На денешната седница на Советот на Град Скопје советникот од редовите на ВМРО-ДПМНЕ Мартин Стојаноски истакна дека ВМРО-ДПМНЕ како партија, но и како советничка група секогаш ги поддржува зголемувањата на платите во јавниот сектор.

„Како советничка група на ВМРО-ДПМНЕ и коалицијата и како партија ВМРО-ДПМНЕ секогаш сме ги поддржувале зголемувањата на платите во јавниот сектор и во градот Скопје. Затоа, барам од сите колеги советници кои се присутни во салата да го поддржиме ребалансот на буџетот со тоа што би ги зголемиле платите на вработените во градот Скопје и на противпожарната бригада во градот Скопје“, посочи Стојановски.

Тој потенцираше дека и во минатото поднесувале иницијативи за зголемување на платите во администрацијата и противпожарната бригада.

„Покрај тоа што поднесувавме и во минатото иницијативи за зголемување на платите во администрацијата и противпожарната бригада уште еднаш потврдувам и барам сите колеги советници да гласаме за зголемување на платите во противпожарната бригада и во градот Скопје“, заклучи Стојановски.

Градоначалничката на Град Скопје Данела Арсовска, се вклучи во живо од инспекција на нелегален објект во Општина Чаир.

Таа рече дека објектот се гради без никакви документи, без проект и без одобрение за градба. Ги повика МВР и ЦУК да излезат на терен и да реагираат.

Според Арсовска, станува збор за дивоградба од неколку илјада метри квадратни на државно земјиште, а како што рече, изградбата ја дозволил градоначалникот Висар Ганиу. Како што покажува на видеото, објектот се гради на еден метар до станбена зграда, односно пред прозорците на станарите.

„Во моментов во општина Чаир спротивно на закон си почнале нова дивоградба, за жал во овој момент не реагира МВР, го повикуваме министерот Панче Тошковски кој би требало да реагира, и го повикуваме Стојанче Ангелов овие необезбедениве дупки, каде може сакој случаен минувач да се повреди, да излезат на лице место и да ни кажат дали има сејфти фрст“, вели Арсовска.

„Возила нерегистрирани, без никаква дозвола, нема платено комуналии, нема одобрение за градење, нема проект, нема ниту еден документ со кој се гарантира безбедност на градба, и да не се чудиме она кое се случува во Македонија. Дополнително објектот е во ГУП на Скопје, каде овие тука си одлучиле да си прават зграда без ниту еден документ“, рече Арсовска.

На денешната седница на Советот на Град Скопје се обрати советничката од редовите на ВМРО-ДПМНЕ, Анета Марковска-Илиевска, која на самиот почеток истакна дека ВМРО-ДПМНЕ ќе ја поддржи одлуката за промена на средствата во буџетот, на платите и на придонесите за вработените во противпожарникарната единица.

„Ја поздравувам предлог-одлуката за измена на распоредот на средства во буџетот на Град Скопје за 2025 година, особено за ставките плати и придонеси за вработените во противпожарната единица и во Градот Скопје. Сведоци сме на недостигот на пожарникари и на проблемите при извршување на работните задачи, па со оваа одлука ќе се овозможи вработување нови пожарникари, кој број досега беше преполовен од потребниот, и противпожарната единица во Скопје, се надевам, ќе биде на нивото што ѝ прилега и ќе им од помош на скопјани, па и пошироко“, истакна Марковска-Илиевска.

Советничката се обрати до градоначалничката Арсовска и посочи да престане да манипулира со јавноста, и прстот, поради неспособноста, да го вперува кон ВМРО-ДПМНЕ.

„Затоа од тука апелирам Арсовска да престане да манипулира со јавноста и со вработените велејќи им дека ВМРО-ДПМНЕ опструира, не гласа одлуки, бидејќи помина цел мандат во изговори поради неспособноста да се справи со предизвиците и сè уште продолжува, за жал. Скопјани, бидете спокојни, следува обнова на Скопје од капитални до локални решенија, а ова раководство ќе остане запамтено во историјата како најнеспособното“, рече Марковска-Илиевска.