Македонија
Судот го одби предлогот на СЈО за мерки за претпазливост за Груевски, Јанакиески и Трајковски
Судија на претходна постапка го одби во петокот попладнето како неосновано барањето на Специјалното јавно обвинителство (СЈО за спроведување мерки на претпазливост кон осомничените во процесот „ТНТ“ , поранешниот премиер Никола Груевски, екс министерот за транспорт и врски, Миле Јанакиески, и градоначалникот на скопската општина Гази Баба, Тони Трајковски, соопшти Основниот суд Скопје 1 Скопје.
Притоа од Судот појаснуваат дека Специјалното јавно обвинителство за гонење на кривични дела поврзани и кои произлегуваат од незаконското следење на комуникациите, има право да поднесе жалба на оваа одлука во род од 24 часа.
Претходно СЈО за сите тројца споменати во случајот за уривањето на објектот „Космос” во сопственост на бизнисменот и челник на политичката партија ПЕИ, Фијат Цаноски, побара одземање на нивните патни исправи, како и мерка на претпазливост, вклучително и домашен притвор.
Груевски, Јанакиески и Трајковски во петокот попладнето се појавија на распит пред судија на претходна постапка, и по давањето на исказот за медиумите Груевски и Трајковски изјавија дека не се чувствуваат виновни и оти станува збор за обид на опозицијата и СЈО да ги оцрнат.
Специјалното јавно обвинителство во април годинава го презентираше случајот „ТНТ“ за уривањето на објектот „Космос“ во 2011 година, што го смета за наводна политичка одмазда кон Цаноски./крај/мф/ффс
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
(Фото) Николоски: Интензиво работиме на реконструкцијата на превојот Пресека во должина од 11 километри
Интензивно работиме на рехабилитација на превојот Пресека и очекувам до месец февруари целиот патен правец да биде завршен и да ја подигнеме безбедноста во сообраќајот, истакна заменик претседателот на Владата и министер за транспорт Александар Николоски.

Вицепремиерот Николоски, заедно со директорот на ЈП за државни патишта Коце Трајановски, пратеникот Ѓорѓи Сајкоски и градоначалниците од Кичево и Дебрца извршија увид на градежните работи на превојот Пресека.

Тој потенцира дека се работи за проект за рехабилитација на 15 километри патен правец, што е од огромно значење за подобрување на безбедноста во патувањето и ќе го олесни поврзувањето на главниот град со Охрид и Струга.

„Се работи на 11 километри кои целосно се рехабилитираат. Можам да кажам дека во однос на рехабилитацијата на патниот превој Пресека, кој што претставува главна артерија, не само за спојување на Кичево со Охрид и Струга, туку генерално и за спојување на Скопје со Струга и Охрид, се работи со одлична динамика и до февруари месец би требало целиот патен правец да е завршен, што многу ќе помогне додека не се пушти целиот автопат Охрид-Кичево, побезбедно и побрзо да се патува, имајќи предвид дека патниот превој Пресека беше во една навистина катастрофална состојба“, изјави вицепремиерот Николоски.

Македонија
Намалена видливост на неколку патни правци
Поради појава на магла се бележи намалена видливост до 100 метри на патниот правец Страцин – Кратово, од 30 до 50 метри на патниот правец Скопје – Тетово, од 50 до 100 метри на патните правци Велес – Скопје, Скопје – Велес и Куманово – Скопје.
Сообраќајот на државните патишта се одвива по претежно влажни коловози.
Интензитетот на сообраќај на патните правци надвор од градските средини е умерен. На граничните премини од македонска страна, нема подолги задржувања за влез и излез од државата.
Македонија
Дел од Кисела Вода денеска без струја
Од ЕВН Македонија АД известуваат дека денеска без електрична енергија ќе останат:
– во периодот од 09:00 до 15:00 часот корисниците на улица Христо Татарчев 14 према објект со куќен број 30. (општина Кисела Вода)

