Македонија
Успешните избори – сигнал за видлива ЕУ перспектива

На покана на тројца министри за надворешни работи од земји членки на ЕУ – министрите за надворешни работи на Унгарија, Петер Сијарто, на Австрија Себастијан Курц и на Словенија Карл Ерјавец во понеделникот во Брисел се одржа работен појадок на министрите за надворешни работи на земјите членки на ЕУ, на кој учествуваше и еврокомесарот Јоханес Хан.
На работниот појадок учествуваше заменик претседателот на Владата на Република Македонија и министер за надворешни работи Никола Попоски кој истакна дека успешното спроведување на изборите и огромната излезеност претставува аргумент во насока на повторно отворање на ЕУ перспективите.
„Приоритетите за следниот период секако ќе бидат економијата, приближување со соседите, особено оние кои се веќе во ЕУ и евро-атлантските интеграции”, истакна Попоски.
Посочи дека е неопходно да се искористи моментот за внатрешно средување на политичката клима, но и за напредок кон преговори за членство во ЕУ.
„Ова носи одговорност за нас во Република Македонија сами да ги решаваме несогласувањата и да се посветиме на реформите, но носи и одговорност кон секој свесен политичар во ЕУ дека стабилна Европа, минува преку стабилен Балкан, а Македонија е клучна за неговата стабилност”, заклучи Попоски.
На маргините на состанокот, Попоски оствари и билатерални средби состанок со негови колеги од ЕУ./крај/мф/бб
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Дел од Карпош денеска без вода

Регионалниот центар за управување со кризи на Град Скопје, по добиеното известување од ЈП Водовод и канализација, информира дека, денеска поради санирање појавен дефект на водоводна мрежа со пречник Ф-1 цол на ул. Копенхагенска, крстосница со ул. Стокхолмска во населба Тафталиџе, прекинато водоснабдување ќе имаат корисниците од улиците: Копенхагенска, Стокхолмска, Софиска, Његошева, Гаврил Лесновски и Петар Драганов во општина Карпош.
Водоснабдувањето ќе биде прекинато од 11:30 часот до завршување на интервенцијата.
Македонија
Аеродром, Сопиште и Зелениково денеска без струја

Регионалниот центар за управување со кризи на Град Скопје, по добиеното известување од ЕВН, информира дека поради планирани зафати во електро дистрибутивната мрежа, денеска, без напојување со електрична енергија ќе останат:
· од 08:00 до 15:00 часот, корисниците од дел од с. Долно Лисиче, општина Аеродром;
· во истиот термин од 08:00 до 15:00 часот, корисниците од објектите во околината на зградата на Алкалоид на ул. 3 -та Македонска Бригада., општина Аеродром;
· од 09:00 до 12:00 часот, корисниците од дел од с. Горно Соње, поточно улиците со бр. 10 и бр. 12, општина Сопиште;
· од 09:00 до 16:00 часот, корисниците од селата: Дејковец и Добрино, општина Зелениково.
Македонија
Променливо облачно со повремени врнежи од дожд и со ретка појава на грмежи

Времето денеска ќе биде променливо облачно со повремени локални врнежи од дожд и со ретка појава на грмежи. Ќе дува слаб до умерен северен ветер Минималната температура ќе биде во интервал од 4 до 10, а максималната ќе достигне од 11 до 18 степени.
Во Скопје, променливо облачно со повремен дожд и со услови за ретки грмежи. Ќе дува слаб до умерен ветер од северен правец. Минималната температура ќе се спушти до 9, а максималната ќе достигне до 15 степени.
Времето во наредните денови
Продолжува периодот на променливо облачно време со повремени врнежи од дожд. Денеска и во четврток ќе има изолирана појава, а од петок на повеќе места ќе биде нестабилно со пороен дожд и грмежи. Од недела температурите ќе бидат во опаѓање.