Македонија
Мицкоски бара лидерска средба за излез од кризата: Македонија ја има сѐ помалку, а народот гладува

Oваа Влада нема легитимитет ниту, пак, има нови 100 дена затоа што таа најавтентично ги продолжи сите неуспеси и сите погрешни политики на Владата, која речиси 5 години ја уништува Македонија. Процес во кој Македонија ја има сѐ помалку, а животот е сѐ потежок – во економијата, земјоделството, образованието, здравството, енергетиката, надворешната политика, истакна лидерот на ВМРО-ДПМНЕ, Христијан Мицкоски.
„Никогаш повеќе немало ѕидови на поделби, на наши и ваши, на припадници на една заедница наспроти припадници на друга заедница како во овие 100 дена. Повторно се разговара за проценти, се пребројуваме, се зборува за Бадинтер, за балансер. Имаме борба на тоа чиј триумф на суети е поголем во време кога Македонија и народот на Македонија, за жал, ги има сѐ помалку. Овие 100 дена имаме целосно разградување и разграбување на она што преостана. И не велам дека причините се создадоа само во овие 100 дена, туку тлееа, се натрупуваа нерешените проблеми цели 5 години“, вели Мицкоски.
Ако Заев ја доведе Македонија до дното, Ковачевски покажува дека дното можело да биде и подлабоко.
„Овие 100 дена се показател дека народот живее крпен живот. 100 дена на растечка сиромаштија и галопирачка инфлација. 100 дена на покачени сметки и на давачки. На раскрчмување на идентитетот и трговија зад затворени и отворени врати. 100 дена живот во национална катастрофа. Неприфатливо е дозволувањето на оваа Влада да се мешаат соседните држави во нашите внатрешни работи, па сега, кога ќе ги исполниме критериумите за ЕУ, да мора да ги исполниме и критериумите на Петков, кои се за негова домашна употреба“, потенцира лидерот на ВМРО-ДПМНЕ.
Оценува дека зад овие интереси не стојат нашата држава и нејзините институции.
„И ако условот е да се исполнат сите бугарски барања, кои ќе значат исполнување на нивната бугарска декларација, на наша штета, тоа е нешто со што ВМРО-ДПМНЕ никогаш нема да се согласи ниту, пак, да се помири. И ако има отворање на Уставот, чин со кој е предвидено дел од бугарскиот народ да биде вклучен во преамбулата, ВМРО-ДПМНЕ нема да го поддржи без претходни писмени гаранции за нашата историја, за нашиот македонски јазик, без вештачки фусноти, за нашата посебност и културна различност“, нагласи тој.
Според Мицкоски, има многумина што прашуваат што правиви опозицијата?
„ВМРО-ДПМНЕ овие 5 години е на самиот браник на државата, со сите бури, ветришта и удари со кои се соочивме. Не е нормално премиерот да нема комуникација со лидерот на најголемата политичка партија. Затоа, денес, јавно и отворено предлагам до Ковачевски заедничка и јавна средба, на која ќе разговараме и ќе договориме датум за одржување предвремени парламентарни избори како природно решение за состојбите во Македонија. На тој состанок имам намера да предложам 4 тима, составени од ВМРО-ДПМНЕ, кои ќе бидат составени од луѓе со искуство и луѓе што се покажале и докажале во минатото во 4 акутни области, во кои се детектирани клучните проблеми во нашата земја. Четири тима што ќе работат заедно со тимови од власта во меѓупериодот од сега до денот на одржување на предвремените парламентарни избори. Про боно, без никакви права и привилегии. Тука сме да ѝ помогнеме кога на Македонија ѝ е најтешко“, потенцира Мицкоски.
Го советува актуелниот премиер да не брза. „Нека размисли, знам што ќе го советуваат – веднаш треба да одбие, нека не одбива и нека размисли, нека преспие, нека се советува со повеќе луѓе и очекувам одговор во следниве десет дена, нека биде краен рок 10 мај, вторник. На таа средба да разговараме и за актуелните прашања поврзани со изборите, но и за она другото, кое е важно и што граѓаните го очекуваат од нас. Доколку ја одбие и оваа порака, за средба за излез од националната катастрофа што ја живее Македонија, ВМРО-ДПМНЕ ќе заседава и потоа следуват сериозни и досега непрактикувани чекори. Доколку биде одбиена средбата, ќе се покаже дека државата има отсуство на какво било лидерство, а народот ќе мора да дојде по своето затоа што сето ова, како што имаше почеток, има и свој крај. И порака до меѓународните пријатели – алармот одамна веќе свети црвено“, истакна лидерот на ВМРО-ДПМНЕ, Христијан Мицкоски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
АМСМ: Зголемена е фреквенцијата на возила поради летните одмори

Сообраќајот на државните патишта се одвива непречено, по наместа влажни коловози.
Интензитетот на сообраќај на патните правци надвор од градските средини е зголемен. Поради летните одмори се бележи зголемена фреквенција на возила, но на граничните премини од македонска страна, нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Од 1 јули до 31 август на државните патишта во Македонија се воведува летен времен режим на сообраќај со кој се забранува движење на тешки товарни возила со вкупна маса над 15 тони, за време на деновите од викендот и за денови при екстремно високи температури. Термините се следни:
петок од 17:00 – 22:00 часот,
сабота од 09:00 до 18:00 часот и
недела од 09:00 до 22:00 часот.
Во деновите со екстремно високи температури, определени од Министерство зa здравство, забранaта ќе важи и од понеделник до четврток во период од 11:00 до 17:00 часот.
Ограничувањето не се однесува на возила кои превезуваат животни, цвеќе, хуманитарна помош, жито и житни култури и леснорасиплива стока, нафта и нафтени деривати, превоз на опасни материјали и возила кои вршат превоз за компании кои имаат склучено договори за изведување на проекти на државните патишта со ЈП за Државни патишта.
Македонија
Милошоски за Коцевски: Најдобро е да си поднесе оставка, бидејќи спонзорството од ДУИ и СДСМ само ќе му го руши угледот

Со денешното гласање во Собранието паднаа маските околу тоа кој е политичкиот покровител на Државниот јавен обвинител Коцевски и неговото раководно друштво во обвинителството, напиша во објавата на социјалните мрежи Антонио Милошоски од ВМРО-ДПМНЕ.
Според него, одговорот е јасен.
„Истите политичари од ДУИ и СДСМ кои во февруари 2024 година го предложија и гласаа „За“ изборот на Коцевски за јавен обвинител, денес не се осмелија да гласаат за негова недоверба. И покрај тоа што државниот обвинител има неколку крупни професионални грешки за кои заслужува разрешување, сепак фактот што токму Коцевски најдобро ги знае индициите за висока корупција направена од високи функционери од СДСМ е оној политички кредит што пратениците на Филипче и Оливер Спасовски мораат сеуште да го отплаќаат со заштита на функцијата на обвинителот“.
Како што оценува Милошоски, дури и пораката од СДСМ до Државниот обвинител дека од него зависело дали ќе бил “со штитот или на него”, повеќе звучи како кодиран сигнал од еден кон друг бизнис клан, отколку како парламентарен принцип поврзан со владеењето на правото.
Сепак, вели тој, добро е што ВМРО-ДПМНЕ остана доследна на своите позиции и тука не треба да се застане.
„Иако денес ги видовме политичките покровители на Државниот обвинител во Собранието, сепак корозијата на репутацијата на ЈО во најголем ја прават десетина актери внатре во самото обвинителство. Заради ваквите околности, како и заради силната порака која денес ја доби од Собранието, најдобро е ЈО Коцевски да си поднесе оставка, бидејќи спонзорството од ДУИ и СДСМ само дополнително ќе му го руши и угледот, и интегритетот на обвинителството во целина“, пишува Милошоски.
Македонија
(Видео) Драчево бара лежечки полицајци на „Јустинијан Први“: Не утре, туку сега, пред да има мртви

„Колку животи треба да се изгубат на улица „Јустинијан Први“ за конечно да се преземе нешто?
Денеска повторно автомобил излета од коловозот и заврши во двор на жител. Само по среќа немаше жртви. Но до кога ќе се потпираме на среќата? Утре тоа може да биде нечиј син, ќерка или родител згмечен на тротоар“, реагираат граѓаните преку социјалните мрежи на ѕидот на општината Кисела Вода по тешка сообраќајка на улицата.
„Години наназад алармираме на оваа улица се вози како на автопат! Нема лежечки полицајци, нема контрола. Се што некогаш беше поставено, одамна е уништено од нашите сонародници, во 3 часот ноќе со копач ги корнат и со камиони кочат на нив да ги одкорнат, а институциите молчат. Нивната незаинтересираност е директна закана за животите на жителите“, стои во објавата.
Доста е, како што вели во напишаното револтиран жител, со празни ветувања и молк.
„Бараме итни мерки, поставување на лежечки полицајци. Не утре, не, кога ќе има средства, туку сега пред да има мртви!
Ако општината и надлежните органи продолжат да си ги затвораат очите, секоја идна несреќа и секоја изгубена жртва ќе биде нивна одговорност нивно злосторство со премолчена дозвола!
Градоначалниче Орце Ѓорѓиевски, те повикуваме да реагираш!
Жителите на оваа улица очекуваат од тебе итно да се постават лежечки полицајци.
Време е безбедноста на граѓаните да биде на прво место пред да дојде до трагедија“, стои во напишаното на социјалните мрежи.