На локацијата зад касарната „Илинден“ во Скопје, во саботата со свечено поставување на камен – темелник започна и изградбата на првата зграда со 32 стана за припадниците на Армијата на Република Македонија, како дел од проектот „АРМ – мој вистински дом“.
 

Министерот Јолевски, кој се обрати пред присутните посочи дека овој проект има за цел да им помогне да се зајакне стандардот на припадниците на АРМ. „Овој проект ќе трае сè додека има интерес кај припадниците на АРМ. Досега пријавени се околу 250 припадници на АРМ кои преку овој проект сакаат да го решат своето станбено прашање, но ние ќе продолжиме со градба на становите доколку има поголем интерес“, посочи министерот Јолевски.  Овој комплекс, додаде министерот, ќе биде современ, со подземни паркинг решенија и уредена околина.

Во првата зграда со 32 стана ќе има по осум еднособни, двособни, трособни и четирисобни станови, информираше министерот. Тој посочи дека цената е многу поволна и се движи од 4.500 денари месечна рата за еднособниот, до околу 11 илјади денари месечна рата, за најголемиот, четворособен стан.

Проектот „АРМ – мој вистински дом“ овозможува секој заинтересиран припадник на Армијата на Република Македонија да купи стан по исклучително поволни услови. Имено, Министерството за одбрана го обезбедува земјиштето, ги плаќа комуналните трошоци, трошоците за изработка на проект, како и каматите на кредитите кои ќе ги подигнат припадниците на Армијата. Тие, пак, ќе можат главнината од кредитот да го исплаќаат на 240 еднакви рати, односно 20 години. На барање на припадниците на АРМ, учеството од 30 е намалено на 20 отсто./крај/мф/бс