Македонија
(Видео) Ковачки: Таравари јавно да одговори со што е уценет од СДС и ДУИ

Таравари мора јавно да одговори со што е уценет од криминалното дуо СДС и ДУИ. Таравари дојде на власт со ветување пред граѓаните дека заедно ќе ги испратиме ДУИ во опозиција. Што се случи за само 10 месеци, за Таравари повторно да се врати во прегратките на ДУИ, праша Драган Ковачки, пратеник и член на ИК на ВМРО-ДПМНЕ.
Неговото неразумно однесување, вели Ковачки, мора да се должи на уцена и диктат на криминалното дуо, СДС и ДУИ.
„За нештата да бидат појасни, граѓаните заслужуваат да ја знаат вистината. А таа е следната.
Таравари на состаноците во Владата, никогаш не бил слушнат да зборува за застојот во ЕУ интеграциите, кој се случи благодарение на неговите старо нови партнери, СДС и ДУИ.
Таравари не беше слушнат да говори за тоа дека не биле добро третирани албанските прашања, затоа што и самиот тој многу пати има говорено дека Владата и тоа како се грижи за Албанците.
Во недостаток на факти и аргументи, Таравари своето алиби за напуштање на владината коалиција, го темели на ЕУ интеграциите и на албанските прашања, кои за разлика од порано и тоа како се променети“.
Иако неговите констатации немаат никаква врска со реалноста, Таравари, додава Ковачки, треба јавно да одговори со што е уценет од СДС и од ДУИ?
Праша дали е нешто поврзано со бизнис или некаков друг вид на мотив.
„Таравари докажа дека не е стабилен човек. Таравари сега треба јасно да каже пред граѓаните, како тоа ДУИ за 10 месеци од криминална и корумпирана партија, за него стана правата и вистинска опција“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Сиљановска-Давкова: Потребни се гаранции за македонската евроинтеграција

Претседателката Гордана Сиљановска-Давкова денеска ја прими Карен Пирс, специјална пратеничка на Обединетото Кралство за Западен Балкан, чија посета ја оцени како јасен показател за британската заинтересираност и посветеност на Западен Балкан.
Според неа, оценувањето на напредокот треба да биде меритократско, со фокус на исполнувањето на копенхагенските критериуми. Таа укажа на деструктивноста на билатерализацијата на преговарачкиот процес под закана со вето.
Информираше за заситеноста и заморот на македонските граѓани од бројните преседани, блокади и двојни стандарди. За неа, спротивно на европските темелни вредности и принципи е негирањето на националниот и културниот идентитет, како и непочитувањето на дигнитетот и интегритетот на македонските граѓани.
Можно надминување на блокадата, претседателката гледа во креативно толкување на Преговарачката рамка и надлежноста на Мешовитата комисија за историски и образовани прашања.
Специјалната пратеничка Карен Пирс изрази разбирање за потребата од надминување на македонската евроинтеграциска блокада.
Соговорничките ја оценија британско-македонската соработка како успешна, изразувајќи подготвеност за нејзино продлабочување и проширување.
Обете од претстојниот Самит на Берлинскиот процес во Лондон очекуваат важни придобивки за регионот.
Македонија
Филипче: Не можам да најдам разумно решение зошто ВМРО-ДПМНЕ не го поддржа законот за помош за настраданите од Кочани

Денешната одлука на ВМРО-ДПМНЕ и нивните коалициски партнери да не го поддржат Законот за помош на семејствата на загинатите и повредените од Кочани, за мене е вистинско разочарување. Ова беше можент на одговороност и зрелост, а не за политички инает, истакна претседателот на Социјалдемократскиот сојуз на Македонија, Венко Филипче, по денешната собраниска седница.
„Од првиот ден по трагедијата во Кочани, СДСМ се однесува со целосна почит, сочувство и одговорност за семејствата на загинатите и повредените. Не ловевме политички поени, не обвинувавме и дадовме целосна поддршка за институциите да ја завршат работата. Го ставивме страдањето на нашите сограѓани над политиката. Покажавме емпатија и конструктивност – и како партија, и како поединци. Во тој дух поднесовме закон со кој се обезбедува финансиска помош за семејствата на загинатите и повредените. Без никакави политички намери, со јасна цел – да им помогнеме на оние што изгубија најмногу“, рече Филипче.
Денешната одлука на ВМРО-ДПМНЕ, како што додаде, и нивните коалициски партнери да не го поддржат овој закон за него е вистинско разочарување.
„Не можам да најдам разумно објаснување за оваа постапка. Не станува збор за политика, туку за човечност, морал и совест кои очигледно пратениците на ВМРО-ДПМНЕ ги немаат. Државата мора да покаже дека стои зад своите граѓани кога е најмногу потребно. Ова не беше момент за политички инает, туку за заедничка грижа. СДСМ ќе продолжи да се бори за вистински вредности и да нуди и дава поддршка таму каде што најмногу треба“, вели претседателот на СДСМ, Венко Филипче.
Предложениот закон не беше ставен ниту на дневен ред. Пратениците од мнозинството не го поддржаа барањето на опозициската партија предлог-законот да се носи во скратена постапка. „За“ ваквиот предлог гласаа само 18-мина пратеници од СДСМ и Левица.
Предлог-законот предвидуваше финансиска помош за семејствата на жртвите, во износ од 80.000 евра за секоја жртва, а по 1,2 милиони до 5 милиони денари за повредените, во зависност од степенот на инвалидитет.
За ВМРО-ДПМНЕ, овој предлог закон е популистички и, според нив, опозицијата ја злоуптребува трагедијата од Кочани за ситни политички поенти. Според владејачката партија, измените во голем дел се неприменливи. Велат дека веќе имаат конкретен план за помош за семејствата на настраданите и повредените лица.
Македонија
Утре дожд

Времето утре ќе биде променливо облачно со сончеви периоди. Кон крајот на денот и во текот на ноќта ќе има локални врнежи од дожд, наместа пообилни. Ќе дува слаб до умерен, а долж Повардарието повремено засилен ветер од јужен правец, јавува УХМР.
Минималната температура ќе биде во интервал од 1 до 8, а максималната ќе достигне од 19 до 26 степени.
Во Скопје, претпладне сончево со умерена облачност. Попладне облачноста ќе се зголеми, а во текот на ноќта ќе има врнежи од дожд. Ќе дува умерен, повремено засилен ветер од југоисточен правец. Минималната температура ќе се спушти до 6, а максималната ќе достигне до 26 степени.