Делегација од Одделот за внатрешна контрола, криминалистички истраги и професионални стандарди предводена од помошник на министерот м-р Ивица Станковски, во организација на DCAF, Женевски центар за управување со безбедносниот сектор, одржа работна посета на албанската Агенција за надзор на полицијата. Делегацијата на Одделот беше пречекана од директорот на Агенцијата за надзор на полицијата Клевис Ќосе.

За време на посетата се разговараше за зајакнување на професионалниот интегритет на вработените и унапредување на внатрешните капацитети. Страните разменија искуства за организацијата и функционирањето на институциите за полициски надзор, методологиите за оперативни истраги, постапувањето по претставки од граѓани, механизмите за отчетност, како и предизвиците поврзани со зголемувањето на транспарентноста и јавната доверба.

Од особена важност беше истакнато зајакнување на регионалната соработка и споделување на најдобрите практики во областа на полицискиот надзор.

Претставниците на Агенцијата го презентираа албанскиот модел на полициски надзор, организациската структура и работните практики на Дирекцијата за истраги и Дирекцијата за инспекции и претставки, додека делегацијата од Одделот ја претстави организациската структура и ги сподели искуствата од приоритетите на Планот за професионален интегритет 2026–2028.

Пратеничката на СДСМ, Славјанка Петровска, на денешната собраниска седница за интерпелација на министерот за земјоделство Цветан Трипуновски порача дека зад гласните ветувања на Трипуновски останале само лаги, скандали, корупција и целосно разочарување кај земјоделците.

„Велевте дека нема компромис со доброто на земјоделците, сточарите, нивните семејства. Ветувавте чуда, преродба, правна држава, систем. 3% од сето тоа кажано да го реализиравте, денеска пред Собрание ќе беа земјоделците и сите тие за кои велите дека сте сработиле во ваша поддршка“, истакна Петровска.

Таа посочи дека дури ни пратениците од владејачкото мнозинство не покажуваат подготвеност да го бранат министерот.

„Не само што ги нема нив, погледнете ја салата. Вашите другари од истата партија ги нема во салата да ве бранат“, рече Петровска.

Во своето обраќање таа отвори сериозни прашања за корупција, непотизам и злоупотреби во ресорот со кој раководи Трипуновски.

„Двајца функционери од секторот земјоделие, од кои едниот лично назначен со ваш потпис, беа уапсени за поткуп. Директорот на инспекторатот, оној што е назначен со ваш потпис, беше фатен со рекордни 50.000 евра“, нагласи Петровска.

Дополнително, таа потсети и на сомнежите за непотизам уште на самиот почеток од мандатот на Трипуновски.

„Само десетина дена откако бевте назначен за министер во 2024 година, токму првиот договор за закуп на земјиште го склучивте со ќерката на директорот на Платежната агенција. Тоа се правилата по кои функционирате“, посочи Петровска.

Пратеничката нагласи дека министерот нема преземено никаква политичка одговорност и покрај серијата скандали и проблеми во секторот.

„Вие бевте известени дека средствата од ИПАРД 3 програмата се блокирани, прекината е исплатата. Не ви се тоа доволни показатели од морална причина да заминете од функцијата? Седум години ве слушавме како држите предавања за морал и етика и како велевте дека и за најмала ситница треба да има политичка одговорност“, рече Петровска.

Таа посочи дека земјоделците и денес ги чекаат субвенциите што власта постојано ги ветува.

„Денеска најчесто прашувано прашање помеѓу земјоделците е – каде се субвенциите? Земјоделците велеа дека се доцни. Земјоделците велеа дека неисплатата на субвенциите им влијае на тоа што тие треба да го прават понатаму, да инвестираат. Не го направивте тоа“, истакна Петровска.

Осврнувајќи се на состојбите во оризопроизводството, таа потсети дека реалноста е далеку од ветувањата што Трипуновски ги давал како опозиционер.

„Колку оризова арпа се наоѓа во амбарите? 5.000 тона. Дали цената е толкава колкава што беше кога Цветан Трипуновски беше во опозиција и велеше дека ќе биде 34 денари? Не. На теренот состојбата е многу поинаква“, нагласи Петровска.

На крајот, таа порача дека интерпелацијата е барање за политичка одговорност поради лагите, скандалите и катастрофалните резултати во земјоделството.

„Оваа интерпелација не е напад врз личност. Ова е барање за политичка одговорност. Инспирирани сме од сите лаги коишто ги кажувавте изминатите две години. Би било доблесно заради ова малкуте што ги набројав досега веќе да си имавте поднесено оставка“, порача Петровска.

На денешната собраниска седница се обрати пратеникот од редовите на ВМРО-ДПМНЕ, Петар Ристески кој оцени дека интерпелацијата поднесена од опозицијата против министерот за земјоделство, шумарство и водостопанство, Цветан Трипуновски, не се темели на факти и претставува обид за дефокусирање на јавноста од состојбите што, според него, ги наследила актуелната власт.

Ристески истакна дека наследството од претходната власт предводена од Љупчо Николовски е видливо преку заостанати долгови, незадоволство кај земјоделците и сомнежи за незаконско работење.

„Оваа интерпелација поднесена од опозицијата против министерот за земјоделство шумарство и водостопанство, Цветан Трипуновски не се темели на никакви реални факти ниту пак на издржани бројки, таа е класичен пример на политички маневар за дефокусирање на јавноста од вистинската одговорност за пустошот, долговите и девастацијата што во земјоделството ги остави претходната расипничка власт на СДС предводена од поранешниот министер Љупчо Николовски“, рече Ристески.

Ристески упати остри критики кон поранешниот министер за земјоделство, Љупчо Николоски тврдејќи дека зад себе оставил финансиски и институционални проблеми во ресорот.

„Наследството на СДС и Љупчо Николовски е егзактно мерливо преку празни каси, незадоволни земјоделци кои со денови протестираа по патиштата и сериозни сомнежи за енормен криминал. Поранешниот министер Љупчо Николовски се соочува со сериозни сомнежи и кривична пријава за злоупотреба на службената положба и овластување. Оваа пријава е поврзана со незаконска и нетранспарентна распределба на дури 50 милиони денари, односно над 820,000 евра државни пари од буџетот на Република Македонија. Овие средства кои беа законски наменети за поддршка на малите семејни винарии и микропроизводители на вино биле доделувани спротивно на прописите и без соодветна правна основа. Тоа е класичен пример за буџетски криминал, грабеж директно на грбот на македонските земјоделци“, истакна Ристески.

Во своето обраќање, Ристески ја истакна работата на актуелниот министер Трипуновски, наведувајќи дека Министерството за земјоделство за краток период постигнало конкретни резултати во стабилизирањето на секторот.

„Актуелниот министер Трипуновски покажа како се работи одговорно, домаќински и транспарентно, за рекордно кратко време ова министерство испорача конкретни, мерливи и видливи резултати кои директно ја вратија стабилноста и сигурноста. Сакам да презентирам неколку клучни факти кои целосно ја демантираат оваа неоснована интерпелација. Прво, енергична финансиска поддршка, во изминатиот период министерството успеа да исплати околу 8 милијарди денари, кои отидоа директно на сметките на земјоделците за расчистување на сите заостанати долгови кои СДС свесно ги остави. Второ, санација на штетите преку ребалансот, оваа влада исплати 40 милиони евра наменети за покривање на затекнатите дупки. Трето, редовност и предвидливост, само од почетокот на оваа година на сметките на земјоделците се веќе легнати помеѓу 20 и 30 милиони евра, за разлика од претходно кога субвенциите доцнеа со месеци па и со години“, вели Ристески.