Македонија
Ѕидови што течат, факултети без услови за работа – Атанас Кочов, кандидатот за ректор на УКИМ, за универзитетските проблеми

Појаснувајќи ги актуелните состојби на УКИМ, кандидатот за ректор, Атанас Кочов, во интервју за „Макфакс“ истакнува дека е потребна заемна соработка на идниот ректор и тимот на вработени за подобрување и издигнување на Универзитетот од состојбата во која се наоѓа.
Не претендирам за ректорската позиција, дециден е Кочов, за да бидам менаџер, туку одам да бидам лидер и се откажувам од сите приходи што му следуваат на ректорот. Останувам на мојата плата од Машинскиот факултет, додава кандидатот за ректор.
Предочува дека и професорите и студентите работат во тешки услови, како инфраструктурни така и материјални.
Професорските плати, како што истакнува, никогаш не биле пониски.
Некогаш се случува, како што објаснува, нивните колеги од штипскиот или тетовскиот универзитет да имаат многу повисоки плати во однос на УКИМ.
„Ако ги споредиме платите, ќе видите дека на УКИМ платата на професор е меѓу 700 до 800, можеби до 1.000 евра. Од друга страна, моите колеги од штипскиот или тетовскиот универзитет имаат и над 1.000 евра плата“, вели универзитетскиот професор.
За стандардот на студентите, прецизира дека немаат студентски домови, а сите други универзитети имаат. Зошто, прашува професорот, тоа да не биде решено на тој начин што на имотот на УКИМ ќе се направи јавно-приватно партнерство.
„Мора да се потрудиме на студентите да им ги обезбедиме сите можности за да имаат човечки услови за творење. Дали тоа ќе бидат мали студентски домови во кампуси, дали ќе бидат поголеми студентски домови, но ние како универзитет мора да се погрижиме за студентите што не се од Скопје да имаат добри услови, да имаат училница со компјутерска опрема, да имаат културни и спортски центри“.
Ѕидови што течат, пропаднати спортски сали, факултети без основните услови за работа, се само некои од проблемите на УКИМ, укажува Кочов.
Детаљно за состојбата на УКИМ и со кои предизвици ќе се соочи идниот ректор на најстариот универзитет, во интервјуто на „Макфакс“ со Атанас Кочов.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Паднати дрвја, настрешници и покриви, оштетени моторни возила и скинати кабли на ЕВН по вчерашното невреме во Скопје

Вчерашното невреме што го зафати Скопје предизвика бројни проблеми и материјални штети во различни делови на градот. На бројот за итни повици 112 беа пријавени паднати дрвја, оштетени моторни возила, скинати кабли на ЕВН, настрешници и кровови, како и други материјални оштетувања на приватна сопственост.
Најголем дел од пријавите се однесуваат на улиците Теодосиј Гологанов, Париска, Никола Русински, Димитар Туриманџовски, Ѓорче Петров, Самоилова, Струма, Варшавска, Методија Митевски, Ацо Шопов, Лука Геров и бројни други делови од градот, како и населбите Топаана, Бутел, Козле, Сопиште и Виниче. На булеварот „Партизански одреди“ паднало дрво врз повеќе паркирани возила, а на ул. Драгиша Мишовиќ, во дворот на градинката „Орце Николов“, дрво се урнало врз автомобил.
Неколку локации пријавиле и паднати или навалени бандери, скинати жици под напон и искрење, што претставува сериозна опасност за граѓаните. На ул. Шар Планина и ул. Лука Геров се забележани искрења на електрични кабли на ЕВН, а во Шишево и кај православните гробишта паднати бандери го блокирале движењето и создавале ризик од струјен удар.
Оштетувања биле забележани и на кровови на приватни објекти, настрешници, контејнери и семафори, додека во некои случаи дрвата паднале врз јавни и административни објекти, како Драмскиот факултет и Министерството за труд и социјална политика.
Надлежните служби интервенираат по приоритет, со цел безбедно отстранување на паднатите дрвја, обезбедување на оштетените кабли и враќање на нормалното функционирање на улиците. Граѓаните се предупредуваат да ги избегнуваат опасните локации и да се придржуваат до инструкциите на надлежните служби.
Македонија
Денес пак дожд, грмежи и умерен северозападен ветер

Времето во Македонија денеска ќе биде променливо облачно, претпладне со локален дожд и грмежи претежно во источните делови. Ќе дува умерен повремено засилен западен, а во источните делови северозападен ветер.
Во Скопје, променливо облачно, во раните претпладневни часови со услови за повремен дожд. Ќе дува умерен северозападен ветер.
Утре времето ќе биде сончево со мала до умерена облачност и температури до 35 Целзиусови степени. Ќе дува слаб до умерен ветер од северoзападен правец.
Скопје
(Видео) Храбри полицајци гаснеа пожар во Бутел и завршија во болница, Костовски најави награда

Двајца полицајци од полициската станица Бутел денеска покажаа вистински херојство откако ги ризикуваа свои животи за да помогнат во гасењето на пожар кој се закануваше на детска градинка и училиште во општината. Дарко Стајковски и приправникот Филип Стојчевски, при интервенцијата вдишале јаглерод моноксид, поради што се пренесени на Клиниката за токсикологија во Скопје.
За среќа, лекарите потврдуваат дека нивната здравствена состојба е стабилна и дека се под постојан медицински надзор.
Градоначалникот на Бутел, Дарко Костовски, ја поздрави нивната храброст и најави дека општината ќе ги награди.
„Секоја чест за Дарко и Филип! Ова е вистински пример за пожртвуваност и љубов кон заедницата. Благодарение на нивната брза реакција спречена е голема трагедија и спасени се животи. Општината Бутел ќе се погрижи нивниот чин да не остане незабележан“, изјави Костовски.
Во гаснењето на пожарот учествуваа и други екипи, за кои градоначалникот додаде дека исто така ќе бидат соодветно наградени.