Евтиниот трик со којшто се намалува оштетното побарување од 500 илјади на 50 илјади евра апсолутно е ирелевантно и неважно за целиот овој процес, изјави лидерот на СДСМ, Зоран Заев во вторник по одржаното рочиште од судскиот процес по тужбата за клевета и навреда што против него ја поднесе премиерот Никола Груевски.

„Во целиот овој процес, треба да се утврди дали тужителот договарал, дали е тоа неговиот глас и дали учествувал во продажбата на Македонска банка. По пат на тужба тој бара оштетно побарување, од мене, како претседател на опозицијата или лично Зоран Заев, заради нанесена штета на честа и угледот“, рече Заев. 

Сакам да констатирам, додаде, дека аудио снимката како крунски доказ не е прифатена и Ден Дончев, кој лично ја достави аудио снимката и материјалните докази, лично кај мене на рака, не е повикан да сведочи, иако е генерален секретар на ВМРО-ДПМНЕ во тоа време. 

Заев рече дека и денешното рочиште во кое што судот дозволи Никола Груевски да не даде одговор дали гласот на снимката е негов или не и да се повика на партиско соопштение, само по себе, како што рече, ја потврдува оваа фарса, којашто според него и неговите адвокати има извесен крај. 

„Сè е јасно и после неприфаќањето на Ден Дончев, генералниот секретар на ВМРО-ДПМНЕ во тоа време, доставувачот на снимката и конкретните материјални докази и повторното одбивање од страна на судот, да не биде прифатен како доказ, само по себе ја потврдува извесноста од решението на целиот овој процес“, рече Заев по судењето во Основниот суд Скопје 2.крај/мф