Македонија
Џафери-Белен: Австрија има цврст став за местото на Северна Македонија во ЕУ кое е одамна заслужено
Претседателот на Собранието, Талат Џафери, оствари средба со претседателот на Република Австрија, Александар ван дер Белен, кој во придружба на австриската министерка за правда и 23-члена бизнис делегација, престојува во официјална посета на Република Северна Македонија. Џафери се осврна на исклучително добрите билатерални односи, интензивната соработка на парламентарен план и традиционално силна трговија која ја позиционира Австрија како прв инвеститор во земјава. Тој го запозна високиот гостин со актуелната политичка состојба, особено на евроинтеграциски план, со следните активности во процесот на скрининг и следната фаза на пристапување кон ЕУ, со предизвиците кои стојат пред државата на внатрешен план во однос на процесот на уставни измени, како и на надворешно-политички план, како земја-членка на НАТО и аспирант кон ЕУ.
Ги истакна претседавањето со ОБСЕ и парламентарната димензија на ПСЈИЕ како клучни меѓународни активности на државата, кои ќе придонесат кон јакнење на нејзиното место во надворешната политика како кредибилен партнер и земја чии државни приоритети се регионалната соработка и безбедност, високата солидарност со украинскиот народ, следење на безбедносните политики на ЕУ и придржување кон ЕУ и НАТО политиките во однос на војната во Украина. Ја поздрави одличната економска соработка меѓу двете држави, како и динамичната соработка меѓу двата парламента, преку групите за соработка, комисиите и други парламентарни проекти. Изрази очекување за натамошна поддршка на пријателска Австрија на мултилатерален и билатерален план.
Претседателот Александер ван дер Белен, се заблагодари на можноста за средба и за обраќање пред пратениците во Собранието на Република Северна Македонија и го истакна високото мислење за Република Северна Македонија за претседавањето со ОБСЕ, за кое изрази благодарност што истото се одвива во овие исклучително тешки времиња кога ОБСЕ е без Русија, а војната беснее на европско тло. Ја повтори натамошната цврста поддршка на Австрија на евроинтеграцискиот пат на земјите од целиот Западен Балкан и подвлече дека Австрија има цврст став за местото на Република Северна Македонија во ЕУ кое е одамна заслужено. Токму поради тоа, Австрија смета и укажува на своите ЕУ партнери дека не смее да се дозволи одредени актуелни безбедносни предизвици да го земаат приоритетот на проширувањето на Република Северна Македонија и другите држави-аспиранти од овој регион.
Во однос на економската соработка, ван дер Белен, поучен од историјата на традиционално позитивни и продуктивни односи на Австрија со земјите од регионот на Балканот, поентираше дека Австрија никогаш не била заинтересирана за брз профит, туку за долгорочни инвестиции што овозможуваат трајни вредности и највисоко место меѓу другите инвеститори.
Соговорниците разменија мислења за натамошно унапредување на соработката меѓу двата парламента како важен и вокален дел на целокупната билатерална соработка, натамошни активности на групите за пријателство и соработка и користењето на сите предности на парламентарната дипломатија, како алатка за градење на цврсти врски на билатерален и мултилатерален план.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Кацарска и претходно добивала закани на социјалните мрежи, но не сакала да реагира
Прерседателката на Уставниот суд, Добрила Кацарска и претходно добивала закани на социјалните мрежи, но не ги пријавила во полицијата, се’ до вчерашниот инцидент со ножот најден пред нејзината гаража.
„Во однос на прашањата дали имало закани досега, претседателката Кацарска потврдува дека имало повеќе непријатности во јавноста и ситни инциденти изминатиот период кои не се пријавени, закани преку социјалните мрежи, но на нејзино лично инсистирање, не дозволила да се реагира се до вчерашната пријава“, велат од Уставниот суд.
Од тука потврдија дека во текот на вчерашниот ден, Кацарска во полициска станица пријавила евентуално загрозување на сигурноста, откако на нејзиниот приватен паркинг, во близина на нејзиниот дом, на место каде што се наоѓа нејзиниот личен автомобил е најден нож до прекинувачот за струја кој го осветлува делот околу нејзиниот паркинг и некои други предмети.
Што се однесува до прашањата дали станува збор за некаква закана, порака до претседателката Кацарска или се работи за случајност очекуваме одговорите да ги даде истрагата, велат од судот.
Претходно, за случајот информираше МВР.
„Вчера од страна на Д. К. било пријавено дека на подрачјето на Центар во подземни гаражи, пред нејзиното гаражно место, биле пронајдени импровизиран кревет и кујнски нож, кој бил забоден на прекинувачот за светло“, велат од МВР.
За случајот известен е јавен обвинител.
Македонија
Грчки пратеник го искина Преспанскиот договор од говорницата во собранието
Лидерот на десничарско-националистичка партија „Грчко решение“, Кирјакос Велопулос од говорницата во грчкиот парламент искина лист со Договорот од Преспа.
„Ова е договорот од Преспа, ако имаше пристојна национална патриотска општествена влада, ова ќе го направеше овде“, нагласи Киријакос Велопулос, пренесува „Репортер.гр“.
Тој натаму рече и дека не постои ни северна ни јужна Македонија, Македонија е една, а тоа е Грција.
Ја повика грчката влада да ги донесе меморандумите и сите да гласаат против.
„Донесете ги меморандумите за соработка со Скопје, сите да гласаме против, бидејќи тие го поништија Договорот, а не ние“, рече Велопулос.
Засега нема реакции од македонска страна за потегот во грчкиот парламент, ниту пак од претставниците на меѓународната заедница.
Македонија
Велковски: Во Македонија сeкое дете ќе добие европска детска гаранција
Министерот за труд и социјална политика, Ѓоко Велковски, денеска, на Меѓународниот ден на семејството порача дека семејството е темелот на денешницата, децата се создаваат од семејната средина, а токму од таму се гради идниот свет.
На секое дете мора да му се гарантира заштита и да му обезбедиме достоинствен раст и развој.
„Голем број деца во нашата држава живеат во сиромаштија, исклучени од системите на заштита и лишени од многу права. Други, пак, остануваат без биолошките семејства. Нивното место е да продолжат да живеат во семејство, и тоа со помош и поддршка на згрижувачи затоа што тоа е најблиска форма до семејната“, изјави Велковски.
Според него, парите за згрижувачите не треба да бидат мотив да се стане згрижувач, туку тоа треба да бидат љубовта и прифаќањето.
Токму денес, на Меѓународниот ден на семејството, министерот Велковски посети згрижувачко семејство во општина Чаир, каде што се згрижени дури 5 деца.
„Секоја чест за ваквите примери. Токму од ова семејство ќе пораснат здрави индивидуи, кои ќе градат здраво општество. Се радувам кога ќе видам како вложувањето во децата на крајот се исплати“, рече министерот Велковски.
Тој најави градење политика за воведување европска детска гаранција, со цел да се обезбеди секое дете да има пристап до квалитетни услуги.