Македонија
Владата да одговори дали е спремна да разговара за примање мигранти во нашата земја, бара Филипче

Го поддржуваме договорот за стратешка соработка со Британија, но по информациите во британските медиумите, упатувам прашање до Владата дали е спремна да разговара за сместување мигранти во нашата земја, повика претседателот на СДСМ, Венко Филипче, на денешната прес конференција.
„
Имено, непосредно по самитот, излезе информација дека откога Албанија го одбила договорот со Велика Британија да прима мигранти, имајќи предвид дека таков договор има со Италија, лидерите на Косово, Северна Македонија, генерално од Западен Балкан, рекле дека исто така не се согласуваат да има кампови за мигранти, но се отворени за тоа да се разговара. Упатувам прашање до Владата дали навистина се спремни со Велика Британија да разговараат за сместување емигранти во нашата земја?“, рече Филипче.
Тој потенцира дека СДСМ го поддржува договорот за стратешко партнерство со Обединетото Кралство и дека пратениците ќе го поддржат во македонското Собрание потсетувајќи дека и владите на СДСМ во минатото имале потпишано таков договор за стратешка соработка.
„Апсолутно го поддржуваме. Нашата влада во изминатите години има потпишано еден договор за стратешка соработка со Обединетото Кралство и сметам дека тоа е земја, наш сериозен партнер во изминатите години, децении, секогаш, и во кризи кога сме биле, а и генерално во сите процеси за напредок на земјата, Велика Британија давала подршка. Тој чин, тој гест е за поздравување и ние тој договор, кога ќе дојде во Собранието за ратификација, ќе го подржиме“, рече претседателот на СДСМ, Венко Филипче.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Во Лондон денеска ќе биде потпишан договорот меѓу владите на Македонија и на Велика Британија

Договорот за стратешко партнерство меѓу владите на Македонија и на Велика Британија ќе биде потпишан денеска во Лондон.
Вицепремиерот и министер за транспорт Александар Николоски вчера кажа дека со договорот на Македонија на располагање и се ставаат 6 милијарди евра кои ќе бидат наменети за пректи во делот на транспортот, здравството, образованието, енергетиката, технологијата, како и во областа на животната средина.
Засега се разговарало за три сета на проекти, едниот е брзата пруга на коридор 10 од Табановце до Гевгелија, вториот е изградба и реконструкција на болници во Кичево, Тетово и Штип и третиот е изградба на медициски факултет заедно со студенски дом во Штип.
Договорот ќе оди на ратификација во Собранието, а во Велика Британија го усвојува Владата.
Македонија
(Видео) Филипче: Со новото задолжување од 6 милијарди евра јавниот долг ќе надмине 115% од БДП

Претседателот на СДСМ, Венко Филипче, упати сериозни предупредувања за нетранспарентноста на Договорот за новото задолжување од 6 милијарди евра, кое го спроведува владата предводена од ВМРО-ДПМНЕ.
Тој укажа дека со новото задолжување, „секое новороденче во следните 25 години непосредно после раѓањето ќе должи 6.000 евра“. Дополнително, според анализите на СДСМ, јавниот долг ќе надмине 115% од БДП – „што е полошо и од грчката криза од пред повеќе од една деценија“, потенцираше претседателот Филипче.
Филипче реагираше и на нејасните тврдењата на министерката за финансии.
„Очигледно е дека тие договори ќе бидат нетранспарентни и во четири очи. Министерката за финансии вели дека ќе се спроведува постапка согласно Законот за јавни набавки, но со странски фирми. Ние направивме проверка – нема да важи законот за јавни набавки“, истакна тој, посочувајќи дека „ВМРО-ДПМНЕ, партијата која седум години критикуваше за корупциски договори, сега самата создава простор за сериозни сомнежи.“
„Сите гледаме што се случува, очигледно е дека ВМРО-ДПМНЕ ја води државата во амбис“, порача Филипче.
Претседателот на СДСМ ја отвори и темата за можниот политички дел од договорот – миграцијата.
„Сериозни медиуми од Велика Британија известуваат дека земјите од Балканот, вклучувајќи ја и Македонија, ќе станат центри за прифаќање бегалци непожелни во Велика Британија. А премиерот – молчи, нема став“, рече претседателот на СДСМ, Венко Филипче.
Македонија
ВМРО-ДПМНЕ: Инвестициски бум во здравството, почеток на реконструкција на ЈЗУ УК Гинекологија и акушерство Скопје

„Деструктивните политики на СДС и ДУИ го уништија македонското здравство, ги оставија пациентите без лекови, а болниците без опрема. СДС и Филипче нижеа бројни скандали во здравството, како историскиот скандал на Онкологија“, велат од ВМРО-ДПМНЕ.
„Владата предводена од ВМРО-ДПМНЕ најавува инвестициски бум во државата, особено во делот на здравствената инфраструктура. Вложувањето и унапредувањето на јавното здравство се главниот фокус на владата предводена од ВМРО-ДПМНЕ.
Започна значајна инвестиција на клиниката за Гинекологија и акушерство Скопје, со цел поквалитетни услуги за граѓаните.
Започна комплетното реновирање и реконструкција на амбулантите, платото, чекалните, лабораториите и специјалистичките кабинети на Клиничкиот центар „Мајка Тереза“ – ЈЗУ УК за гинекологија и акушерство во Скопје.
Со инвестиција од 29 милиони денари се создаваат современи услови за поквалитетна, побрза и поефикасна здравствена заштита за сите пациентки. Оваа инвестиција претставува и сериозна поддршка за здравствените работници, на коишто ќе им се овозможи работа во современи услови.
Целиот проект ќе биде реализиран според најсовремените здравствени стандарди, со што ќе се модернизира јавниот здравствен сектор.
Владата предводена од ВМРО-ДПМНЕ се грижи и вложува средства и за нова и современа техника, се со цел поефикасни и поквалитетни услуги“, соопшти ВМРО-ДПМНЕ.