Пратеникот на ВМРО-ДПМНЕ, Драган Ковачки, ја обвини министерката Славјанка Петровска дека крие луксузна хациенда со базен во Радишани. Тој рече дека Петровска лажела оти не поседува луксузна хациенда со базен.

„Тоа го демантиравме со евидентен лист од Агенцијата за катастар на недвижностите, од кој јасно се гледа дека таа е прибележана како сопственик на таа хациенда. Денес, ќе презентираме нови несоборливи докази, од кои е јасно дека луксузната хациенда со базен е сопственост на Петровска и на нејзиното семејство.

Тој покажа сметка од имотот за кој тврди дека е на има на таткото на министерката, Љупчо Петровски.

„Адресата на хациендата со базен на Славјанка Петровска е и адресата што според нашите сознанија е место на живеење според личната карта на министерката. Ако таа тврди дека не е така, нека ја покаже личната карта на увид на јавноста“, изјави Ковачки.

Тој додаде дека Петровска на последните избори гласала на избирачкото место на кое гласаат жителите на „Радишанска“ од реонот во кој се наоѓа хациендата со базен.

„Повеќе од јасно е дека хациендата е живеалиште на Петровска според документите што ги има во институциите. Нејасно е само зошто крие од јавноста? И дали една од причините е затоа што луксузната хациенда со базен е дивоградба? Петровска да не бега од одговорност“, порача Ковачки.

Според него, Петровска е фатена во лага и веднаш да си даде оставка од позицијата министер за одбрана. Личност што крие имот, а во исто време е во посед на дивоградба, не смее да извршува таква одговорна функција, рече Ковачки.

Тој ги повикува институциите да отворат постапка за Петровска.