Македонија
Терористите од Куманово планирале напад на затворот во Подуево

Водачите на вооружената група којашто се судри со полицијата во Куманово, планирале напад на затворот кај Подуево за да ги ослободат затворениците кои издржуваат високи казни.
Врз основа на информации и документи на Косовската информативна агенција и косовската полиција, Бег Ризај и Мирсад Ндрецај, како водачи на групата од 44 лица планирале да го нападнат добро обезбедениот затвор во Грдовци кај Подуево, од каде сакале да ослободат две лица за кои се смета дека се најопасни на Косово, пишува приштинскиот дневен весник Koha Ditore.Станува збор за затвореници кои отслужуваат казни за повеќе злосторства, меѓу кои убиства.Групата била следена од 2013 година, а деталите за нивните планови произлегуваат од надгледувањето на нивните средби со лица осомничени за исламски екстремизам на Косово. Koha Ditore, повикувајќи се на наводни докази од косовското разузнавање и полицијата, пренесува дека тројцата убиени косовски Албанци во инцидентот во Куманово и македонскиот државјанин наводно соработувале со македонската Управа за безбедност и контраразузнавање да предизвикаат инцидент за којшто за возврат би добиле пари.Поранешниот припадник на ОВК и водачот на вооружената група, Бег Ризај кој беше убиен во судирот со полицијата во понеделникот беше погребан во меморијалниот центар во општината Дечани со високи почести.На комеморацијата којашто ја организирала општината, присуствувале неговите соборци од поранешната ОВК во униформи на расформираната организација. Ризај бил офицер на специјалната единица „Црни орли“ на ОВК.Голем број граѓани, пратеници од сите партии застапени во косовското Собрание, како и личности од јавниот живот на Македонија и Албанија присуствувале на погребот. Телото на Ризај било замотано со знаме на Албанија. Сите говорници на погребот го нарекле „Ризај херој на албанскиот народ“.Двајца водачи на групата беа убиени, а останатите уапсени по судирот со македонската полиција во Куманово кога загинаа осум полицајци./крај/мф/ффс
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
На Табановце за излез од државата се чека по 20 минути

Сообраќајот на државните патишта се одвива непречено, по суви коловози, информира АМСМ.
Интензитетот на сообраќај на патните правци надвор од градските средини е зголемен, поради летните одмори се бележи зголемена фрекфенција на возила, на ГП Табановце времето на чекање за излез од државата е околу 20 минути, додека на останатите граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Притвор за уште едно лице од групата која е под истрага за злосторничко здружување, даночно затајување и перење пари

Управата за финансиска полиција информира дека во текот на вчерашниот ден, 28.08.2025 година, на граничниот премин „Долно Блаце“, при обид за влез во РСМ, е лишен од слобода С.А., државјанин на Р.Косово, за кој постои основано сомнение дека сторил кривично дело „Злосторничко здружување“ (чл.394 ст.2) и кривично дело „Даночно затајување“ (чл.279 ст.3).
Од страна на овластени службени лица од Управата за финансиска полиција, лицето веднаш било превземено и изведено пред судија на претходна постапка од каде му била определена мерка притвор во времетраење од 30 дена, по што истиот е спроведен во КПУ Куманово.
Притворањето, појаснуваат надлежните, е продолжение на акцијата од 25 август, кога беа притворени седум лица, како резултат на сложена предистражна постапка спроведена од страна на Управата за финансиска полиција, под раководство и во координација со надлежен јавен обвинител од ОЈО ГОКК, во рамки на која беа превземени низа мерки и активности и беше обезбеден обемен доказен материјал, што резултираше со поднесување на кривична пријава против 13 физички лица и 10 правни лица, за сторени кривични дела: злосторничко здружување, даночно затајување, даночна измама и перење пари и други приноси од казниво дело, со што е предизвикана огромна штета на државниот буџет во висина од над 430 милиони денари.
Македонија
Обвинение за насилство за таткото кој повреди 15-годишни деца на фудбалскиот натпревар во Штип

Основното јавно обвинителство Штип поднесе Обвинителен предлог против едно лице за кривично дело – Насилство од член 386 став 4 во врска со став 3 и став 1 од Кривичниот законик.
На 24 август, на фудбалскиот стадион “Бело Брдо“ во Штип, за време на фудбалскиот натпревар помеѓу пионерските екипи на фудбалските клубови “Брегалница“ од Штип и “Шкупи“ од Скопје, обвинетиот со грубо насилство ја загрозил сигурноста на оштетените две 15-годишни деца, кои биле играчи во тимот на ФК “Брегалница“.
На децата им нанел телесни повреди, а кај оштетените, останатата присутна публика и во јавноста предизвикал чувство на несигурност, загрозување и страв.
Настанот се случил во 89-тата минута од натпреварот, која судијата поради прекршок (фаул) доделил втор жолт картон со што го исклучил од игра синот на обвинетиот, кој играл за „Шкупи“. Незадоволен од одлуката, најпрво синот се однесувал неспортски и со тупаници и со удар со нога се обидел да се пресмета со еден од фудбалерите на „Брегалница“. Тогаш на теренот влегол таткото и со тупаници и клоци започнал да ги удира двете деца, нанесувајќи им телесни повреди. На игралиштето влегле и други лица од публиката, кои спречиле натамошна ескалација на настанот.
Јавниот обвинител до Основниот суд во Штип достави и предлог за продолжување на претходно определената мерка притвор за обвинетиот.