Скопје
Се уредува просторот пред пензионерскиот дом „Аеродром“, најавена нова урбана опрема и на други локации
Општината деновиве го уредува паркот пред пензионерскиот дом „Аеродром“ каде што се поставуваат нови клупи за седење и друга урбана опрема, со што се создаваат подобри и поубави услови за престој и дружење на станарите од овој дом.

Заменик-градоначалникот Дејан Митески ја посети локацијата на која се работи и имаше можност да се сретне со некои од жителите на домот, во кој живеат вкупно 151 станар. Тој поразговара со нив, ги слушна нивните потреби, барања и идеи и им најави дека Општината ќе продолжи да се грижи за непосредната околина во која живеат тие.

Митески истовремено посочи дека во изминатиот период беше поставена нова урбана опрема на повеќе локации низ целата општина и истото ќе продолжи и во иднина согласно со потребите на жителите на Аеродром. Исто така, во наредниот период ќе биде извршена санација и замена и на кантите за отпадоци со нови поцинкувани садови отпорни на временските влијанија.

Општина Аеродром останува посветена на уредување на јавните површини и на парковите, на создавање повеќе места за дружба и релаксација за сите генерации, како и на одржување на хигиената на целата територијата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Арсовска: Како ќе функционира ЈП „Комунална хигиена“ – Скопје во следните пет дена – прашајте го премиерот Мицкоски
„Како ќе функционира ЈП „Комунална хигиена“ – Скопје во следните пет дена прашајте го премиерот Мицкоски кој лично од својот кабинет го наредува овој хаос кој воедно и го најави како интересна разврска на прес конференција непосредно пред да се случи“, вели актуелната градоначалничка на Град Скопје, Данела Арсовска.

„Го повикуваме премиерот Мицкоски кој има своја претседателка на Управен одбор од ВМРО која воедно е и осуден криминалец за 2 кривични дела во 2006 и 2022 година, да го повика Управниот одбор на Комунална хигиена Скопје согласно член 24а став 2 од Законот за јавни претпријатија во случај да донесе одлука за разрешување на директорот и согласно став 3 од истиот член да именува вршител на должност на претпријатието.
Мицкоски го тероризира градот со своето режимско и диктаторско владеење преку својот Управен одбор, злоупотребувајќи ги институциите и полицијата да сее страв и да врши репресија пред избори.
Го прашуваме директно и базирано врз доказите кои граѓаните секојдневно ги изнесуваат во јавност:
1. Дали е приведен директорот на Јавното комунално претпријатие Тетово за еко хаваријата што ја предизвика со отпадот во Вардар и зошто не?
2. Дали е приведен директорот на Јавното комунално претпријатие Гази Баба за еко хаваријата што ја предизвика во Јурумлери со отпадот кој го фрла сред природа со општински камиони и зошто не?
3. Дали е приведен директорот на JП Чистота и зеленило Куманово за еко хаваријата што ја предизвикува секојдневно со отпадот низ Куманово и зошто не?
Или таму РЕЖИМСКИОТ ДИКТАТОР Мицкоски не дал наредба да се апси?“, прашува Арсовска, преку соопштението објавено и на социјалните мрежи.
Македонија
Без струја денеска делови од Центар, Сопиште и Бутел
Од ЕВН Македонија АД известуваат дека денеска без електрична енергија ќе останат:
· во периодот од 07:30 до 15:00 часот, корисниците на блокот на згради од булеварот Партизански Одреди бр.17 кон улица Максим Горки, општина Центар.
· во периодот од 07:45 до 15:30 часот, корисниците на селата Јаболци, Ново Брезница, Патишка Река, Држилово, Малчиште, Црн Врв, Елово, Осинчани, Карст с.Јаболци Викендици Држилово, Сателитски Центар, Ново Брезница, Рудпроект, Јаболци, Патишка Река, општина Сопиште.
· во периодот од 08:30 до 10:30 часот, корисниците на улицата Тале Христов, Поликлиника ВФВ и Објектите околу ВРВ Поликлиник, општина Бутел.
· во периодот од 09:00 до 12:00 часот, дел од корисниците на улицата Елисие Поповски – Марко бр.21,47 и други корисници во непосредна близина, општина Центар.
Македонија
Делови од Центар и Аеродром денеска без вода
Од ЈП Водовод и Канализација известуваат дека денеска:
– поради изведување на водоводен приклучок ф-80 мм на улицата Франклин Рузвелт бб, прекинато водоснабдување ќе имаат корисниците на дел од истата улица, односно потегот од Орце Николов до Благој Давков, општина Центар.
Водоснабдувањето ќе биде прекинато од 10:00 часот до завршување со работните активности.
– поради промена на вентил во шахта ф-2“ на улицата Венијамин Мачуковски бб, прекинато водоснабдување ќе имаат корисниците од истата улица, општина Аеродром.
Водоснабдувањето ќе биде прекинато од 09:00 часот до завршување со работните активности.

