(Видео) Кузеска: Мицкоски ја ангажира израелската „Black Cube“ – фабриката на Орбан за валкани афери

Портпаролката на СДСМ, Богданка Кузеска, обвини дека ВМРО-ДПМНЕ и премиерот Христијан Мицкоски во паника ја ангажирале  „Black Cube“ приватната израелска компанија, која Кузеска ја нарече Орбановата фабрика за валкани афери.

„Вчера Алфа телевизија, дел од мрежата на Орбановите медиуми, објави уште една таканаречена ‘ексклузивна’ афера против претседателот на СДСМ, д-р Венко Филипче. Ништо ново. Дел од систематска, валкана операција која ја води криминалната група ВМРО со помош на приватната израелска компанија ‘Black Cube’, која ја нарекуваат и ‘приватен Мосад’. Тоа е истата компанија која Орбан ја користи со години, а ја донесе и за Мицкоски во Македонија“, тврди Кузеска.

Таа вели дека ВМРО-ДПМНЕ наместо да одговарат за економската катастрофа, за застојот на европскиот пат и за криминалните тендери, тие прават сè за да го дискредитираат СДСМ и да го дефокусираат вниманието на граѓаните. Кузеска вели дека поддршката на ВМРО-ДПМНЕ паднала за над 150.000 гласа.

„’Black Cube’ е приватна фирма составена од поранешни израелски разузнавачи, позната по тајни снимки, фабрикување афери и валкани политички операции, особено во Унгарија и Словенија. Орбан ја ангажирал ‘Black Cube’ пред изборите 2018 и 2022 година, како и оваа година пред изборите кои ги изгуби. Медиумите ширум Европа пишуваа за нивните активности, како нивните агенти со лажни идентитети и лажни компании мамеле активисти и новинари, тајно ги снимале, а снимките потоа се пуштале во провладини медиуми за да се дискредитира невладиниот сектор и политички неистомисленици. Еве дел од тие натписи. Оваа година биле задолжени за Петер Маѓар, идниот премиер на Унгарија. Сакале да објават снимки од неговата спална соба и да направат лажна афера“, рече Кузеска.

Таа рече дека пред неколку недели, пред парламентарните избори во март оваа година, „Black Cube“ повторно интервенирала, овој пат во Словенија, во интерес на Јанес Јанша. „Словенечката влада ова го квалификувала како директно странско мешање во изборите“, рече Кузеска.

Таа вели дека претставници на „Black Cube“ имале состанок со претставници од ВМРО и со еден голем бизнисмен, близок до Христијан Мицкоски и финансиер на ВМРО, во луксузен хотел во Скопје.

„Ние нема да дозволиме ‘Black Cube’. Орбан и Мицкоски да ја одредуваат иднината на Македонија. Бараме од Обвинителството да отвори истрага за ангажирањето на ‘Black Cube’ од страна на Мицкоски и ВМРО-ОКГ. Јавна објава сите странски операции на територија на државата. АНБ ова не смее да го дозволува“, рече Кузеска.