Градоначалникот на Општина Центар одржа координативен состанок со директорите на општинските училишта, на кој главен фокус беа препораките за настава без мобилни телефони, одржување редовни класни часови посветени на препознавање и справување со сајбер булингот, како и активно вклучување на стручни лица преку работилници за борба против дигиталното насилство.

Иницијативата за забрана на мобилни телефони во текот на наставата се спроведува успешно, одобрена од наставничките совети, а позитивни реакции пристигнуваат и од педагозите, родителите и стручната фела.

„Со оваа иницијатива, Општина Центар се позиционира како лидер во зачувување на менталното здравје кај децата, обезбедување образование без пречки, поголема концентрација и подобра социјализација. Мило ми е што гледам дека и другите општини почнаа да го следат нашиот пример. Ги почитуваме препораките на УНЕСКО, а класните часови се резервирани за отворени разговори со учениците, препознавање на негативните појави и фокусирање на вистинските вредности“, истакна градоначалникот Герасимовски.

На состанокот беше покрената и иницијатива за почисти и уредни училишни дворови, со вклучување на учениците во одржување на хигиената.

„Важно е да ги мобилизираме децата и да ги поттикнеме да придонесат за почист Центар, започнувајќи од своите училишта. Во наредниот период ќе се реализираат низа активности за чистење уредување на училишните дворови, согласно насоките што ги дава општината. Во зависност од временските услови и загаденоста на воздухот, ќе се спроведуваат соодветни акции. Целта е да ја подигнеме свеста на младите за здрави навики и грижа за животната средина, а воедно да создадеме училишта каде што слободното време ќе се користи одговорно и за подобрување на заедничкиот простор“, нагласи градоначалникот.

Дополнително, се разговараше за воведување училишни униформи од наредната учебна година, откако одлуката беше усвоена на Советот на Општина Центар. Исто така, беше дискутирано за подобрување на училишната инфраструктура и санација на инфраструктурните проблеми.

Градоначалникот одржа и работна средба со менаџментот на општинските градинки, каде што беа разгледани клучни прашања поврзани со подобрување на условите во предучилишното образование.

„Советот на Општина Аеродром одлучи да не го зголеми износот на еднократната парична помош за новороденче на својата последна седница која се одржа неделава“, велат од СДСМ.

„Додека некои општини донесоа одлуки за зголемување на помошта за новороденче и до 100 проценти, помошта за новороденче во Аеродром останува во непроменет износ од 8.000 денари цели 7 години.

– Коневски ја воведе, Марин ја зголеми, само Муцунски и Митески излажаа дека ќе ја зголемат помошта за новороденче од 8 на 20 илјади денари, изјави на последната седница на Советот на Општина Аеродром координаторот на советничката група на СДСМ, Милутин Ристески.

Еднократна парична помош за новороденче во Општина Аеродром се доделува повеќе од 12 години на семејствата кои имаат новороденче, како симболична помош во моментите на нивната најголема среќа.

Последното и единствено зголемување на помошта за новороденче во Аеродром се случи во 2018 година, кога СДСМ ја зголеми оваа помош од 5.000 на 8.000 денари.

Во 2021 година Тимчо Муцунски заедно со Дејан Митески и ВМРО-ДПМНЕ излажаа дека ќе ја зголемат од 8.000 на 20.000 денари. Последната одлука на Советот на Општина Аеродром е само потврда дека до крајот на 2025 година еднократната парична помош останува со непроменет износ од 8.000 денари.

Над 18.000 гласачи, наши сограѓани од Аеродром, во 2021 година гласаа за ВМРО-ДПМНЕ меѓу другото затоа што веруваа дека Муцунски и Митески ќе ја зголемат оваа помош.

Над 2.500 новороденчиња се родени оттогаш во Аеродром, а нивните семејства трајно ја пропуштија шансата да добијат 20.000 денари од општината, како што им беше ветено од Митески и Муцунски“, соопшти СДСМ.

Локалната самоуправа и оваа година распиша Јавен повик за субвенционирање на млади лица кои се жители на општина Карпош, за посетување на обуки за теоретски и практичен дел за полагање на возачка дозвола, Б категорија. Во таа насока, Комисијата за доделување на субвенции точно ги дефинираше критериумите, начинот и условите под кои заинтересираните странки можат да се пријават на Јавниот повик, односно да станат потенцијални корисници на горенаведените субвенции.

Оттука, секое лице кое ќе поднесе барање за субвенционирање за посетување на обуки за теоретски и практичен дел за полагање за возачка дозвола мора да е жител на општина Карпош, заедно со неговите родители, минимум 3 години до денот на поднесување на барањето. Притоа, според принципот „прв дојден – прв услужен“ ќе се субвенционираат млади лица кои се родени во 2007 година, односно кои во 2025 година ќе наполнат 18 години.

Согласно утврдените правила, висината на субвенции е определена според следниве критериуми:

• Двајца родители со вкупен приход до 80.000,00 денари,добиваат 100% од износот кој се наплатува за посетување на обука за теоретски и практичен дел.
• Двајца родители со вкупен приход од 80.001 до 100.000 денари,добиваат 75% од износот кој се наплатува за посетување на обука за теоретски и практичен дел.
• Двајца родители со вкупен приход од 100.001 до 120.000 денари,добиваат 50% од износот кој се наплатува за посетување на обука за теоретски и практичен дел.
• Двајца родители со вкупен приход од над 120.001 денари,добиваат 25% од износот кој се наплатува за посетување на обука за теоретски и практичен дел.

Локалната самоуправа напоменува дека во предвид ќе се земат само оние лица кои уплатиле за  посетување на обука за теоретски и практичен дел за полагање за возачка дозвола, по добиена Потврда од страна на Општина Карпош за исполнување на критериуми и само во оние авто школи кои имаат склучено Договор со Општина Карпош бр.11-140/8, произлезен од Јавен повик со Одлука бр.11-140/6 од 24.01.2025 година. Уплатата треба да биде според минимална цена за обука во Правилникот за минимална цена за оспособување на возачи во авто школа за следење на обуки од теоретскиот и практичниот дел на кандидатите за возачи за Б категорија, согласно минималните пресметани елементи на вредност.

Во претходниот Јавен повик беа избрани следниве авто школи:

• Друштво за сообраќајна едукација АВТО ШКОЛА СМАРТ ДООЕЛ Скопје
• Друштво за спроведување оспособување на кандидати за возачи АВТО ШКОЛА МОБИЛИТИ ПЛУС ДООЕЛ Скопје – АМСМ
• Друштво за туризам,  транспорт и услуги БОБИЕМ ДООЕЛ Скопје
• Друштво за сообраќај, промет и обука на возачи СОФИ СКУЛ ДООЕЛ Скопје
• Друштво за промет, услуги и сообраќајно воспитување ТРИМОСКИ ДООЕЛ Скопје

Во овој случај, ќе се субвенционираат само оние лица кои ги исполнуваат горенаведените критериуми и уплатиле во авто школите на денот или по денот на објавување на Јавниот повик.

Приложувањето на потребната документација ќе се одвива во две фази од кои во првата, странките ќе треба да достават Барање за издавање Потврда за исполнување на критериуми, (кое се подигнува во архива на ул. Радика бр.9 барака 2 или на веб страната на општината – по електронски пат), заедно со Изјава за согласност за обработка на лични податоци.

Покрај оваа документација, заинтересираните ќе треба да достават и копија од лична карта како доказ за жителство и година на раѓање, како и копија од лична карта на двајцата родители, како доказ дека тие живеат минимум 3 години во општина Карпош.

Во втората фаза од процесот на доставување на потребната документација, потенцијалните корисници на субвенции ќе треба да достават Барање за субвенционирање за поврат на одреден износ на уплатени средства од вкупниот износ за  обука за теоретска и практична обука (по добивање на потврда за исполнување на критериумите). Исто така, во втората фаза ќе треба да се достават следниве документи:

• Потврда за исполнување на критериуми издадена од Општина
  Карпош,
• Оригинална фискална сметка за извршена уплата за теоретска и                  практична обука во автошколата,
• Потврда за остварени приходи добиена од работодавачот за последните три месеци. Потврдите треба да бидат со датум од месецот на поднесување на Барањето од двајцата родители
• За невработени лица – Потврда од Агенција за вработување дека родителот е евидентиран како лице кое бара работа – активен барател на работа или листа од ПИОМ дека родителот е невработено лице. Потврдите треба да бидат со датум од месецот на поднесување на Барањето за исполнување на критериуми

и

• Копија од трансакциска сметка.

Барањата со комплетна документација ќе се доставуваат до архивата на Општина Карпош (ул. Радика бр.9, барака 2). По поднесувањето на документите, подносителите ќе бидат известени во писмена форма.

Општината ги информира граѓаните дека Јавниот повик ќе трае до исцрпување на предвидените средства за оваа намена, а правото на субвенција е еднократно. За сите дополнителни информации, лицата можат да се обратат во Секторот за развој, на контакт телефоните кај овластените лица:

Никола Димовски 076/299-175 и Драгана Божиновска 070/410-627.