Македонија
Заев: Секој објавен разговор е вистина од почеток до крај

Секој објавен документ од првата до последната буква и секој изговорен збор од првиот до последниот објавен разговор е вистина од почеток до крај, изјави лидерот на СДСМ, Зоран Заев по соопштението на владејачката партија ВМРО-ДПМНЕ дека се работи за креирани, монтирани и сечени разговори, како и изјавите на дел од државниот врв дека се работи за креирани снимки.
„Сакам да го видам лицето коешто е дел од извршната власт и ги негира материјалите за да може да му пуштиме илјадници вакви материјали од негови разговори најверојатно. Секој објавен документ од првата до последната буква и секој изговорен збор од првиот до последниот објавен разговор се е вистина од почеток до крај“ изјави Заев.Тој во среда беше повикан на распит во јавното обвинителство за организиран криминал како четвртоосомничен во оперативната обработка „Пуч“ во којашто е осомничен за шпионажа и за насилство спрема претставници на највисоки државни органи. Тој не коментираше за распито во обвинителството и ги повика обвинителите и судиите да ги почитуваат Уставот и законите.Во вторникот полицијата поднесе уште една кривична пријава со којашто го сомничи Зарв дека барал поткуп од 200.000 евра од струмички бизнисмен, но тој тврди дека никогаш не ги зел парите и најави дека и тој ќе поднесе кривична пријава за осмислено нудење на поткуп.„Една година и повеќе се мачат како да наместат давање пари на претседателот на опозицијата, катастрофа. На сите можни начини се обидуваат тоа да го направат. Се подготвува кривична пријава којашто ќе биде составена за осмислено нудење на поткуп и осмислено договарање за местење на поткуп. Апсолутно, не сум ги зел парите, ако имаше местење со пари, давање пари тоа ќе беше објавено од страна на, не би ги нарекол државни органи, туку партиски органи во МВР“ изјави Заев.Тој најави објавување на нови разговори во кои што се слуша лидерот на ДПА, Мендух Тачи, коишто според него, ќе ја отворат неговата предавничка душа./крај/ффс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Предложен притвор за таткото што тепаше играчи на фудбалскиот натпревар во Штип

Основното јавно обвинителство Штип денеска поведе итна постапка против едно лице за кривично дело – Насилство.
Осомничениот извршил грубо насилство на 24 август на стадионот „Бело Брдо“ во Штип, за време на фудбалски натпревар меѓу младинските екипи на фудбалските клубови „Брегалница“ и „Шкупи“.
Со дејствијата тој ја загрозил сигурноста на две деца родени 2010 година, играчи за тимот на „Беласица“, нанесувајќи им телесни повреди. Освен тоа, кај оштетените, останатата присутна публика и во јавноста предизвикал чувство на несигурност, загрозување и страв.
Настанот се случил во 89-тата минута од натпреварот, која судијата поради прекршок (фаул) доделил втор жолт картон со што го исклучил од игра синот на осомничениот, кој играл за „Шкупи“.
Незадоволен од одлуката, најпрво синот се однесувал неспортски и со тупаници и со удар со нога се обидел да се пресмета со еден од фудбалерите на „Брегалница“. Тогаш на теренот влегол таткото и со тупаници и клоци започнал да ги удира двете деца, нанесувајќи им телесни повреди – повеќе набиеници и скршеница на нос без дислокација. На игралиштето влегле и други лица од публиката, кои спречиле натамошна ескалација на настанот.
Јавниот обвинител до судијата на претходна постапка од Основниот суд во Штип поднесе предлог за определување мерка притвор за осомничениот, имајќи го предвид видот и сериозноста на кривичното дело против јавниот ред, опасноста од бегство на осомничениот и можноста за повторување на делото.
Македонија
Седум пожари денеска во Македонија, три изгаснати

На територијата на Македонија имаше вкупно седум пожари на отворен простор, од кои два се активни, два се под контрола и изгаснати се три пожари, информира Центарот за управување со кризи.
Активни се еден пожар во Општина Долнени, во село Долгаец каде гори мешана шума и еден пожар на влезот на Крушево каде гори депонија.
Под контрола е пожарот во Јасен, и еден пожар на планината Кожуф каде гори висока шума.
Изгаснати се пожари во Општина Штип: с. Судик (стрниште); Општина Дебар: с. Елевци (ниска вегетација) и во Општина Куманово: нас. Гоце Делчев (ниска вегетација).
Македонија
ВМРО-ДПМНЕ почнува со кампања за собирање предлози од граѓаните

Од среда, 27 август, ВМРО-ДПМНЕ ќе почне седумдневна теренска кампања за собирање на идеи и предлози за проекти од граѓаните, кои ќе бидат опфатени во програмите на кандидатите за градоначалници.
Од 27 август до 3 септември во временски период од 17 до 21 часот, во сите општини низ државата, на плоштадите или прометните локации во истите ќе бидат поставени штандови дел од акцијата „Предложи! Вистинската идеја за вашата општина!“ каде граѓаните на посебен формулар за оваа акција ќе можат да напишаат своја идеја која сакаат да ја видат реализирана како проект од идните градоначалници на ВМРО-ДПМНЕ.
Во истиот временски интервал ќе бидат отворени и сите штабови низ државата каде членовите на партијата и граѓаните исто така ќе може да ја дадат својата идеја или предлог за проект.
Истовремено во истиот период граѓаните ќе можат да ги достават своите идеи и предлози за проекти по електронски пат, на адресата: [email protected]. Каде ќе бидат разгледани исто како и предлозите и идеите од штандовите и штабовите од тимот експерти кои ќе ги пишуваат програмите.
Од ВМРО-ДПМНЕ велат дека очекуваат масовен одзив на граѓаните, се со цел што е можно подетални и содржајни програми со проекти кои извираат директно од нив и нивните потреби.