Македонија
UGI Wholesale стана водечки играч на регионалниот телекомуникациски пазар

За само две години од создавањето на новата деловна единица на Јунајтед Груп – UGI Wholesale (“УГИ Големопродажба”) се етаблираше како водечки играч на телекомуникацискиот пазар на големо во јужна, централна и источна Европа.
Со седиште во Грција и со канцеларии и во Бугарија, Хрватска, Словенија, Србија, Босна Херцеговина и Црна Гора, дедицираната деловна единица на UGI Wholesale чија задача е да ги координира активностите на големопродажба на телекомуникациите, успешно испорача многу сложени проекти со што се етаблира како регионален лидер во областите на услуги за податоци, роаминг и мобилни и големопродажни говорни услуги.
UGI Wholesale преку својата подружница Vivacom Bulgaria EAD, стана одобрен телекомуникациски провајдер за GÉANT – европската соработка на национални истражувачки и образовни мрежи. GÉANT, кофинансирана од Европската Унија, го поткрепува информативниот екосистем на инфраструктура и услуги за унапредување на истражувањето, образованието и иновациите на глобално ниво. Како поддршка на мисијата на GÉANT и за само две години, UGI Wholesale ги презеде и успешно ги испорача следните проекти:
● Лот што ги поврзува Загреб и Љубљана со темно влакно, доделен во 2021 година, испорачан во 2022 година.
● Четири лота што ги поврзуваат Загреб-Белград-Софија-Солун и Софија-Букурешт со темно влакно. Доделени во 2022 година, сите четири лота беа успешно испорачани на крајот на 2022 година.
● Три лота кои се поврзуваат со повеќе услуги за пренос 100G Подгорица-Загреб, Софија-Истанбул и Истанбул-Солун. Доделени во 2022 година, испораката на договорените услуги е предвидено да биде во 2023 година.
По успешното завршување на овие проекти, соработката со GÉANT дополнително се унапреди преку преку дополнителната награда за услуга за пренос од 100G што ги поврзува Тирана-Софија – која моментално е во фаза на имплементација. Дополнително, завршен е и тендерот за UGI Wholesale за обезбедување услуга за пренос 100G што поврзува Софија-Скопје како партнер.
За време на настанот TNC23 кој беше организиран од GÉANT и домаќин на RASH, националната истражувачка и образовна мрежа на Албанија, што се одржа претходно овој месец во Тирана, UGI Wholesale стана членка на Програмата за комерцијално партнерство на GEANT.
Паоло Фичини, извршниот директор на UGI Wholesale изјави: „Во UGI Wholesale сме многу горди што нашите напори и успешното завршување на сложените проекти беа препознаени и прославени од GÉANT, кој има задача да испорача една од најголемите европски иницијативи. Многу сме среќни што успеавме во оваа мисија и навремено ги исполнивме очекувањата на нашите партнери. Нашата организација прерасна во многу силен регионален играч кој обезбедува висококвалитетни резултати на големи и тешки проекти. UGI Wholesale е доверлив и кредибилен партнер од регионот“.
Инаку, телекомуникациската мрежа на Јунајтед Груп се протега низ цела Европа, покривајќи ги Холандија, Германија, Австрија, Словенија, Хрватска, Босна, Србија, Бугарија, Црна Гора и Грција и нејзината мрежа со оптички влакна има пристап до вкупен пазар од повеќе од 40 милиони луѓе, нудејќи покриеност на центарот за податоци што го прави единствениот независен преносник во регионот со вака обемен отпечаток. Во нашата земја, во рамки на Јунајтед Груп, работи компанијата Тотал ТВ.
(ПР текст)
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Скопје
Пожарот кај хотелот „Њу Стар“ локализиран, ЦУК бара итни мерки за дивата депонија во Визбегово

Пожарот кој избувна во близина на хотелот „Њу Стар“ во скопската населба Визбегово е локализиран, но на терен и понатаму дежураат две екипи на Територијалната противпожарна единица на Град Скопје.
Како што информира Центарот за управување со кризи (ЦУК), во денешната интервенција биле ангажирани вкупно седум противпожарни возила и 20 пожарникари. Пожарот зафатил површина од околу 5000 квадратни метри, при што биле опожарени жито, еден магацин со градежни материјали, како и дворот на хотелот.
„Денеска, при повторно разгорување, пожарот се прошири до хотелот „Њу Стар“, како и до околните куќи, со што директно беа загрозени животите на граѓаните“, стои во објавата на ЦУК на Фејсбук.
Оттаму апелираат до сите надлежни институции и локалните самоуправи итно да се вклучат со конкретни чекори и да се стави крај на проблемот со дивите депонии, кои, според нив, претставуваат сериозна опасност по животната средина и јавното здравје.
ЦУК информира дека директорот Мухамед Али денеска испратил ново барање до надлежните институции со цел итно преземање активности за конечно решавање на овој проблем.
„Проблемот со оваа дива депонија трае подолг временски период и претставува реална закана за здравјето, безбедноста и добробитта на граѓаните, како и сериозна оперативна оптовареност за БППЗ, која често е ангажирана на истата локација“, посочуваат од ЦУК.
Оттаму потсетуваат дека во текот на изминатата недела директорот Али повеќекратно испратил официјални барања за интервенција, но засега нема конкретен одговор од надлежните.
Македонија
Мицкоски ја доби тужбата против Славјанка Петровска за клевета

Граѓанскиот суд во Скопје донел правосилна пресуда во корист на премиерот Христијан Мицкоски, утврдувајќи дека пратеничката од СДСМ и поранешна министерка за одбрана, Славјанка Петровска, јавно ширела невистини и клевети против него.
Како што информира премиерот преку објава на социјалните мрежи, судот ѝ наложил на Петровска не само да се извини, туку и да ја објави пресудата во медиумите.
„Ова е уште една потврда дека на лагата ѝ се кратки нозете. Судот потврди дека поранешната министерка и актуелна пратеничка ширела лаги и клевети против мене. Вистината мора да излезе на виделина“, напиша Мицкоски.
Тој ја искористи приликава и за поширока критика на политичката култура на неговите опоненти.
„Очигледно, лажењето како синдром на политичката култура на СДСМ не престанува да биде нивен заштитен знак. Со оваа пресуда се потврдува не само дека лажат, туку и дека не се промениле. Продолжуваат да го потценуваат народот“, порача премиерот.
Според Мицкоски, оваа судска победа не е лична, туку борба за вистината и достоинството на секој човек кој се спротивставува на политичките манипулации.
„Ова не е моја лична битка, ова е битка за принципи, за вистината, за достоинството на секој поединец кој не дозволува неказнето да му се лепат лаги“, стои во неговата објава.
Тој додава дека продолжува да работи со посветеност и дека „лагите ќе паднат, а вистината победува“.
Скопје
Град Скопје: Обвинителството го отвори првиот случај за дивоградбите во Чаир

Основното јавно обвинителство ја започна постапката по првата пријава за фалсификати поврзани со градби во Општина Чаир, информираа денеска од Град Скопје.
Според соопштението од прес-службата, истрагата се однесува на сомневања за фалсификување на документи и незаконска легализација, а се поврзува со поранешниот градоначалник на општината, Висар Ганиу.
„Основното јавно обвинителство ја започна постапката по првата пријава со фалсификатите. Таму веќе се водат уште две постапки претходно започнати за Висар Ганиу, првата за фалсификување на целата архивска книга со броеви и барања за легализации, а втората за уште еден случај каде што незаконски се легализирале објекти со соучесник“, стои во соопштението.
Од Град Скопје испратија и повик до Основното јавно обвинителство за гонење на организиран криминал и корупција, со барање конечно да започне постапка против, како што велат, „организираната криминална банда“ во Чаир.
„Очекуваме и Основното јавно обвинителство за гонење на организиран криминал и корупција да се одважи и да почне да постапува против организираната криминална банда во општина Чаир, која овозможувала градење незаконски на небезбедни згради со црни пари од нелегални извори“, велат од Град Скопје.
Во реакцијата се посочува и дека некои од лицата кои се појавуваат како сопственици на овие објекти сега се милионери, а официјално се прикажани како градители на зградите уште од пред 5, 6, 10, па и 11 години.