Градот Скопје во соработка со УНДП го уреди вториот зелен покрив во строгиот центар на градот – покривот на Домот на културата „Кочо Рацин“, попознат како Домот на градежници. Според проектот, на површина од речиси 400 квадратни метри се засадени над 30 различни видови садници – дрвја, средно и ниско зеленило кое е функционално распоредено, има тревна површина и вертикално зеленило на ѕидовите, а поставени се и клупи и канделабри.

Ова ново зелено катче денеска и официјално го отворија за посетители градоначалникот Петре Шилегов, постојаната претставничка на Програмата за развој на Обединетите нации (УНДП), Нарине Сахакјан, заменик-амбасадорот на Холандија во нашата земја, Роберт Декер, градоначалникот на општина Центар, Саша Богдановиќ и претседателката на Советот на Град Скопје, Љубица Јанчева.

„ По фантастичното искуство што го имавме со отворањето на зелениот покрив на Градскиот трговски центар ова е втора ваква површина што како јавен простор ја ставаме на користење за граѓаните. Таа се наоѓа во Малиот ринг, онаму каде што и тоа како ни е потребно зеленило. Постарите генерации скопјани се сеќаваат дека токму на овој простор се наоѓало летно кино, а граѓаните од околината можеле да уживаат во кинопретстави. Тоа е всушност и идејата на Градот, на оваа површина во текот на летниот период да организираме мини отворено кино, таканаречено немо кино во кое со слушалки ќе се гледа претставата, за да не пречиме на соседството. Ем ќе ги вратиме спомените, ем ќе го облагородиме овој простор“, рече градоначалникот Шилегов.

Проектот за изградба за зелениот покрив на Домот на градежници е финансиран од буџетот на Град Скопје во вредност од околу 18,5 милиони денари, а имплементиран е во соработка и со поддршка на УНДП.

Според постојаната претставничка на УНДП, Нарине Сахакјан, сè повеќе луѓе во светот живеат во градовите, тоа создава голем притисок врз животната средина и отвора предизвици за локалната самоуправа, па затоа УНДП секогаш се обидува да помогне.

„Поканете што повеќе луѓе да го посетат овој простор, да организираат настани, да дојдат со семејствата особено во овој период на ковид кога сите сакаме да излеземе на отворено“, рече Сахакјан.

Градоначалникот на Општина Центар Саша Богдановиќ го најави новиот проект за реконструкција на улицата „Народен Фронт“ во населбата Капиштец.

„Започнуваме со целосна реконструкција на улицата „Народен Фронт“, која е една од главните сообраќајници во населбата Капиштец. По завршувањето на реконструкцијата на улицата „Васил Ѓоргов“ со Град Скопје, сега ја започнуваме и втората најголема сообраќајница во Капиштец, за којашто од општинскиот буџет имаме планирано 40 милиони денари. Сакам да најавам дека како ќе се одвива реконструкцијата, ќе се обноват и тротоарите, а ќе се направи и резидентно паркирање за сите станари. Народен Фронт ќе биде уште една модерна улица во Општина Центар, која ќе биде изведена по примерот на улицата „Орце Николов“ во Дебар Маало. Ме радува фактот што оваа година ќе завршиме со реконструкција на повеќе од 15 улици во Центар, што претставува најголем број на реконструирани улици. Со ова покажуваме дека Општина Центар како локална самоуправа е стабилна, сигурна и има финансиски средства да ги реализира планираните проекти“, изјави Богдановиќ.

Со реконструкцијата, како што беше посочено, целосно ќе се уреди коловозната конструкција на површина од 11.542 метри квадратни, а ќе бидат опфатени и трите краци помеѓу зградите. Долж улицата „Народен Фронт“ ќе се реконструираат и подигнатите пешачки платоа и ќе биде поставено ново модерно лед-осветлување.

За проектот планирани се 40 милиони денари од Буцетот на Општина Центар за 2021 година, а градежните активности ќе започнат во месец јуни.

Во наредниот период, Општина Центар започнува со реконструкција на улиците Јордан Хаџи-Константин Џинот, Ристо Шишков, Дебарца, Драмска, Ленинова, Мирослав Крлежа, Теодосиј Гологанов, Рајко Жинзифов, Елисије Поповски Марко, Алберт Ајнштајн, Андон Дуков, Дон Бас и Козара, кои ќе добијат модерен изглед по примерот на улицата Орце Николов, најавува Богдановиќ.

Со почеток од утре, 17 мај, па во наредните три месеци, скопјани ќе имаат можност бесплатно да вежбаат и да се рекреираат на отворено со тим од стручни лица од Факултетот за физичко образование, спорт и здравје. Секој работен ден, по 18 часот, на различни локации на јавните површини и парковите во Скопје ќе се вежба аеробик, фитнес, пилатес, зумба, спортска јога и атлетика. Проектот „Скопје вежба“ кој има цел да им помогне на граѓаните да го подобрат своето здравје и да ја одржат физичката форма го спроведува Град Скопје во соработка со Факултетот за физичко образование, спорт и здравје, најави градоначалникот Петре Шилегов.

„Градот Скопје преку професионални тренери ќе им овозможи на граѓаните на Скопје бесплатна физичка активност во текот на попладневните часови, од понеделник до петок. Нашата цел е кај помладите генерации да всадиме навики за физичка активност, а кај постарите генерации да стимулираме еден поинаков и поздрав начин на живеење. Сакам да се заблагодарам на Факултетот за оваа заедничка акција со која ќе овозможиме на Скопје и на скопјани еден поинаков пристап кон физичката култура. Се надевам дека на крајот на јули кога ќе заврши оваа активност ќе може со задоволство да ги констатираме позитивните бројки на граѓани кои ја искористиле оваа можност“, рече Шилегов.

Деканот на Факултетот за физичко образование, спорт и здравје, Ленче Алексовска – Величковска изрази задоволство што Градот Скопје препозна партнер во нивната институција која постои 40 години.

„Ќе изведуваме физичка активност во оваа пандемија која за жал се уште трае. Ќе ги почитуваме сите препораки на Министерството за здравство и Комисијата за заразни болести. Првичната цел е да ја подигнеме свеста за физичката активност кај сите категории – и деца и адолесценти и возрасни. Тука зад мене се сите универзитетски професори, експерти кои што ќе бидат вклучени, зашто не е само да се вежба, туку треба да се одговори на многу прашања – колку да се вежба и како да се вежба за да се сочува и менталното и физичкото здравје“, објасни Величковска.

За дневниот распоред на вежби во текот на месеците мај, јуни и јули граѓаните ќе можат да се информираат на Интернет страницата на Град Скопје www.skopje.gov.mk, како и преку социјалните мрежи на Град Скопје. За вежбање се предвидени 6 локации -две локации во Градскиот парк, паркот кај„Три Бисери“ во Аеродром, паркот во Ѓорче Петров, кај Веро Тафталиџе во Карпош и паркот во Чаир.

Градот Скопје финансиски го поддржува овој спортско рекреативен и забавен проект со 500.000 денари.