот на денешниот ден продолжуваат со расчистување на сметот во сите населби.
Македонија
„На точак“: Идни градоначалници, доста беа лепенки! Време е за нова гума!

Под мотото „Идни градоначалници, доста беа лепенки! Време е за нова гума“, „На точак“ ќе ја вози 92. Критична маса, која ќе се одржи в среда, со почеток во 17:30 часот.
Од Плоштад Македонија во 17:30 часот, ќе тргне 92-рата по ред Критична маса во Скопје и ќе се упати по предвидената рута низ Аеродром и околу центарот до Градски парк.
Критична маса е интернационален настан, собир на велосипедистите и заедничко возење кој веќе 33 години се случува во светот, а 13 години во Скопје. Поентата е преку бројноста, голема група заедно (т.е.доволна критична маса) фактички и симболички „да го пробие патот“ на улиците и до свеста на сограѓаните и донесувачите на одлуки.
Оваа Критична маса се случува во пресрет на локалните избори со јасна порака до кандидатите за градоначалници: да понудат план за градот во кој велосипедистите и пешаците се дел од решението, а не жртви на хаотичниот автоцентричен сообраќај. „На Точак“ бара планирање и изградба на поврзана велосипедска мрежа, слободни тротоари, распространета зона 30, како и вистински јавен простор за сите – деца, родители со бебешки колички, лица со попреченост, повозрасни граѓани.
Покрај тоа, се бараат и системски решенија: јавен превоз со посебни ленти, современ систем за изнајмување точаци, повеќе зелени зони и мерки кои ќе ја намалат зависноста од автомобилите. „Сообраќајната хиерархија мора да се промени. Во град за луѓе, пешачењето, возењето велосипед и користењето јавен превоз се висококвалитетни опции, а автомобилот не е господар на улиците“ велат од групата.
На „Критичната маса“ се очекуваат стотици граѓани кои со своето присуство ќе покажат дека Скопје може да биде поубаво и похумано место.
Организаторите потсетуваат: секој вози на своја одговорност, а најважно е заедничкото испраќање на порака – дека половичните мерки („лепенките“) веќе не помагаат, време е за потемелна промена во Скопје.
Според нив има 2 избори: или ќе се избере поквалитетен, поздрав, поактивен, позелен град, избор за кој се потребни многу храбри одлуки и на почеток непопуларни мерки, но куп продобивки на крајот.
Или ќе се избере полесниот пат, со продолжување на автоцентричното статус-кво, без суштински промени, со презентирање некакви „лепенки“ дека нешто сработиле ситно тука и таму, со автомобили по тротоари, неразвиен јавен и велосипедски превоз, и лишување од сите придобивки.
„Ние го бираме првото и во тоа име и сите придобивки од вело-пријателскиот град Ве повикуваме да ни се придружите со своите велосипеди на Критична маса #92. Ѕрн – ѕрн!“
Македонија
(Видео) Герасимовски пред преполните контејнери: Четири години нашите хигиеничари ѝ ја вршат работата на „Комунална хигиена“

Градоначалникот на Центар Горан Герасимовски во обиколка на улиците, заедно со хигиеничарите на Центар, затекна контејнери опкружени со купишта ѓубре, известуваат од Општината. Од терен тој упати апел до Јавното претпријатие „Комунална хигиена“ редовно да го собира отпадот и да ја преземе својата законска обврска.
„Вака Комунална хигиена си ја завршува својата работа. Како изминативе години, така и денеска, и ова понеделничко утро, центарци се будат во ѓубре. Целата општина е полна со смет, нашите хигиеничари се постојано на терен, го сработуваат сето она што Комунална хигиена не го сработува изминативе години. И после овој мој апел, повторно ќе слушнеме демант на Јавното претпријатие дека навремено си ги завршуваат своите обврски, го собираат сметот од улиците, рече градоначалникот на Центар.
Во утринската акција, хигиеничарите на ПОЦ го расчистија просторот околу контејнерите. Герасимовски порача дека општина Центар ќе продолжи да работи во интерес на своите жители и кога тоа е надвор од ингеренциите. Најави нова опрема која ќе се набави во наредниот период, се наведува во соопштението.
„Нашите 120 хигиеничари цело време се на терен и ја завршуваат работата која е обврска на Јавното комунално претпријатие и за која граѓаните на Општина Центар ги плаќаат. Продолжуваме да си го чистиме Центар и да ја завршуваме работата на Јавното комунално претпријатие, продолжуваме и со она што го ветивме пред граѓаните – да купуваме дополнителна опрема. Во наредниот период се купуваат нови две цистерни за да се мијат улиците, но и нови метларки и камион кој ќе ни треба, бидејќи очигледно Комунална хигиена не си ја врши работата. Верувам дека после толку апели ќе се свестат и овој смет нема повеќе да го има на улиците на Центар“, рече градоначалникот Герасимовски.