На покана на претседателот на Македонската академија на науките и уметностите, академик Живко Попов, претседателот на ЗЕЛС, Орце Ѓорѓиевски, денес беше дел од редовното годишно собрание на оваа највисока научна институција во земјата. Настан, кој, покрај резимето на академските достигнувања, ја отвори и неопходната дебата за системските предизвици и за реформите што ни претстојат.

„Дозволете ми да му се заблагодарам на претседателот на Македонската академија на науките и уметностите, академик Живко Попов, за поканата да бидам дел од редовното годишно собрание на оваа највисока научна институција во земјата.

Годишното собрание на МАНУ оваа година почна со едноминутно молчење во чест на трагично загинатите во несреќата во Кочани – трагедија што нè потресе сите и што ни ги отвори очите кон одредени системски слабости, кои бараат итни и суштински решенија. Во вакви моменти, кога сите погледи се свртени кон болката и загубата, се отвора и прашањето – како да спречиме вакви трагедии да се повторат?

Академската заедница е еден од клучните столбови врз кои треба да се потпреме при носењето издржани и квалитетни решенија. Токму научно заснованите анализи и предлози може да помогнат во креирање политики што ќе донесат вистински и трајни промени.

Очигледно е дека е неопходно темелно „ресетирање“ на системот, со значителни законски измени и реформи, кои ќе ги зголемат ефикасноста, безбедноста и координацијата меѓу институциите. Поддршката од академиците, од научната и стручната јавност, ќе биде од исклучително значење за креирање нови одржливи модели, кои ќе ги подобрат безбедноста, инфраструктурата и реакцијата во итни ситуации.

Креирањето и реализацијата на проекти во насока на планирањето на иднината на Република Македонија, кои беа во фокусот на денешното годишно собрание, само потврдува дека МАНУ останува вистински чувар на знаењето и прогресот. Успесите на академиците во изминатата година се доказ дека токму преку наука и аналитичен пристап можеме да креираме одржливи и долгорочни решенија.

Како претседател на ЗЕЛС, уверувам дека локалната самоуправа е подготвена за блиска соработка со академската заедница. Преку заеднички напори можеме да изградиме систем што ќе биде подготвен да одговори на предизвиците со кои се соочуваме, но и да поставиме темели за посигурна и подобра иднина за сите граѓани“, изјави претседателот на ЗЕЛС, Орце Ѓорѓиевски.

Во некогашното основно училиште во скопско Кучково повторно ќе се слуша детски џагор, но не од ученици, туку од деца кои се излекувани од канцер. Денеска и официјално беше промовиран проектот „Приказната продолжува“ за изградба на Регионален центар за рехабилитација и ресоцијализација на деца излекувани од малигни заболувања, преку реновирање и адаптација на старото основно училиште во Кучково. Објектот наскоро ќе ги отвори вратите за престој на младите борци, благодарение на Министерството за локална самоуправа, финансиската поддршка на Владата на Швајцарија и учеството на Општина Ѓорче Петров, како дел од проектот „Одржлив и инклузивен рамномерен регионален развој“ фаза 2.

Министерот за локална самоуправа, Златко Перински, градоначалникот на Општина Ѓорче Петров, Александар Стојкоски и в.д. директорката на Центарот за развој на Скопски плански регион, Розета Арсовска, го посетија Центарот во кој во завршна фаза е уредување на просториите и хортикултурното уредување на дворот.

Објектот на површина од 650 м² има капацитет за престој на 20 деца со придружба на еден родител во комплетно опремени простории и училници за он-лајн образование, за физикални вежби, соба за психо-социјални работилници, а има и соби за игра и „мирна соба“ за рехабилитација.

„Овој Центар ќе значи многу надеж, нови можности, нови перспективи за сите оние мали херои коишто се избориле со канцер. Проектот беше инспириран од сите нив поради потребата од помош во периодот на лекување и потоа, а целта е да им дадеме максимум психосоцијална поддршка во процесот на нивната ресоцијализација и повторна интеграција во општеството, по долгиот престој во болничките установи“, истакна градоначалникот Стојкоски кој се заблагодари на сите чинители во реализацијата на проектот.

„Не станува збор само за обичен објект и едно старо училиште, станува збор за еден паметник кој во иднина ќе нѐ потсети дека доколку нешто вистински се сака, се може и дека само зачувана историја е наша лична карта, а влогот во образованието и воспитанието на децата е патот кој води кон вистински систем на човекови вредности“, порача Марија Вук, претседател на НВО САНО, дел од иницијаторите на проектот.

Ова е еден од десетте проекти кои Министертството за локална самоуправа ги реализира со финансиска поддршка на Владата на Швајцарија во рамки на проектот „Одржлив и инклузивен рамномерен регионален развој“ фаза 2, а чија вкупна вредност е 23.574.074,00 денари, од кои 8.435.000,00 денари се обезбедени од Швајцарска агенција за развој и соработка, 10.380.998,00 денари од страна на Министерството, а Општина Ѓорче Петров учествува со 4.758.076,00 денари.

„Ова е наш мал придонес во насока на поддршка за младите борци и искрено се надевам дека во иднина во овој објект ќе се видат многу насмевки, а децата ќе се ресоцијализираат и навистина ќе го градат патот и секој нов ден во насока на подобра иднина за сите нив. Се надевам дека како Министерство, а убеден сум дека и како Влада, ќе можеме да бидеме сведоци на реализација на многу вакви проекти кои ќе донесат подобро утре за сите граѓани“, порача министерот Перински.

Реконструкцијата и адаптацијата на некогашното училиште произлезе и како едно од барањата на граѓаните преку Регионалните форуми на заедниците, организирани од Центарот за развој на Скопски плански регион (ЦРСПР).

„Горди сме на проектот кој произлезе од регионалните форуми организирани од нашиот центар кој на децата ќе им овозможи здравствена, социјална заштита и рехабилитација, како и едукација и ќе им помогне повторно вклучување во образовниот систем на еднакви основи со нивните соученици“, изјави в.д. директорката на ЦРСПР, Арсовска.

Општина Ѓорче Петров ја продолжува својата посветеност на заштитата и поддршката на жртвите на насилство, со отворањето нова канцеларија за психолошко советување и советување со социјален работник, како и бесплатна СОС-линија 141-700, достапна за жени жртви на семејно насилство.

Канцеларијата се наоѓа во просториите на Општина Ѓорче Петров, поточно на приземјето и ќе биде отворена секој четврток од 10 до 14 часот за сите оние на кои им е потребна поддршка.

Таа ќе функционира во соработка со Националниот совет за родова рамноправност со цел обезбедувањ психолошка поддршка, правни совети и социјално советување за жртвите на семејно насилство и насилничко опкружување.

По повод отворањето на канцеларијата, денеска беше одржана и стручна трибина, на која беа претставени условите и можностите што оваа канцеларија ги нуди, како и стручниот тим составен од психолог, правник и социолог. На трибината беше нагласена важноста од психолошката поддршка во процесот на соочување со стравот и излезот од насилничкото опкружување.

Општина Ѓорче Петров и понатаму активно работи на подобрување на состојбите поврзани со каков било вид насилство, буллинг или други форми на злоупотреба. Со овие активности Општината продолжува да ја засилува својата ангажираност во заштитата и ослободувањето на жртвите од насилните средини.