Во театрите и други културни институции веќе се вработени 77 лица уметнички кадар од вкупно 120 вработување кои се планирани од Владата, изјави денеска премиерот Никола Груевски.

„Пред два месеца започнавме процедура за вработување на околу 120 актери, режисери и драматурзи во сите театри низ Република Македонија, како и вработувања во Македонската опера и балет, во Македонската филхармонија и во Танец. Оваа работа се одвива добро, а само во петокот беше завршена процедурата за 77 од овие 120 вработувања. Значи само во еден ден 77 луѓе ­ актери, режисери и драматурзи добија решенија за вработување кои што претходно биле или хонорарци или чекале некој проект за да заработат од него. Сега добија една сигурност, стабилност, трајно вработување што секако ќе ги охрабри и ќе им даде повеќе енергија, сила, креативност да се посветат на иметничката мисла, пишаниот збор или режирањето, глумата.., рече премиерот Груевски.

Тој најави и вработувања на 250 професионални војници во Армијата на Република Македонија.

„Тоа ќе се направи во два наврата, првиот ќе биде во март ­ април, а конкурсот ќе излезе во јануари и првата половина ќе биде за 125 војници. Додека втората половина конкурсот ќе излезе некаде април ­ мај, а нивното примање ќе се комплетира во октомври­ноември исто така за 125 војници или вкупно 250 професионални војници ќе бидат ангажирани дополнително во Армијата на Република Македонија. Со тоа ќе се даде можност на многу граѓани кои чувстуваат дека имаат добри предиспозиции, дека сакаат да ја работат таа работа и дека можат да ја работат, да се пријават на овој конкурст, да си обезбедат работно место, а исто така и да ги зајакнат капацитетите на АРМ, рече премиерот.

Груевски најави дека кон средината на јануари ќе биде објавен огласот за пријавување за користење бесплатен туристички викенд за пензионери

Проектот, посочи премиерот, е дел од изборните ветувања и ќе се реализира во 2015 година,но доколку има интерес ќе продолжи и во иднина.

„Се работи за полн аранжман од петок навечер до недела, престој во некој од туристичките центри во македонија дали е тоа Охрид, Преспа, Дојран, Крушево, Берово и др. Така да пензионерите ќе можат да аплицираат и се надевам дека од проектот ќе бидат задоволни“,изјави Груевски.

Со овој проект е предвидено да се опфатат околу 3.000 пензионери./крај/миа

Извор: МИА