„Не се точни наводите пренесени во некои од медиумите за состанокот со роднините на загинатите од кочанската трагедија. Во моментот се прави злонамерно дефокусирање и злоупотребување на трагичната судбина. Владата е тука за семејствата, за сè што им е потребно и секогаш ќе биде со нив, дури и кога за некои работи ќе имаат поинакви мислења“, се наведува во соопштението на Владата.

„Ова писмо од родителите и роднините е потсетник дека мора да се решаваат проблемите и да се демонстрира волја и одлучност да се помогне уште повеќе и уште подецидно.

Владата жали за впечатокот што некои го добиле, но тие средби досега не се ни први, а ни последни, и апелираме да не се прави сензација од средба наменета за поддршка и сочувство. Тоа беше втора средба со семејствата и ние би потсетиле дека премиерот за време на средбата од почетокот и до крајот разговараше и се поздравуваше со сите изразувајќи сочувство со сите присутни поединечно и низа други гестови и иницијативи и работи, кои од етички и човечки причини навистина не сакаме да бидат предмет на јавна дискусија затоа што се интимни и длабоко приватни и ние тоа сакаме да го почитуваме.

Сведување на дискусијата на „здраво, како сте“ и „колку чини“ не само што не ги одразува вистинската дискусија и намерата туку е навредливо и се обидува да фрли сосема погрешно светло на намерите и постапките на Владата определувајќи ги како длабоко нечовечни, што е несоодветно и неточно.

Истовремено, изразувајќи длабока тага за трагедијата, сочувство и поддршка за семејствата, упатуваме на тоа дека оваа трагедија, овој трагичен и ужасен настан, е болка не само за семејствата, но и за целата држава и нема некој што не го мисли и чувствува тоа.

Владата ќе биде секогаш тука за семејствата и што се однесува до нашиот ангажман – и тоа што зависи од нас, ќе се трудиме правда да има и ќе се бориме некаква утеха ако може да се најде и секогаш ќе бидеме потпора на семејствата, во нивните потреби, барања и предизвици затоа што ова е и наша болка и тага и тие не се мерат и споредуваат, туку се докажуваат со дела, кои ние ги правиме и планираме да ги правиме.

Апелираме да не се злоупотребуваат овие настани и моменти, да не се суди врз база на гнев и тенденција, а Владата секогаш ќе биде тука за семејствата и колку што може – максимално ќе им помага во барањата, кои се рационални и врз основа на закон и ингеренции“, се додава во соопштението на Владата.