Комисијата за европски прашања во четвртокот одржа седница во Собранието на Република Македонија на чиј дневен ред беше поставен Извештајот за реализираните активности од Националната програма за усвојување на правото на Европската унија, за второто тромесечје од годинава.

Централни теми на разговор на Комисијата беа претстојниот Извештај на ЕК за напредокот на Република Македонија, како и Самитот на НАТО во Кардиф.

Усогласувањето на националното законодавство во македонското Собрание има секогаш приоритет и се гледа на што побрз начин да стане составен дел од домашниот правен систем, но, Собранието има и една слабост, што ќе биде забележана и од ЕК во Извештајот за земјата, а тоа е отсуството на опозицијата од пратеничките клупи, забележа пратеникот од редовите на владејачката ВМРО- ДПМНЕ, Антонио Милошоски, кој повторно ја повика опозијата да се врати во Собранието.

„Сметам дека во овој краток период пред да се затвори Извештајот на ЕК би било многу добар потег доколку опозицијата ги има евроинтеграциите како свој приоритет, и ги заземе своите места во Собранието“, нагласи Милошоски, поранешниот шеф на дипломатијата.

Во врска со најавите дека во новиот состав на ЕК нема да има класичен комесар за проширување ,туку комесар за соседство, Милошоски рече дека во портфолиото на тој еврокомесар ќе бидат и можните преговори за отворање и затворање поглавја со земјите кандидати за членство или потенцијални кандидати.

Милошоски го поздрави ангажманот на Берлин со неодамна одржаниот самит за отворање на перспективите на земјите од региониот за членство во ЕУ, бидејќи Германија, канцеларката Меркел и ЕК презеле јавна политичка и дипломатска обврска да го помогне тоа.

Пратеникот Антонио Милошоски очекува на претстојниот Европски совет добри заклучоци кои на Македонија ќе и’ ја отворат вратата за почеток на преговорите, бидејќи, како што вели, без тоа, земјата нема да може да го задржи темпото на реформи.

Вицепремиерот за европски прашања Фатмир Бесими во образложувањето на завршените обврски од Националната програма за усвојување на правото на ЕУ за вториот квартал истакна дека е постигнат напредок во делот на реформите во повеќе области, како  судството, во економските критериуми, во делот на борбата против криминалот и корупцијата.

„Реформите кои се реализирани се прават со предвидената динамика. Меѓутоа, битно е дека сме фокусирани на предизвиците пред нас кои влијаат директно на процесот на евроинтеграција. Останува област на интерес судството каде Македонија треба да забележи поголем напредок од аспект на неговото функционирање, имплементацијата на законите, неселективно судство, во слободата на изразување, во изборниот законик, меѓуетничките односи,и добрососедските односи. Ние продолжуваме да бидеме фокусирани на овие приоритени области со цел Македонија да премине во следната фаза на преговирте за интеграирање на земјата во ЕУ“, истакна Бесими.

Завршната нацрт верзија на Извештајот  за Македонија ќе биде презентирана на 19 септември во Брисел, а финалната верзија ќе биде објавена на почетокот на месец октомври./крај/мф/ап