На денешната седница на пратенички прашања во Собранието, пратеникот од редовите на ВМРО-ДПМНЕ, Јован Јаулески упати три прашања до премиерот Христијан Мицкоски. Во однос на првото прашање, Јаулески истакна дека по преземањето на власта во 2017 година, од кланот Муртино-Зајас, се правеше груба партизација на институциите и безбедносните сили во државата.

„Дали има нови моменти во насока на расветлување на овој случај и дали македонската јавност, може да очекува докази врз база на спроведени истраги во рамките на институциите?“, праша Јаулески.

Во контекст на тоа дека претседателот на Владата, кажа дека во време на опозиција бил следен од безбедносните сили, наместо да се занимаваат со криминалот кој шараше низ државата.

Јаулески напомена дека криминалците наместо да се под органите на прогон, тие биле фотографирани со министри, премиери и претседател на држава, со тогашната власт.

„Што се е пронајдено и запленето во акцијата во која се уапсија 18 лица, припадници на криминалните банди „Беланоца-Барон’’ и дали со оглед на фактот што целата македонска јавност, знаеше за овие ликови и нивната активност а поранешната Влада не гледаше или не сакаше да види, има индиции за соработка и штитење од страна на поранешни високи функционери“, праша Јаулески.

Во однос на третото прашање, пратеникот рече дека Груби носеше патики од над 2000 евра, додека крадеше врз грбот на албанските граѓани и додека тие се иселуваа и поттикнуваше меѓуетнички тензии.

„Што е преземено за враќање на Груби во државата и соочување со правдата?’’, беше последното прашање на Јаулески до премиерот.

Додека Груби крадеше, ДУИ ги лажеше Албанците дека се бори за нив, а всушност со секој поминат ден беше причина повеќе тие исто како и Македонците да си заминуваат од државата. Груби и ДУИ никогаш не беа ниту за Албанците ниту за Македонците, туку за џебот на поединци, изјави пратеникот Бране Петрушевски.

„СДС знаеше за криминалот на Груби, го толерира од две причини: прво, затоа што му се приклучи и, второ, затоа што така се држеа на власт. Груби и ДУИ знаеја дека во никоја друга комбинација нема да може така да крадат и го држеа СДС на власт. Коалицијата СДС и ДУИ беше брак од интерес за грабеж на Македонија. СДС и денес продолжува да одработува за Груби смислувајќи разни приказни. Реалноста е дека тие го создадоа Груби, овозможија да краде и ја ограбија здружно државата. Тоа сите го знаат“, рече Петрушевски.

Додаде дека, наместо да се резилат со прес-конференции, СДСМ треба да излезе и да го повика да се врати, а потоа да им се извинат на граѓаните.

Премиерот Христијан Мицкоски на денешната собраниска седница за пратенички прашања одговарајќи на прашање околу тоа кој е ставот на Владата за недела неработен ден, истакна дека тоа не треба да биде селективно како што го направила претходната влада туку или да се даде можност на сите кои ќе постигнат договор со работодавачите за двојна или тројна дневница да остварат таков приход или никој да не работи.

„И денеска е недела работен ден, но за одредени економски оператори, дури во законот со квадратура се нацртани и се опишани кои се тие. Да речеме, работи еден трговски центар којшто се сеќавам на фанфари го отвораше тогашната коалиција СДСМ-ДУИ во занесот на инспирацијата пред првиот или вториот круг на локалните избори 2021 година мислејќи дека на тој начин ќе постигне подобар резултат. И сега има одредени економски оператори коишто работат. Ние како влада си го поставуваме следното прашање, а тоа е или никој да не работи, вклучително и тие, или тие коишто сакаат да работат со согласност на работниците коишто сакаат да работат да добијат двојна дневница. Тоа е дилемата која што ја имаме како влада и тука не гледаме ништо лошо“, истакна Мицкоски.

Тој додаде дека според мерењата на јавното мислење околу 75% се за во недела да работат доколку им се плати двојна дневница.

„Дури, за ваша информација, месечно три пати мериме јавно мислење за внатрепартиски и внатре коалициски потреби и на тие јавни мерења, обично една или две се телефонски и едно е секогаш теренско мерење. Отприлика тестираме неколку атрибути меѓу кои и овој атрибут. Седумдесет и пет проценти од граѓаните се за тоа тие што сакаат во недела да работат доколку им се плати двојна дневница“, нагласи Мицкоски, но додаде дека кое ќе биде конечното решение ќе зависи од следниот состанок на Економско-социјалниот совет.

„Дали ќе дојде до овие законски интервенции и кои ќе бидат, кон кое решение ќе конвергираме ќе зависи од тоа каков ќе биде резултатот на следниот состанок на Економско-социјалниот совет. Ова прашање ние сме го разговарале и со синдикатите. Ова не е прашање кое ние сакаме да го наметнеме. Сме го разговарале и со синдикатите и со стопанските комори, работодавачите. Ние не сме го разговарале ова прашање во тесен круг и да носиме одлука, па потоа да не знаеме што да правиме со таа одлука. Ако мислите дека ние на сила ќе направиме нешто, нема да го направиме на сила“, подвлече Мицкоски и додаде:

„Генерално се катализираат две решенија. Едното е или никој да не работи, ама никој. Има еден таков главен град на една држава во централна Европа, никој не работи во недела и готово, тоа е тоа, или ако некој плати дупла дневница или договори со синдикатите поинакви услови да може да работи, да работи“.

Тој исто така потенцираше дека негово лично мислење е или да се даде можност на тие што сакаат за подобар приход да работат или никој да не работи, но се ќе зависи од состанокот на Економско-социјалниот совет на кој отворено ќе се разговара со работниците и работодавачите.

„Ако сакаме да правиме диверзификација и промена на нашиот економски модел и концепт, мораме да размислуваме вака. Кое ќе биде конечното решение јавноста ќе го знае откако ќе заврши последниот состанок којшто ќе го имаме со Економско-социјалниот совет на којшто ќе разговараме заедно отворено, гласно и јасно помеѓу работодавачите и работниците. Мое лично мислење еве да немате дилема е дека за сите оние коишто ќе постигнат договор со работодавачите и ќе добијат повисока дневница, двојна тројна итн. треба да биде овозможено во недела да работи и да остварат таков приход или, ќе повторам, никој да не работи“, заклучи Мицкоски.