Македонија
ВМРО-ДПМНЕ го осуди обивањето во редакцијата на ПлусИнфо

Владејачката партија ВМРО-ДПМНЕ најостро во неделата го осуди настанот, со обивањето и ограбувањето на редакцијата на проопозицискиот портал ПлусИнфо.
Редакцијата на порталот Плусинфо објави дека ноќта во саботата по 21.30 часот била обиена од засега непознати лица, како и дека речиси целокупната опрема, која се состои лап-топ компјутери и фотографска опрема била украдена.
Според редакцијата, последна која била присутна во редакцијата измиантата ноќ до 21.30 часот била фоторепортерката Елена Героска. Таа се вратила од настанот пред седиштето на ВМРО-ДПМНЕ, ги обработила фотографиите од настанот и потоа си заминала. Во неделата утрото, кога Героска дошла на работното место околу 9 часот, забележала дека балконската врата е ширум отворена и неа се забележуваат траги на насилно обивање. По алармирањето на уредниците, настанот веднаш бил пријавен во полиција,
Покрај четирите лаптопи и еден нетбук, украден е и поголем дел од исклучително скапата фотографска опрема и две видео камери, велат од редакцијата на Плусинфо.
Редакцијата на Плусинфо истканува дека е „интересно е што темелно било претурано по фиоките, а на подот се забележуваат расфрлани службени документи на редакцијата – фактури, проекти, списоци и сл“ и изрази сомневање дека фоторепортерката Героска била следена по прославата на ВМРО-ДПМНЕ и дека сторителите „смислено насилно влегле во редакцијата, со цел да нанесат и материјална штета, но и да ги заплашат новинарите“.
Од владејачката партија набрзи излегоа со повик до Министерството за внатрешни работи и надлежните органи „што поскоро да ги откријат сторителите и истите да бидат изнесени пред лицето на правдата“ за да не се дозволи ширење шпекулации и инсинуации за евентуални сторители на овој настан. „Го осудуваме секое шпекулирање за тоа кој биле сторителите кои го направиле ова дело“, порачаа од ВМРО-ДПМНЕ.
Од партијата реагираат и на „крајно непрофесионалното и тенденциозно“ поврзување на настанот со прославата на 25 -годнишната од основањето на ВМРО-ДПМНЕ.
„Ваквата реторика е веќе видена од страна на опозициските медиуми и медиуми блиски до СДСМ, многупати досега, за на крај да се види дека единствено ширеле манипулација за ситни дневни поени. Ваквите шпекулации не само што и штетат на истрагата, туку се директно обвинување без докази, што само по себе е неморално, неетички и е спротивно на законите“, се вели во реакцијата на владејачката партија./крај/мф/ст
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Герасимовски: Пристигнаа првите ученички униформи, во тек е дистрибуција до сите основни училишта во Центар

Општина Центар за прв пат обезбеди училишни униформи за сите ученици во општинските основни училишта. Првите униформи пристигнаа во ООУ „Киро Глигоров“, а во тек е нивна дистрибуција до сите основни училишта на територијата на Центар, соопштија од општината.
„Денеска започна дистрибуцијата на првите ученички униформи во основните училишта во Центар. Униформите се со одличен квалитет, со лого на општината и со име на секое училиште поединечно. Во понеделник, сите ученици ќе ги добијат униформите на првиот училишен ден, верувам дека тие ќе бидат среќни и горди што ќе ја носат оваа униформа“, изјави градоначалникот Горан Герасимовски.
Со оваа активност, како што е нагласено Општина Центар го подигнува квалитетот на основното образование, што вклучува и инвестиции во училишна инфраструктура, дигитализација и безбедност.
Македонија
Мицкоски: Има раст на откупот на земјоделски производи, земјоделците со добра заработка, продолжува поддршката

„Колку повеќе произведуваме, толку помалку увезуваме. Македонија во минатото беше позната како земја производител и извозник на храна, посебно на земјоделски производи“, вели Христијан Мицкоски претседател на Владата на Република Северна Македонија одговарајќи на новинарско прашање.
Мицкоски потенцираше дека согласно Државниот завод за статистика во вториот квартал има околу 60 милиони евра повеќе споредено со она што беше во минатото.
„Во вториот квартал имаме околу 60 милиони евра повеќе споредено со она што беше во минатото. Имаме над 26-27% повеќе откупени земјоделски производи споредено со истиот период минатата година коишто како количина се за 7% повеќе споредено со истиот период лани. Земјоделците се еден од приоритетите на оваа Влада, тоа го покажавме изминативе 14 месеци. И очекувам во таа насока да продолжиме и во иднина затоа што производството на храна ни е исклучително важно“, додаде Мицкоски.
Македонија
На ГП Табановце се чека 30-ина минути

Сообраќајот на државните патишта се одвива непречено, по суви коловози.
Интензитетот на сообраќај на патните правци надвор од градските средини е зголемен, поради летните одмори, се бележи зголемена фрекфенција на возила, на ГП Табановце времето на чекање за излез од државата е 30-ина минути, а на другите граничните премини од македонска страна нема подолги задржувања за влез и излез од државата.
АМСМ препорачува приспособена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде што има можност од појава на одрони. Ова особено се однесува за делниците Катланово – Велес, Маврово – Дебар – Струга, Виница – Берово и Кочани – Делчево.