Состојбата во државата по обилните снежни врнежи е стабилна. Нема информации за завеани села и блокирани граѓани, соопшти Министерството за транспорт и врски.

Во понеделник, 29ти декември, се одржа координативен состанок на Кризниот штаб за надминување на состојбата предизвикана од обилните врнежи од снег со кој претседаваше министерот за транспорт и врски, Миле Јанакиески. 

Тој апелираше на постојана мобилност од страна на надлежните, ги повика и општините максимално да ги искористат расположливите ресурси во вакви ситуации и потенцира доколку им е потребна дополнителна помош на локалните власти тоа да го сторат во координација со ЦУК. 

На состанокот беше кажано дека до денеска нема информации пристигнати до Центарот за управување со кризи ниту до Министерството за внатрешни работи за завеани села или блокирани граѓани. 

„Ги повикувам сите граѓани кои имаат проблеми на автопатиштата да се јават на бесплатниот телефонски број 196 во АМСМ како и на бесплатниот број 195 во Центарот за управување со кризи за да можат надлежните веднаш да реагираат“, истакна Јанакиески. 

Тој додаде дека од УХМР има најава дека времето ќе се стабилизира, но за следниот викенд има најави за можно повторно влошување на временската состојба и дека Кризниот штаб ќе биде во постојана мобилност. 

Исто така, во текот на денот, Јанакиески со дел од Координативното тело ќе извршат посета на општините во западниот дел на земјава каде имаат проблеми со снежното невреме. Ќе извршат увид и на патниот правец Кичево-Охрид кај месноста Извор-Пресека каде што минатата ноќ имаше најмногу проблеми и застој на сообраќајот. 

На состанокот беше потенцирано дека проблемите со електричната енергија во Охрид, Ресен и Струга ќе се санираат во текот на денот, а екипи интензивно работат на отстранување на дефектот на далекуводот во Дебар. Од електроенергетските компании уверија дека не постои можност од недостаток на електрична енергија и дека има доволен капацитет за следниот период. 

На состанокот на Кризниот штаб, покрај Јанакиески, присуствуваше и министерот за одбрана Зоран Јолевски, началникот на Генералштабот, генерал Горанчо Котески, надлежните од Центарот за управување со кризи, Управата за хидрометаролошки работи и други институции.крај/мф