Игнорирањето на претставниците на националните заедници кои се уставни конституенти, не претставува ништо друго, туку соодветна порака дека во Република Македонија се подготвуваат активности кои треба да предизвикаат промени во уставноправниот поредок на двонационална основа и дека помалите национални заедници нема што да бараат во таквата констелација на внатрешно политичките односи, смета челникот на Демократската партија на Србите во Македонија (ДПСМ), Иван Стоиљковиќ.
 

„Со моите ставови на најотворен начин ги запознав претставниците на меѓународната заедница во Македонија, кои ветија дека пропустите и грешките ќе бидат исправени, но ете, од тогаш до денес по овие прашања ништо се нема случено. Сé тече по онаа старата – дека меѓународната заедница е во право, дури и кога кардинално греши“, вели Стоиљковиќ

Челникот на ДПС има големи забелешки и на севкупното игнорирање на партиите на помалите етнички, кои инаку се конститутивен елемент на македонската држава, од страна на претставниците на меѓународната заедница.

„Изгледа навистина неверојатно дека не само Демократската партија на Србите во Македонија, туку и сите други партии на националните заедници веќе подолго време се исклучени од сите политички процеси во Македонија кои се одвиваат под патронатот на меѓународната заедница“, додава Стоиљковиќ

Потсетува дека посредувањето на ОБСЕ во анализата на спроведувањето и можностите за унапредување на Охридскиот рамковен договор се одвиваше без споменатите партии на помалите етнички заедници во земјата наброени во Преамбулата на Уставот, и само во соработка со албанските партии.

„Четирите најголеми партии, двете македонски и двете албански, го договараа и таканаречниот Пржински договор, исто така, без учество на партииите на националните заедници, кои не беа повикани дури ниту на информативно ниво. Германскиот дипломат Хајндл во својство на посредник за решавање на кризата во Македонија се среќаваше со многу помали и помалку значајни партии, па дури и со вонпарламентарни, но не и со претставниците на партиите на националните заедници во Македонија“, заклучува Стоиљковиќ.

Притоа им се обраќа на критичарите, за коишто вели дека шпекулираат со невистини, на коишто им го упатува прашањето дали искрено мислат дека ќе дозволи некој друг да ја води или евентуално да дава согласност за политиката која Демократска партија на Србите во Македоније ќе ја води и застапува.

„Нашата политика никогаш не била, ниту некогаш ќе биде безнадежно провинцијална и исклучива, и никогаш нема да се откажеме од ризикот кој го носи сопственото мислење. Сме го покажале тоа многупати“, порачува./крај/мф/сн

Извор: Макфакс